Den Bybel met groter neersticheyt ghecorrigeert (Liesveltbijbel 1542)

[p. *]

Hier begint dat derde boeck Esdre.

¶ Hoe Iosias den Paesschen hout, den volcke schapen ende lammeren gheeft. Hoe Ieconias sijn sone Coninck wert na hem, den welcken die Coninck van Egypeen af settede.

Dat eerste Capittel

1

⁺ENde Iosias maecte den HERE eenen Passah te Ierusalem, ⁺ ende hi offerde Phase, den veerthiensten dach, der eerster maent,

+ A vers 1

+ iiij.reg. xxxiij.e ij.para. xxv.a

2

stellende dye priesters by ghebuerten der daghen, met langen clederen ghecleet inden tempel des HEREN,

3

ende seyde den Leuiten den gheheylichden knechten Israels, dat si hen den HERE souden heylighen, in die settinge der heyligher arcken des HEREN, int huys dat Salomon Dauids sone die Coninc tymmerde, ende sprack,

4

ghi en sultse niet op v schouderen dragen. Ende nv dient uwen HERE ende besorcht zijn volc Israel wt den deele, nae v dorpen ende v geslachten

5

nae die scriftuere Dauids des Conincx Israels, ende na die grootmakinghe Salomons zijns soons alle inden tempel, ende na uwe vaderlike deelken der heerscappien der geenre die int aenschouwen der broeders der kinderen van Israhel staen.

6

Offert dat Passah, ende bereyt uwen broeders offeranden, ende doet na dat gebot des HEREN, het welc Mosi gegeuen is.

7

Ende Iosias gaf int volc dat geuonden is, ghescencken der scapen, lammeren, ende bocken ende geyten dertich dusent, ende drie dusent ossen.

8

⁺Dese zijn vanden conincliken goede ghegheuen den volcke na die belofte, ende den priesteren totten Passah, twee duysent scapen int ghetal, ende hondert ossen

+ B vers 8

9

Ende Ieconias ende Semeias, ende Nathanaels gebroeders, ende Asabias ende Oziel, ende Iosabad offerden in Phase vijf dusent schapen, ende vijf hondert calueren.

10

Ende als dese dinghen fraeylijck geschieden, so stonden die priesters ende Leuiten hebbende soet broot bi gheslachten.

11

Ende nae dye deelen der prinschappen der vaders int aenschouwen des volcx offerden si den HERE na tgene dat in Moses boec gheschreuen is,

12

ende si brieden Phase met viere alsoot van noode was, ende si coocten dye offeranden in coperen potten,

13

ende in ander potten met goetwillicheit, ende brochtense allen den ghenen dye wt den volcke waren, ende daer na bereyden zijt hen ende den priesters,

14

Want die priesters offerden ruet, tot dat die vre geeynt was. Ende die leuiten bereyden hen, ende haren broederen den kinderen Aarons.

15

Ende die kinderen Asaph waren offerders by behoorte nae Dauids gebot. Ende Asaph ende Zacharias, ende Ieddithum die naest die Coninck was,

16

ende die doorwachters bi elcke doren, also dat een yeghelijc die sine niet ouer en tradt, want haer broeders bereyden dien. ⁺ Ende alle die dinghen die tot des HEEREN offerhande behoorden zijn voleyndt.

+ C vers 16

17

In dien dage hielden si dat Phase,

18

ende offerden drancoffer ouer des HEREN spijsoffer, nae dat gebot des Conincx Iosie.

19

Ende die kinderen Israel die in dien tijde geuonden zijn, behielden dat Phase ende den hoochtijdeliken dach der soeter brooden seuen dagen.

20

Ende daer en is alsulcken Phase niet ghehouden in Israel vanden tijden Samuels des pro-pheten,

21

ende alle die coningen Israels en hielden alsulcken Phassah niet als Iosias hielt, ende dye priesters, ende die leuiten, ende die Ioden, ende al Israel die in die wooninge te Ierusalem gheuonden zijn,

22

int achthienste iaer als Iosias regneerde, is dat Phase ghehouden.

23

Ende die wercken Iosie zijn wel gheciert int aenschouwen zijns HEREN, in een volle herte ontsiende,

24

ende die bi hen ghescreuen zijn in voorleden tijden van hen die ghesondicht hebben, ⁺ ende die godloos hebben geweest teghen den HEERE voor alle volc, ende die de woorden des HEREN ouer Israel niet gesocht en hebben

+ iiij.reg. xxxiij.f ij.para xxxv.c.

25

Ende na alle dese daet Iosie so ginc Pharo die coninck van Egipten op, comende in Carchamis vanden wege Euphraten, ende Iosias ginc wt hem te gemoete.

26

Ende die coninc te Egipten seynde tot Iosiam seggende. Wat heb ic met v te doen coninc van Iudeen?

27

Ic en ben vanden HERE niet gesonden dat ic tegen v vechten soude, want mijn oorloge is ouer Euphraten. Gaet haestende neder.

