Den Bybel met groter neersticheyt ghecorrigeert (Liesveltbijbel 1542)

Hoe God die boose straft, die geloouige leydet, bescermt ende onderhout, hoe hi haer goet doet, ende veel wonders om haren wille werct.

Dat .xvi. Capittel

1

⁺DOe sanc Iudit den HERE dit liedeken Begint den HERE in tamboeren, singet den HERE in cymbalen,

+ A vers 1

2

singhet hem soetelic een nieu lof, verhueget ende aenroept sinen name.

3

Die HERE wrijuet die oorlogen in stucken, HEERE is sinen name

4

Die sijn heyrlegers int midden zijns volcx heeft bedoruen, op dat hi ons van alle onser vyanden handen soude verlossen.

5

Assur quam in die bergen vanden noorden, in menichte sijnder stercheit. Welcx menichte dye beecken heeft ghestopt, ende haer peerden hebben die dalen bedect.

6

Hi heeft geseyt dat hi mijn lant soude aensteken, ende mijn iongen metten sweerde dooden, mijn ionghe kinderkens te gheuen tot eenen roof, ende mijn maechden ter gheuanckenissen.

7

⁺Mer dye almachtige HERE heeft hem gescent ende heeft hem inder vrouwen hant ouergeleuert, ende heeft hem beschaemt.

+ B vers 7

8

Want haer machtige en viel niet vanden ionghe ghesellen, noch Tirans sonen en versloeghen hem niet, noch die hooge ruesen en stonden teghen hem niet op,

9

mer Iudith die dochter Merari, nam hem sijn macht, met die gedaente haers aensichts.

10

Want si dede die cleederen haerder wedulicheyt wt, ende dede die cleederen der blijscappen aen, in verhueginge der kinderen Israel,

11

Si salfde haer aensicht met saluen, ende si bant die vlechten des hayrs, met een huyue, om hem te bedriegen.

12

Haer pantoffelen namen zijn ooghen wech, haer schoonheit vinc sijn siele. Si hieu sinen necke met eenen sweerde af.

13

Dye perssen ontsagen haer stantafticheyt, ende die Meden haer coenheyt.

14

Doen huylden die heyrlegers der Assiriers, doen mijn ootmoedige openbaerde, verdorrende van dorste.

15

Die sonen der ionger meyskens doorstakense ende sloegense doot als vluchtende kinderen.

16

Si sijn vergaen inden strijde vanden aensichte des HEREN mijns Gods.

17

⁺Laet ons den HERE eenen lofsanc singen.

+ C vers 17

18

Laet ons onsen God eenen nyeuwen lofsanc singen HEERE, HEERE, ghi sijt groot ende heerlick in crachten, ende die nyemadt verwinnen en mach.

19

Alle uwe creatueren dienen v, ⁺ Want ghi hebbet geseyt, ende si worden gemaect,

+ Psalmo. xxxiij ende xlviij.

20

ghi seynde uwen geest ende si sijn geschapen, ende daer en is nyemant die uwer stemme wederstae.

21

Die bergen sullen vanden fundamenten werden beweecht, metten wateren, ende die harde steenen sullen voor v aensicht smelten, ghelijck wasch.

22

Maer die v vreesen sullen voor v in allen dinghen groot wesen.

23

Wee den volcke dat opstaet tegen mijn geslachte,

24

want die almachtige HERE salse oordeelen inden dach des oordeels sal hise besoecken,

25

Want hi sal vier ende wormen in haer vleesch geuen, dat si bernen ende gheuoelen inder eewicheyt.

26

Ende het is hier na gheschiet, dat alle tvolc na die victorie te Iherusalem is ghecomen, den HEERE te aenbidden, ⁺ ende terstont als si ghereynicht sijn, soo hebben si haer brantoffer, ende haren beloofden offer geoffert.

+ D vers 26

27

Ende Iudith offerde alle dye oorloochs gereetscap Holofernis, die haer tvolc gegeuen had, ende dat muggen net, dat si van sinen bedde wech genomen hadde, ende heuet den HEERE ophehangen.

28

Ende tvolc was ghenoechlijc na dat aensicht der heyligen, ende die blijscap deser victorien is drie maenden geuiert met Iudith, Mer na dese dagen keerde elck weder tsinen huyse,

29

ende Iudith is groot gemaect in Betulia, ende si was die heerlicste des heelen lants Israels

30

Si was ooc der duecht, der reynicheyt toegeuoecht, also dat si alle die dagen haers leuens gheenen man en bekende, vander tijt dat Manasses haer man sterf.

31

Ende in die hoochtijdelike dagen ginc si voort met grooter glorien. Ende si bleef int huys haers mans, hondert iaer ende vijf,

32

ende si liet haer dienstmaerte vry, ende si sterf, ende is begrauen met haren man in Bethu-

[p. *]

lia

33

ende alle tvolc beweendese .vij. daghen.

34

Binnen alle die tijden haers leuens en was nyemant die Israel verstoorde, ende vele iaren na haer doot.

35

Den dach der victorien deser feesticheyt, wert vanden Ebreen int ghetal der heyligher dagen getelt,

36

ende wert vanden Ioden gheuiert, van die tijt aen tot op desen teghenwoordighen dach.

Hier eyndt dat boeck Iudith.