Den Bybel met groter neersticheyt ghecorrigeert (Liesveltbijbel 1542)

¶ Dye Propheet Obadia.

¶ Hi propheteert tegen den stouten hoochmoet der Edomiten, dye welcke den kinderen Israhels in haren iammere veel leedts ghedaen hebben, welcken iammer ouer haer gaen sal.

Dat .eerste. Capittel.

1

⁺DIt is dat ghesicht Obadia, also spreect die HERE God van Edom. Wi hebben vanden HERE ghehoordt datter een ambassaet onder dye heydenen ghesonden is, met alsulcken beuel. Wel op

[afbeelding]

ende laet ons teghen haer strijden

+ A vers 1

2

siet ic wil v cleyne maken onder dye heydenen, ⁺ ende seer veracht

+ eze xxix. dan. iiij.

3

den hoochmoet dijnder herten heeft v bedrogen om dat ghy inde clippen der steenrootsen woont in dijne hooghe sloten, ende segt in dijnder herten. Wie wil mi ter aerden nedere werpen?

4

Oft ghy v al in die hoochte verhieft, ghelijck een aernt, ende maeckte dijnen ^a nest tusschen die sterren, Nochtans wil ick v daer af ruysschen, spreeckt die HEERE,

a Nest dat is uwe wooninghe, ende daer ghi v betrouwen op sedt

5

Wanneer dye dieuen ende nachtroouers v oueruielen als ghy sliept so souden si vry stelen, tot dat si ghenoech hadden. Hadden dan dye wijnpluckers v ouerghecomen, so hadden si doch wat ouerblijuinghen laten staen,

6

Maer nv hebben si Esau gansch ende al ondersocht, ende sine verborghen scatten herwaerts wt ghegrauen.

7

Alle dijne eygen getrouste vrienden sullen v ten lande wt drijuen. Die ghene, op den welcken ghi uwen troost sette, die sullen v bedrieghen ende oueruallen, Die v broot

[p. *]

eten sullen v verraden, Ia oock eer ghy dat mercken sult.

8

Wat gheldet? spreect dye HERE, Ic wil ter seluer tijdt dye wijsen tot Edom, tot narren maken, ⁺ ende dye verstandighe op dat geberchte Esau,

+ B vers 8

9

O Theman dijne stercke sullen versaecht zijn, Want si sullen alle op die berghen Esau door den moordt wtgheroeydt worden,

10

Om des ghewelts ende onrechts wille, aen dijnen broeder Iacob bedreuen. Ter seluer tijdt, doen ghi hem wederstont,

11

Doen dye vreemde ende vianden zijn heyr wech voerden, ende die buytenlantsche tot zijn poorten in toghen, ende ouer Ierusalem dat lot worpen, doen waert ghy als der seluer een,

12

daeromme sulstu tot alle schande comen, Iae eewelijck moet ghy wtgheroeyt blijuen.

Ghy en sult uwen lust also nyet meer sien aen dinen broeder inder tijdt zijnder allenden. Ende ghi en sult nyedt meer verblijden, ouer die kinderen Iuda ter tijdt haers iammers,

13

Ghi en sult met dijnen muyl niet meer so vermetelijc spreken, inden dach haers ancxts Ghi en sult in die poorten mijns volcx niedt meer in trecken, inden dach haers ongeuals, Ghi en sult nyet meer sien dinen lust aen haer ongheluc, ter tijt haers iammers,

14

Ghi en sult oock nyet teghen zijn heyr wtseynden, inden daghe zijns ongheuals. Ghy en sult oock niedt meer staen aen die scheydweghen, om zijn ontloopene te vermoorden, Ghy en sult oock sine ouerghebleuene niedt verraden ende gheuanghen nemen ter tijt zijnder benautheyt.

15

Wandt den dach des HEREN is na by ouer alle heydenen ende volckeren, Ghelijc ghi gedaen hebt, also sal v weder gheschieden, ende also ghi verdient hebt Also salt v weder op dinen cop comen.

16

Wandt ghelijckerwijs dat ghi op mijnen heylighen berch gedroncken hebt, Also sullen alle heydenen sonder ophouden drincken, Ia si sullent wt suypen ende verslinden, dattet also gestelt si recht al en waer daer niets niet geweest.

17

Maer op den berch Zyon sullen nochtans sommighe verlost worden, dye sullen een heylichdom zijn

18

Ende dat huys Iacobs sal die besitten, dye haer te voren inghenomen hadden. Ende dat huys Iacobs sal een vier worden, ende dat huys Iosephs een vlamme. Mer dat huys Esaus stroo, ende dat sullen si aensteken, ende verslinden, Also oock, dat den huyse Esaus ghansch nyedt ouerbliuen en sal,

19

Want dye HERE heuet ghesproken.

Ende dye van Zuyden sullen dat ghebercht Esaus innemen, Ende dye Philisteen so wat inden dalen leghet Samaria ende Ephraim sullen dye effene velden besitten, Maer BenIamin den berch Gilead,

20

Ende dat heyr deser voorseyder sal der kinderen Israhels gheuanghen zijn. Ende so wat van Canaan tot Zarphad ende Zepharad toe is, dat sal Hierusalems gheuanghen zijn, Die steden teghen dat Zuyden sullen si nemen.

21

Also sullen die ghene, die op den berch Zion ouerghebleuen zijn, op trecken den berch Esaus te straffen, ende dat coninckrijc sal des HEREN sijn.