28

Ende Iosias en is niet weder ghekeert opten waghen, mer hi pijnde hem beuechtende te verwinnen, niet aenmerckende des propheten woort wt den mont des HEREN,

29

maer hi stelde den strijdt tot hem in dat velt Mageddo. Ende die princen quamen af tot den coninc Iosiam,

30

ende die coninc seyde sinen knapen. ⁺ Doet mi wech vanden strijdt, want ic ben alte cranc. Ende zijn knapen deden hem terstont wech vander batalgien, ende hi steech op sinen tweesten wagen

+ D vers 30

31

ende als hi te Ierusalem quam soo sterf hy, ende hy wert in zijn vaderlic graf begrauen.

32

Ende si beweenden Iosiam in alle dat Iootsce lant, ende die ouerste met haren wiuen, beclaechden hem tot op desen dach. Ende het is gegeuen dat te geschieden altijt in alle dat gheslachte Israel.

33

Mer dese dingen zijn voor gescreuen in dat boec der historien der coninghen Iuda, ende alle dat bedrijf Iosie, ende zijn glorie, ende zijn verstandt in des HEREN wet, ende die welcke van hem gheschiet zijn, ende die niet en sijn gheschiet, die sijn gescreuen int boeck der coninghen Israel ende Iuda.

34

Ende die wt den volcke waren, namen tot hem Ieconiam, den sone Iosie, ende stelden hem coninck voor Iosia sinen vader, als hi driendertich iaer out was

35

Ende hi regneerde drie maenden ouer Israel. Ende die coninc te Egipten dede hem wech, dat hy in Ierusalem niet regneren en soude,

36

ende hi scatte tvolck op hondert talenten siluers, ende een talente gouts.

37

Ende die coninc van Egipten maecte Ioachim sinen broeder coninc van Iuda ende Ierusalem,

38

ende hi bant die borgemeesters Ioachim ende Saralen sijn broeder, ende hi greepse ende leydese weder in Egipten.

39

Ioachim was .xxv. iaer out doen hy begonst te regneeren int Iootsche landt, ende Ierusalem, ende hi dede quaet int aenschouwen des HEREN.

40

Na desen ghinc Nabuchodonosor op, ende bant hem met yseren banden, ende bracht hem in Babilonien.

41

Ende Nabuchodonosor nam die heylighe vaten des HEREN, ende namse ende heilichdese in sinen tempel in Babilonia.

42

van zijn onreynicheit ende ongheestelicheyt is gescreuen int boec der tijden der coningen.

43

⁺Ende Ioachim zijn sone regneerde voor hem. Ende als hi coninc gestelt was, was hy .xviij. iaer out.

+ E vers 43

44

Hi regneerde drie maenden ende thien dagen in Ierusalem, ende hi dede quaet in des HEREN aenscouwen,

45

ende nae tiaer seynde Nabuchodonosor ende

[p. *]

voerde hem ouer in Babilonien, te gader metten heyligen vaten des HEREN.

46

Ende hi stelde Sedechiam sinen broeder coninck des ioetschen lants, ende te Ierusalem, als hi .xxi. iaer out was, Ende hy regneerde elf iaer.

47

Ende hy dede quaet int aenschouwen des HEREN, ende hy en ontsach hem niet vanden woorden die van Ieremia den propheet geseyt zijn, wt den monde des HEREN

48

Ende besworen vanden coninc Nabuchodonosor meyneedelic swerende, is hi wech gegaen. Ende sinen neck, ende zijn hert verhert zijnde, tradt hy ouer die wetlicheden des HEREN Gods Israels.

49

Ende die leytslieden des volcx deden veel dingen ongerechtelic, ende deden ongodlick bouen al die onreynicheydt der heydenen, ende besmetten des HEREN tempel, dye heylich was in Ierusalem.

50

Ende die God haerder vaderen seinde tot haer sinen engel, dat hise weder riep van haren sonden, om dat hise sparen soude in sinen tabernakele.

51

Mer si beschimpten zijn engelen, ende in die dinghen dye de HERE ghesproken heeft, waren si bespottende sijn propheten,

52

Die welcke tot gramschappen toe verwect is ouer sijn volc, om hare ongodlicheit. Ende hi gheboot der Chaldeen coningen op te gaen.

53

Dese dooden haer ionge knechtkens metten sweerde, inden omganc haers heyligen tempels, ende si en spaerden den iongen ende den ouden niet, noch der maghet, noch den iongelinc,

54

maer si sijn al geleuert in haer handen ende alle die heylige vaten des HEREN, ende dye coninclike apoteken nemende, voerden sise in Babilonien.

55

Ende staken des HEREN huys aen ende bedoruen die mueren Ierusalems, ende si aenstaken haer torens met viere, ende si verdeden al haer eerlicheden,

56

ende dedense te niet, ende die ouer waren bleuen vanden sweerde, leydense in Babilonien.

57

Ende het waren zijn geuangen so lange als die Persen regneerden in die veruullinghe des woordts des HEREN, inden mont Ieremie,

58

soe langhe als dat lant sine sabbathen goedertierlick hielt, in alder tijt haerder besceydenheit, hielt si den saboth, in die tsamen voeginge der .lxxvij. iaren.