Den Bybel met groter neersticheyt ghecorrigeert (Liesveltbijbel 1542)

¶ Tobias wert weder siende, hi wert oudt ende sterf, ende voor sinen doot propheteert hi, ende voorseyt wat van Niniue, ende vander salicheyt ende weluaert Israels.

Dat .iiij. Capittel

1

⁺ENde die redenen Tobie zijn voleynt, Ende na dat Tobias verlicht is, leefde hi .xlij. iaer, ende hi sach die kinderen zijns soons kinder.

+ A vers 1

2

Ende doen hondert ende twee iaren veruult waren, so is hi eerlick begrauen tot Niniue,

3

want hi was .lvi. iaer oudt, doen hi dat licht sijnder oogen verloos, ende tot sinen .lx. iaren ontfinc hijt weder,

4

Mer den anderen tijt zijns leuens was hi in blijschappen, ende met goede vorderinghe der vreesen Gods, is hi gereyst in vreden.

5

⁺Mer inder vren zijnre doot, so heeft hi Tobiam sinen sone tot hem geroepen, ende seuen ionghen, sine sone, zijn neefkens, ende hi seyde hen. Die verderuinge Niniue is na bi, want dat woort des HERRN en is niet veruallen,

+ B vers 5

6

ende onse broeders dye verstroyt zijn vanden lande Israel, die sullen daer weder toe keeren.

7

Ende alle haer woeste lant, sal veruult werden, ende thuys Gods dat in haer verbrant is, sal weder ghetimmert werden,

8

ende daer sullen weder keeren alle die God vreesen,

9

ende die heydenen sullen haer afgoden verlaten, ende si sullen te Ierusalem comen woonen,

10

ende alle die coninghen der aerden sullen hen in haer verblijden, aenbedende den God Israels.

11

⁺Hierom mijn sonen hoort uwen vader, Dient den HERE inder waerheyt, ⁺ ende versoeckt dat ghi tghene doet, dat hem behagelic is,

+ C vers 11

+ Iosue. xxiiij.c.

12

beueelt uwen kinderen, dat si gherechticheden ende aelmoesen doen, dat si Gods gedencken, ende hem ghebenedien in alre tijt, inder waerheyt, ende in al haerder cracht.

13

Nv hierom, ghi mijn sonen hoort mi, ende en wilt hier niet blijuen, mer in so welcken daghe, ghi v moeder begrauen sult hebben bi mi in een graf soo rechtet v ganghen dat ghi van hier gaet. Want ic sie dat haer ongherechticheyt, haer een eynde sal gheuen.

14

⁺Ende het is gheschiet, nae den doot sijnder moeder, dat Tobias van Niniue is ghescheyden met zijn huysurouwe, ende kinderen, ende met sijnder kinder kinderen,

+ D vers 14

15

ende hi keerde weder tot zijns wijfs ouders, ende hi vantse ghesont in goeden ouderdom, ende hy droech haerder sorge,

16

ende hi sloot haer ooghen ende ontfinc die erffenisse Raguelis, ende hi sach dat vijfste geslachte, ende die kinder sijnder kinderen.

17

Ende .xcix. iaer veruult hebbende, inder vreesen des HEREN, met vruechden, so sterf hi, ende hi wert van sinen maechscap begrauen.

18

Ende alle zijn gheboorte bleef in goeden leuen, ende in die heylige wandelinghe, also, dat si also wel Gode, als den menschen aenghenaem waren, ende allen die daer woonden opter aerden

Hier eyndet dat boeck Tobie