Den Bybel met groter neersticheyt ghecorrigeert (Liesveltbijbel 1542)

¶ Den prophete worden openbaringhen verthoont, Welcke die verlossinghe vander Babylonischer gheuanghenisse bedieden, Ende die verlossinghe ooc die door Christum gheschiet is.

Dat .ij. Capittel

1

⁺ENde ic hief mijn ooghen opwaerts, ende sach, Ende siet daer was een man dye hadde een metsers coorde in sijn hant,

+ A vers 1

2

Ende ic seyde waer wilt ghi henen gaen? Ende hi antwoorde my. Ic wil Ierusalem gaen meten, op dat ic sie, hoe lanc ende wijt dat si sijn sal

3

Ende siet, die Engel die met mi sprac, ghinc wt. Doen ghinc daer een ander Engel hem tegen,

4

die sprac tot hem. Loopt henen, ende segt desen Ionghelinc ende spreect Ierusalem sal noch bewoont worden, sonder mueren van een groote menichte der menschen, ende der beesten, die daer in sijn sal,

5

Want ic wil, spreect die HERE, haer tot eender vierigher mueren, rontom zijn, Ende daer binnen tot een heerlijcke verchieringhe sijn.

6

⁺Huy, huy, vliet wt die noordtsche landen, seyt dye HERE, Ia ghi die ic tegen die ^b vier winden des hemels verstroyt hebbe seyt die HERE,

+ B vers 6

b Bi die vier winden verstaetmen die gheheele werelt.

7

Huy, Syon ontloopt ghi die daer woont bi de dochteren Babels

8

Want also seyt die HERE der heyrscharen, Hy heeft mi ghesonden tot die Heydenen, die v berooft hebben, Hare macht heeft een eynde, Wie v aentast, die tast mijnen oogen appel aen,

9

nv siet, ic wil mijn hant ouer haer weysteren, dat si eenen roof worden sullen den ghenen die haer ghedient hebben. Ende ghi sult weten dat mi die HERE der heyrscharen ghesonden heeft.

10

O du dochter Zion verblijt v, ende weest vrolijc Want siet ic come, ende ick wil bi v woonen, spreect, die HERE,

11

ende ter seluer tijdt sullen veel heydenen aen den HERE hangen, Ende si sullen mijn volck sijn, ende ic wil bi v woonen, dat ghi weten sult dat mi die HERE der heyrscharen tot v ghesonden heeft.

12

Ende dye HERE sal Iuda sijn erfdeel inden heylighen lande innemen, ende Hierusalem weder verkiesen.

13

Alle vleesch si stille voor den HERE, Want hi heeft hem opgemaect wt sijnder heyligher steden.