Den Bybel met groter neersticheyt ghecorrigeert (Liesveltbijbel 1542)

¶ Hoe dat volc weder ghebracht wordt, Ende hoe die vianden die haer misdaen ende gheschadicht hebben, ghestraft sullen worden.

Dat .iij. Capittel

[p. *]

1

⁺WAnt siet in dyen daghen ende ter seluer tijt als ic die geuanghenisse Iuda ende Hierusalems om keeren sal,

+ A vers 1

2

so wil ic dan alle heydenen tsamen brenghen, ende wilse int dal Iosaphat leyden, ende wil met haer aldaer te recht sitten, van wegen mijns volcx, ende erfdeels Israhel, die si onder die heydenen verstroyt, ende haer in mijn lant gedeelt hebben,

3

Ende dat lot om mijn volc geworpen hebben. Ende hebben die ionghe knechtkens verset, ende om spijse gegeuen, ende die ionghe meyskens om wijn vercocht, ende verdroncken.

4

Ende ghi lieden van ⁺ Sor, ende Zidon, ende alle die lantpalen der Philistijnen, wat hebt ghi met my te doen? Wilt ghi mi torten? Wel aen, In dien ghi my tortet ende vergramt, So wil ict v haest, ende corts weder betalen op uwen cop

+ Sor is Tyrus Ezechii xxvi Amos

5

Want ghi mijn siluer ende ghelt gout, ende mijn schone clenodien ghenomen, ende in uwe kercken gebracht hebt.

6

Daer toe oock die kinderen Ierusalems ende Iuda vercocht hebt den Griecken, op dat ghi haer verre van haren lantpalen soudt brengen.

7

Siet, ic wilse verwecken, wt die plaetse, inder welcker dat ghise vercocht hebt. Ende ic wilt v vergelden op uwen cop.

8

Ende ic wil uwe sonen ende dochteren weder om vercopen, door die kinderen Iuda, die sullense den inwoners van dat rijc Arabia, eenen volc in verren landen vercoopen, Want die HEERE heuet ghesproken

9

⁺Roept dit onder die heydenen wt, seggen si, Heylighet eenen strijt, verwect ende monstert die stercken. Laet herwaerts trecken alle crijschlieden.

+ B vers 9

10

Maect van uwe ploechijsers sweerden, ende van uwe wijngaerts messen seysenen, ende sickelen tot spiessen, ende lancen ysers. Die crancke achte hem stercke,

11

Hoopt v tot rotten, ende coemt herwaerts alle heydenen, rontomme, ende versaemt v Aldaer sal die HERE dijne stercke neder legghen.

12

Maect v op ghi volcken, ende treckt af tot int dal Iosaphat Want aldaer sal ic sitten, om te oordeelen alle heydenen rontomme.

13

Slaet in die seysen ende sickel. Want den oogst is rijpe. Coemt hier af, want dye wijnpersse is al vol, Want hare boosheyt is seer groot.

14

⁺Het sullen hier ende daer hoopen volcx sijn, int seuer dal, Want den dach des HEREN is na by int seuer dal.

+ C vers 14

15

Sonne ende mane sullen verduysteren. Ende dye sterren sullen haer schijn verliesen.

16

Ende de HERE sal van Sion brullen, ende wt Ierusalem sine stemme laten hooren, Also dat hemel ende aerde beuen sullen Mer die HERE sal sinen volcke een toeulucht sijn ende een vasticheyt den kinderen Israels.

17

Ende ghy sultet weten dat ick die HERE uwe God, tot Sion op mijnen heylighen berch woone. Als dan sal Hierusalem heylich sijn. Ende gheen vreemdelinghen en sullen meer door haer wandelen

18

Ter seluer tijt sullen die berghen van soeten wijn druypen, Ende die houelen van melcke vloeyen, Ende alle beken in Iuda sullen vol waters ghaen. Ende daer sal een ^a fonteyn adere wt den huyse des HEREN gaen, die sal den waterstroome Sittim wateren.

a By dese fonteyne, verstaetmen die gratie des heylighen gheests die daer spruyt wt dat woort Goods

19

Mer Egipten moet woest worden, ende Edom een woestijne ende eenlijcke plaetse worden om tghewelt ende onrecht aenden kinderen Iuda bedreuen, ende dat si ontsculdich bloet ghestort hebben in haren lande.

20

Mer daer tegen sal Iuda eewelic bewoont worden, Ende Hierusalem van nv aen, tot inder eewicheyt.

21

Want ic en wil haer bloet onghewroken niet laten. Ende dye HERE sal woonen tot Sion.