Den Bybel met groter neersticheyt ghecorrigeert (Liesveltbijbel 1542)

¶ Van een valsche ende een warachtige gheselschap ende vrientschap, van goeden ende rechten rade diemen by vrome Godvreesende menschen soecken sal, ende ten eersten van God, van wijsheyt ende machtichteyt

Dat .xxxvij. Capittel

1

⁺ALle vrient sal segghen, ende ic hebbe vrientscap vergadert, Mer daer is een vrient alleen metten name een vriendt.

+ A vers 1

2

En isser die droefheydt niet in, totter doot toe? Als een geselle ende een vrient tot eenen vyant gekeert wort.

3

O alder scalcste vermetentheit, waer af sijt ghi gescapen, bedect die dorre quaetheydt ende hare bedriechlicheyt?

4

Een geselle sal metten vrient vrolic sijn in verlustingen, ende inden tijt der tribulatien sal hi een wedersaker sijn.

5

Een gheselle heeft medelijden metten vrient, om des buycx wille, ende teghen den viandt sal hi eenen schilt nemen,

6

En verghetet ws vrients niet in v gemoet, ende en sijt sijns niet ongedachtich in uwen rijckdom.

7

En wilt niet te rade gaen met ws wijfs vader, ende vanden ghenen die v benijden verberget den raet.

8

Alle raetsman bringet den raet wt, maer het is een raetsman in hem seluen.

9

Bewaert v siele vanden raetsman. Weet eerst, welc sinen noot si, ende wat hi in sinen ghemoede sal dencken Op dat hi misschien niet eenen stake in die aerde en slae, ende segge v. Vwen wech is goet, ende stae teghen v ouer om te sien, wat v toecomen sal.

10

⁺Mit eenen ongeesteliken man tracteert van heylicheit, ende metten onrechtueerdigen, van rechtueerdicheit, ende metten wijue, van dien dat si benijdt.

+ B vers 10

11

Metten blooden, vanden oorloghen, ende metten coopman, vander ouerwerpinge. Metten cooper van vercoopinge, metten nijdigen, van te dancken.

12

Metten godlosen, van goddiensticheit. Metten oneersamen van eer-saemheit. Metten ackerman van alle werc.

13

Metten iaerliken werckman vander voleyndinghe des iaers, ⁺ met eenen tragen knecht van veel werckinghe.

+ Deut. v. xxxij. ex. xviij

14

En aenmerct desen niet in allen rade, mer sijt gestadich met eenen goduruchtigen man, den welcken ghi weet, dat die vreese Gods hout, wiens siele na v siele is, die met v als ghi dwaelt ende mist, medeliden hebbe. Mer soo wie in duysternisse struyckelt, en sal met v geen medelijden hebben,

15

ende set met v een hert des goets raets, Want ghi en hebt niet meer dan dat, want dat gemoet des mans, is somtijden meer gewoon te vercondigen, dan seuen wachters, sittende int hooge om die waeck te houden. ⁺

+ Ro. .xij deu. iiij

16

Ende in allen desen bidt den alder ouersten dat hi uwen wech inder waerheit stiere.

17

Voor alle wercken voorgae v een warachtich woort, ⁺ ende voor alle werck eenen vast staenden raet.

+ C vers 17

18

Een scalc woordt sal dat herte veranderen, waer wt vier dingen opstaen, goet ende quaet, leuen ende doot, ende dier verheerscapper is een ghestadighe clappende tonghe.

19

Een besocht man heeft veel geleert, ende is sijnder sielen swack, ende is hem seluen onnut.

20

Daer is een, die wiselijcken wel spreken can, ende hi is verhaet ende heeft gebrec aen sijn neeringhe,

21

want die genade en is hem van God niet gegeuen, dat hi lieftallich is.

22

Daer is een ander, dyen alle wijsheyt is berooft, mer is hem seluen wijs, ende die vruchten sijns verstants, sijn in sinen monde ghetrou.

23

Een wijs man onderwijst sijn volc, ende die vruchten sijnder wijsheyt en missen niet.

24

Een wijs man sal met benedidinge veruult werden, ende die hem sien, sullen hem prisen.

25

Dat leuen des mans is in ghetal der dagen, maer die daghen Israels sijn ontellick.

26

Die wijse man int volc sal eere beeruen, ende sinen name sal leuende sijn inder eewicheit,

27

Mijne kint proeft v siele in uwen leuen ende ist dat si scalc is, so en geeft haer geen macht.

28

Want alle dingen en sijn allen menschen niet nutte, ⁺ ende elcker sielen en behaecht niet alle aert.

+ i.cor. ix c ende .x.f

29

⁺En wilt niet gierich sijn in alle weerscappe, ende en stort v niet ouer alle spise.

+ D vers 29

30

Want in vele spisen sal crancheyt zijn, ende gulsicheyt sal heeter droocheyt toe genaken.

31

Om gulsicheyt zijn veel menschen gestoruen, mer die machtich is, sal sijn leuen verlangen.