Den Bybel met groter neersticheyt ghecorrigeert (Liesveltbijbel 1542)

Alle menschen hebben een gelijc begin, ende inganc in deser werelt, maer wie god om wijsheyt bidt dien gheeft hijse, dye maect God den Heere groot ende heerlic, want haer profijt gae: ghet alle dinc te bouen, Een hooghe lof der wijsheyt

Dat .vij. Capittel

1

⁺TIs wel waer, ic ben oock een sterffelic mensch, allen menschen gelijc, ende wt der aertscher gheboorten des gheens dye eerst ghemaect is,

+ A vers 1

2

ende inden buycke mijnder moeder ben ic vleesch gebeeldet. Inden tijt van thien maenden ben ic te gader gheronnen in bloet van menschen sade, ende midts bequamen luste des slaeps.

3

Ende als ic geboren was,

[p. *]

ontfinc ic die gemeyn lucht, ende viel neder in gelijck gemaecte aerde, ende liet wt die eerste stemme gelijc alle menscen, weenende.

4

Ic ben in windelen gewonden ende met grooter sorgen opgheuoet

5

Want niemant vanden coningen en heeft een ander begin der geboorten ghehadt. ⁺

+ i.ti. vi.c Ioh. i d

6

Hierom so hebben alle menscen eenen inganc totten leuen, ende eenen gelijken wtganck.

7

⁺Daerom begeerde ick, ende mi wert verstant ghegeuen, ende den geest der wijsheyt quam in mi.

+ B vers 7

8

Ende ic hebse hooger geacht dan alle rijcken ende hoocheden ende ic seyde, dat die rijcdommen niet en waren bi haer te gelijcken.

9

Noch ic en gelijckte haer gheenen costelijcken steen, want alle gout is bi haer ghelijc een cleyn sandeken, ende siluer sal in haren aenschouwen als slijck gheacht worden.

10

Ic hebse lieuer gehadt dan gesontheyt ende scoonheit, ende ick heb voor mi genomen dat si mijn licht moet zijn, want haer schijnsel is onuerblusselijc,

11

ende mi quamen alle goede dinghen tsamen met haer, ende ontallijcke eersaemheit door haren handen,

12

ende ic ben verblijt in allen, want dese wijsheyt ghinc voor mi, ende ic en wist niet dat si alder goeder dinghen moeder is.

13

Die welcke ick sonder geueynstheit geleert hebbe, ende sonder haet deel icse mede, ende haer eersaemheit en verberge ic niet.

14

Want si is den menschen eenen oneyndelijcken schat, den ghenen dyese ghebruycken, die worden der liefden ende der vrientscappen Gods deelachtich, want om der gauen der wijsheyt, worden si hem aengenaem.

15

God heeft mi verleent wijslijc te spreken, ende genoechlic te dencken vanden dingen, die hi mi genadelic gegeuen heeft, ⁺ want hi is leyder der wijsheyt, ende die de wijsheyt recht leert ghebruycken.

+ C vers 15

16

Want wi, ende onse redenen zijn in sijnder hant, ende alle onse wijsheyt ende verstant, ende wetenscap alre onser wercken.

17

Hi heeft mi warachtige kennisse der dinghen die sijn ghegheuen, op dat ick die gheschicktheidt des aertrijcx sal weten, ende die crachten der elementen dat beginsel, die voleyndinge,

18

ende dat middel der tijden die veranderinge der geboorten, ende dye voleyndinge der tijden,

19

des iaers loop, ende die gescictheden der sterren,

20

die natueren der dieren, ende die gramscappen der beesten, die crachten der winden, ende der menscen gedachten, die ondersceydentheden der spruyten, ende die crachten der wortelen,

21

ende ick leerde alle dingen die verborgen ende onuersien sijn. Want die constenaer alre dingen heeft mi gheleert wijsheyt.

22

In haer is die heylige geest der verstandenissen eenich, menichfuldich, subtijl, wel sprekende,

23

edele onbesmet, ⁺ seker, soet, beminnende tgoet, scherp, die niet en verbiet goet te doene, beleeft, goedertieren gestadich, seker, vry, hebbende alle duecht, alle dingen voorsiende,

+ D vers 23

24

ende die alle verstandige geesten ontfaet, reyn, subtijl Want wijsheyt is beroerliker dan alle beroerlike dingen.

25

Si reycket ouer al, om haerder reynicheyt wille

Sy is eenen subtilen asem der cracht Gods, ende een louter wtuloeyinge der claerheyt des almogenden Gods, ende daerom en coemt niet dat besmet is in haer,

26

Want si is een blinckinge des eewigen lichts, ende eenen spiegel sonder vlecke, der maiesteyten Gods ende dat beelt sijnder goetheyt

27

Ende al is si een, si vermach alle dingen, ende in haer seluen bliuende, vernieut si alle dingen, ende draecht haer ouer, door die natien in die heylige sielen, Sy heeft Gods vrienden ende die propheten gestelt.

28

Want god en heeft nyemant lief, dan den genen die metter wijsheyt in woont,

29

want dese is scoonder dan dye sonne ende si is bouen alle gescictheit der sterren, ende den dach en is bi haer niet te gelijcken.

30

Den daghe volget den nacht, mer dye boosheyt en verwint dye wijsheyt niet, ende die dwaesheyt en mach niet wesen bi haer.