Den Bybel met groter neersticheyt ghecorrigeert (Liesveltbijbel 1542)

¶ Hi roept dat volc aen, ende vermaentse tot wederkeeringhe, want hijse ghenadelijcken wil weder ontfanghen.

Dat .xiiij. Capittel

1

⁺† DAeromme bekeert v nv Israel totten HERE dijnen God, Want ghi hebt eenen swaren val ghedaen met dijne sonden, ⁺

+ A vers 1

+ Hiere. xviij. eze xviij Ro. xij heb. xiij

2

Bereedt v met woorden, ende keert weder totten HERE, ende segt tot hem. Vergheeft ons alle onse sonden, ontfanct ons weder goedertierlicken, So willen wi v die stieren onser lippen opofferen.

3

Assur en sal niet meer onse helper sijn, Ende wi en willen ooc niet meer op peerden rijden. Tot die wercken onser handen en willen wi niet meer segghen, Du bist onse God, Want by v vint dat weesken ghenade,

4

In dien si dat deden, So woude ic haer afkeeringhe weder brenghen, ende heelen, Ende haer vrywillich lief hebben, Also dat mijn gramschappe van haer afgekeert worde,

5

Ick woude Israel sijn ghelijc eenen dauwe, Ende hi soude daer bloeyen als een roose, Ende sine wortelen in een slaen, ghelijck eenen Libanus.

6

Sijn ionghe tacken, souden haer breet wtspreyden, Ende alsoo schoon worden als eenen Olijfboom, Ende sinen ruecke souden sijn ghelijck des Libani, Dye ghene die onder sine schaduwe wonen, die sullen weder comen, ⁺ Ende opgaen ghelijc dat coorn, Ende bloeyen als eenen wijnstock. Sijn lof ende prijs soude sijn, als des wijns in Libano.

+ B vers 6

7

Ephraim, wat heb ic voortaen met die Goykens oft beelden te doen? Ick wil v antwoort gheuen, Ic wil een opsien op v hebben, Ick wil v sijn gelijc eenen groenen Cederboom, aen mi sult ghi uwe vruchten vinden.

8

Soo wie dat wijs is, die sal dit verstaen, Ende wie verstandich is, die salt bekennen, Want die weghen des HEREN sijn gerecht, Ende die gherechtighe sullen daer in wandelen, Maer die godloose sullen daer inne struyckelen ende vallen. *