Den Bybel met groter neersticheyt ghecorrigeert (Liesveltbijbel 1542)

So wat hier van fonteynen ende reyninghe gheseyt wort, dat behoort al op die tijt Christi.

Dat .xiij. Capittel.

1

⁺OP die tijdt sal dat huys Dauids, ende dye borghers tot Hierusalem een vry open fonteyne hebben tegen die sonde ende onreynicheyt, ⁺

+ A vers 1

+ eze. xxx. Hie. xiij

2

Op die tijt seyt de HERE der heyrscaren wil ic der Godekens ende der beelden namen wtroeyen wt den lande. Also datmen haerder niet meer gedencken en sal, daer toe so wil ic ooc die waerseggers, ende onreyne gheesten wt den lande verdrijuen. Dattet also toegaen sal,

3

Wanneer yemandt waersegghen wil, so sullen sijn eyghen vader ende moeder die hem ghewonnen, ende voortghebrocht hebben, tot hem seggen. Du moest steruen, want ghi spreect valscheit onder den name des HEREN. Ia sijn eyghen vader ende moeder die hem ghewonnen hebben, sullen hem wonden ende steken, om dat hi ghewaerseyt heeft.

4

Dan so sal dye waerseggher hem schamen der ghesichten ende openbaringhen, die hi propheteert. Ende hi en sal gheen hayren cleederen meer aentrecken, op dat hi lieghe ende bedrieghe.

5

Maer hy sal moeten segghen. Ick en ben gheen Propheet, mer een ackermam, Want ic hebbe gedient van mijnder ioncheit aen.

6

Ende alsmen dan tot hem seggen sal. Waen comen v dese wonden in dijne handen? So sal hi segghen. Ick ben also geslagen inden huyse der gheenre die mi lief hebben.

7

⁺O du sweert maect v op ouer mijn herders, ende ouer den Prince mijns volcx, spreeckt die HERE der heyrscaren, Slaet den Herder, dat dye schapen verstroyt worden. So wil ic mijn handen keeren totten cleynen.

+ B vers 7

8

Ende het sal gheschieden. In welcken lande (spreect die HERE) twee deelen sullen sijn, dye sullen wtgeroeyt worden, ende onder gaen. Ende dat derde deele sal daer in ouerblijuen.

9

Ende ic wil dat selue derdendeel int vier worpen ende suyueren, ghelijck alsmen dat siluer suyuert. Ende beprouen gelijc alsmen dat gout proeft. Die sullen dan mijnen name aenroepen, ende ic wilse verhooren. Ick wil segghen, Het is mijn volc. Ende si sullen seggen. Mijn HERE God