Den Bybel met groter neersticheyt ghecorrigeert (Liesveltbijbel 1542)

¶ Die vader ende die sone beraden haer vanden loon dat si den leytsman gheuen souden, maer hi en wil niet van haer lieden ontfangen, ende vertoont haer wie dat hi si

Dat .xij. Capittel

1

⁺DOen riep Tobias sinen sone tot hem ende seyde hem Wat mogen wi desen heyligen man geuen, die met v is gecomen?

+ A vers 1

2

Tobias heeft geantwoort, ende sinen vader geseyt. Vader, wat loon sullen wy hem geuen, oft wat soude waerdich mogen zijn sinen weldaden?

3

hi heeft mi geleyt, ende gesont weder ghebracht, ende hi heeft dat gelt van Gabelo ontfanghen, ende heeft mi die huysurouwe doen hebben,

4

ende hi heuet den duyyel van haer gedwongen, hi heeft haren ouders blijscap gedaen, hi heeft mi vander verslindinge des vischs verlost,

5

ende hi heeft v dat licht des hemels oock doen sien, ende wi zijn met allen goeden door hem veruult, Wat mochten wi hem geuen weerdich tot desen dingen

6

Mer mijn vader ic bid v, dat ghi hem bidt, oft hi misschien wilde geweerdigen, die helft van allen den goeden, die wi hebben gebracht, voor hem te nemen.

7

⁺Ende hem roepende, te weten, die vader ende die sone, baden hem, dat hi hem wilde geweerdigen die helft van allen den dingen, die si gebracht hadden, aengenamelijck tontfangen.

+ B vers 7

8

Doen seide hi hen heymelijc. Gebenedijt God des hemels, ende belijdt hem voor alle leuendige menschen, want hi heeft zijn ontfermherticheyt met v gedaen.

9

Want die verholentheyt des conincx te verbergen is goet,

10

maer die wercken Gods te openbaren ende te belijden, is eerlic.

11

Dat ghebet met vasten ende aelmoesse, is goet, meer dan schatten gouts op te leggen, want die aelmoesse verlost vander doot, ende si ist, die de zonden suyuert, ende doet dat eewige leuen vinden. Mer die sonden ende ongerechticheyt doen, die zijn vianden haerder sielen

12

Hieromme ic openbare v die waerheit, ende ic en sal die heymelike reden niet voor v verbergen.

13

⁺Doen ghi met tranen baedt, rnde begroeft die dooden, ende liet uwe maeltijt, ende borget die dooden sdaechs in uwen huyse ende tsnachts groeft ghise,

+ C vers 13

14

bracht ick v ghebet voor den HERE Ende want ghi God aengenaem waert, ende lief hadt, so wast van noode dat die temtatie v proefde.

15

Ende nv heeft mi die HERE gesonden, dat ic v gesont soude maken, ende Saram ws soons wijf, vanden duyuel verlossen.

16

Want ick ben Raphael een Engel, een vanden .vij. die voor den HERE staen.

17

Ende als si dit hoorden, so verscricten si, ende beuende vielen si op haer aensicht ter aerden.

18

⁺Ende die Engel seyde hen. V si vrede. En wilt niet vreesen, want doen ick met v was, doen was ic door den wille Gods met v,

+ D vers 18

19

gebenedijt hem, ende singt hem. Tis wel waer, ick scheen met v te eten ende te drincken, mer ic besige onsienlijcke spijse ende dranc, die vanden menschen niet gesien en mach werden.

20

Hierom ist tijt, dat ic weder tot hem keere, die mi gesonden heeft mer gebenedijt ghi God, ende vertelt alle sijn wonderlicheden.

21

Ende als hi dese dingen geseyt hadde, soo is hi wech genomen van haren aenscouwen, ende si en mochten hem nyet meer sien.

22

Doen vielen si plat neder ter aerden op haer aensicht, drie vren lanc, ende gebenediden God, ende opstaende, vercondichden si alle zijn wonderlicheden.