Den Bybel met groter neersticheyt ghecorrigeert (Liesveltbijbel 1542)

¶ Dat der godloosen hope ydel is, mer die gerechte worden gehouden, want si op Gode hopen, Godt die HERE en wordt nyet met offerhanden versoent, mer met een oprecht leuen

Dat .xxxiiij. Capittel.

1

⁺DIe onuerstandighe ende onwijse, heeft ongegronden ydelen, ende luegenachtighen hope, ende die droomen verheffen die onvoorsichtighe.

+ A vers 1

2

Als die een schaduwe aen grijpt, ende veruolcht den wint, alsoo is hi ooc die die droomen acht slaet,

3

Alsoo is oock dat ghesichte der droomen. Voor smenschen aensicht, is dye gelijcheyt eens anderen menschen,

4

Wat sal vanden onreynen ghereynicht werden? Ende wat sal vanden luegenachtigen waer werden gheseyt?

5

Waersegginge der dolingen, ende luegenachtighe toouerien, ende die dromen der quaetdoenders is al ydelheyt, ⁺ Ende v herte lijdt fantasien, ⁺ gelijc der vrouwen die in arbeyt van kinde is,

+ B vers 5

+ Deut. xviij.f.

6

het en si dat die visioenen vanden alder ouersten wtghegheuen sijn, soo en gheeft v herte niet in dien.

7

Die droomen hebben veel lieden doen dolen, ende dye daer in hoopten sijn wtgheuallen

8

Dat woort der wet sal sonder lueghen voleyndt

[p. *]

werden, ende die wijsheyt sal inden mont des geloouigen geplant werden. Wat is hi, die niet ondersocht en is.

9

Een man die in veel dingen beproeft is, sal vele dingen dincken, ende die vele geleert heeft, sal die verstandenisse vertellen.

10

Die niet besocht en is, die bekent luttel mer die in vele dingen sot is vermenichfuldicht de boosheit.

11

Hoedanige dingen weet hi, die niet besocht en heuet. Die dwaelt, sal oueruloeyen van scalcheyt, vertellende heb ic veel gesien, ende vele gewoonten der woorden.

12

Ic heb somtijden om deser saken wil tot der doot toe in vreesen geweest,

13

⁺ende ic ben verlost midts die ghenade Gods ⁺

+ C vers 13

+ psal. xxxiij. prouer. xiiij.d

14

Den geest der Godvreesender wert onderhouden, ende in sinen aenscouwen sal hi gebenedijt werden.

15

Want haren hope is totten genen diese salich maect, ende die oogen Gods sijn op die ghene die hem lief hebben.

16

Die den HERE vreest, die en ontsiet niemant, want die HERE is sinen hope ende troost.

17

Sijn siel des geens die den HERE vreest is salich.

18

Wyen aenschouwet hi, ende wie is sijn stercheit?

19

Die oogen des HEREN sijn ouer den genen die hem vreesen, bescermer der mogentheit, vasticheit der cracht, bedecsel der hitten, ende een scaduwe des middaechs, een afbiddinge der misdaet, ende een hulpe des vals,

20

verhogende die siele, ende verlichtende die oogen, geuende gesontheit ende leuen, ende benedidinge.

21

Des gheens offerhande die wt den ongherechtigen goeden offert, is besmet, ende die bescimpingen der onrechtueerdigher en sijn niet wel behaechlick.

22

Die HERE is alleen den ghenen, die sijns ontbeyden inden wech der waerheyt ende der rechtueerdicheydt.

23

⁺Die alderhoochste en looft der ongerechtiger gauen niet, ⁺ noch hi en siet op der ongerechtiger offerhanden niet, noch hi en sal haren sonden nyet genadich zijn, in die menichte haerder offerhanden.

+ D vers 23

+ de. xvi c xxvi.a. pro. iij xxi mat. xij ephe. iiij ec. xxxv

24

Die offerhande offert vander armer goeden, die is als die gene, die den sone dodet int aenscouwen sijns vaders.

25

Dat broot der behoeuender, is dat leuen des armen, ende dye hem dat met bedroch onthout, is een mensce des bloets.

26

Dye sinen naesten in sijne neeringhe berooft, dye sondicht, recht ende alleleens oft hi hem dootsloech,

27

die bloet wtstortet, ende die den huerlinc bedroch doet, zijn gebroeders

28

Een timmerende, ende een brekende, wat batet dien, den arbeyt. ⁺

+ Deut. xxiiij Leui. xi ij.pe. ij b

29

Een biddende, ende een vloeckende, des welcx stemme sal God hooren?

30

Die vanden doden gedoopt wert ende roeren die dooden weder aen, wat batet zijn wasschinge.

31

Also is een mensche die in sonden vast, ende dye selue weder doende, wat vordert hi hem seluen verootmoedigende? Wie sal sijn ghebet verhooren.