Den Bybel met groter neersticheyt ghecorrigeert (Liesveltbijbel 1542)

¶ Het hooft van Holofernes wert ter mueren wt ghesteken, die van binnen der stadt oueruallen die vyanden die haer belegen hadden

Dat .xiiij. Capittel

1

⁺MEr Iudith seyde tot allen den volcke, Broeders hoort my. Steect dit hooft op onse mueren wt, ende als de sonne op comen sal,

+ A vers 1

2

so neme een yegelic sijn wapenen, ende loop wt met eender druysticheyt niet op dat ghine derwaerts daelt, mer als eenen druyschenden toeloop makende. Dan salt van noode sijn, dat die bespieders vlien, om haren hooftman op te wecken totten strijde.

3

Ende als haer hooftlieden tsamen lopen tot Holofernes tente, ende vinden hem eenen bloc in sijn bloet gewentelt, so sal die vreese op hen vallen.

4

Ende als ghi weet dat si vlien, soo loopt hen haestelijck na. Want die HERE salse v geuen om te verderuen

5

⁺Als Achior die cracht sach, die God Israels gedaen had, so liet hi die seden der heydenscap, ende geloofde God, ende hi liet hem besnijden, ende hi werdt totten volck Israels geset, ende alle die nacomelinghen sijns geslachts tot opten dach van heden.

+ B vers 5

6

Ende terstont doen den dach opstont, hebben si Holofernis hooft op die mueren ghesteken, ende elck man nam sijn wapen, ende si sijn met grooten gedruysch ende huylinge wt gegaen.

7

Doen die bespieders dat sagen liepen si tot Holofernis tente. Ende die in sine tente waren, quamen voor den inghanc der slaepcameren, om hem te wecken, ende sochten hem met subtijlheit wacker te maken. Want nyemant vanden Assyriers en dorste dye slaepcamer cloppende oft ingaende open doen

8

Mer doen die baroenen ende die hooftmannen, ende alle die meeste der Assyriers heyr te samen quamen, seiden si den camerlingen Gaet in ende wect hem op, want die muysen sijn wt haren holen gegaen, ende hebben ons totten strijt beroepen.

9

Doen ghinck Vagao in sijn slaepcamer, ende stont voor dat bedde ende sloech sijn handen te gadere, want hi vermoede dat hi met Iudith sliep,

10

⁺Mer doen hi geen bewegen des geens die daer liggende was, metten ooren en vernam, so ginc hi naerder totten bedde, ende hieft op, doen sach hi Holofernis doode lichaem sonder hooft in sijn bloet versmoort liggen,

+ C vers 10

11

doen riep hi wt met luyder stemmen, met weeninge, ende schoorde sijn cleederen.

Ende hi ginc in Iudith camer, ende en vantse niet, ende hi sprac buyten totten volc seggende

12

Een hebreusch wijf heeft een bescaemtheit int huys des conincx Nabuchodonosors gedaen.

13

Want siet Holofernes leydt op die aerde, ende sijn hooft en is niet aen hem.

14

Doen der princen cracht der assyriers dat hoorden so schoorden si haer cleeederen, ende daer viel een

[p. *]

onuerdragelijcke vreese, ende beuinge op hen, ende haer ghemoeden sijn alte seer verschrict. Ende daer is een groot gheroep ghecomen inden heelen legher.