Den Bybel met groter neersticheyt ghecorrigeert (Liesveltbijbel 1542)

Hi roept God aen inden buycke des waluischs, Ende looft hem, Die visch worpet hem weder opt lant leuende.

Dat .ij. Capittel.

1

⁺ENde Ionas badt den HEERE sinen God, inden buyck des vischs, ende sprac also.

+ A vers 1

2

Ick riep totten HEERE in mijnen ancxt, ende hi antwoorde mi.

Ick riep ^a wt den buycke der hellen, ende ghy verhoorde mijn stemme.

a Wt den buyck der hellen dats wt sulcker verlatentheydt ende benautheyt daert onmogelic was wt verlost te worden sonder die groote crachte Gods, ende bouen natuere

3

Ghy worpt my midden inder zee in dye diepte, dat my dye vloet omuinck, Alle dijne baren ende goluen gingen ouer mi.

4

Ick dachte, dat ick gansch van uwen ooghen verstooten ware, Dat ick dijnen heylighen tempel niedt meer sien en soude.

5

Dye wateren hadden my omcingelt tot aen mijn leuen, Den afgront der diepten omringhelde mi, dat riet ende die biesen bedecten mijn hooft.

6

Ick voer henen af daer die bergen een eynde hebben, Dat aertrijcke hadde zijn grendelen ende handtboomen voor mi ghesloten inder eewicheyt.

Maer du O HEERE mijn Godt hebste mijn leuen wt dat verderuen weder hier op gebracht.

7

Doen mijn siele in my benaut wert, ghedacht ick des HEREN, Ende mijn ghebet quam tot v in dijnen heylighen Tempel.

8

Mer dye haer op hare wercken verlaten, die doch niets niet en zijn, Die selue en achten die ghenade niet

9

Maer ick wil v met dye stemme des lofs ende dancx offeren, Mijne vrywillighe gheloften wil ick den HEERE betalen, om dat hi mi gheholpen heeft.

10

Ende dye HERE sprack totten vissche, ende dye selue spijde Ionam wt opt lant.