Den Bybel met groter neersticheyt ghecorrigeert (Liesveltbijbel 1542)

¶ Die Prophet bewijst sijn seyndinghe, Hi verwijt haer dat si metten monde God noemen ende aenroepen, Ende metter herten hoereren si na die Afgoden, Ende hoe dat deerste Afgoderije Te weten des calfs wt Israel ghecomen sy.

Dat .viij. Capittel.

1

⁺SEdt den hoorne, die trompette aenden mont, ende blaest op haestelijc, als eenen aernt, totten huyse des HEEREN, Wandt si hebben mijn verbondt ouerghetreden, Ende mijn wedt hebben si ontrouwelijcken ghehandelt,

+ A vers 1

2

Israel roept wel tot my Du bist onse God, wi kennen v,

3

Maer Israel stoot dat goet van hem, Daeromme sal hem die viandt veruolghen.

4

Si hebben Coninghen ingeset, Mer nyet wt my, Si hebben Princen ghemaeckt, Maer si en behaghen mi niet, Haer siluer ende gout hebben si haer tot Beelden ende Godekens ghemaeckt. Daeromme sullen si wtgeroeyt worden.

5

Dijn kalf, O Samaria sal eewich ghenomen worden, Want mijnen grammighen thoorne is aenghegaen teghen v. In hoe vele tijts meent ghi doch dat si ghereynicht ende ghesuuert moghen worden?

6

Want dat kalf is van Israel hier die wercmeester heuet ghemaect, Daeromme en cant gheen God ghesijn, Mer dat kalf Samarie is tot een spinnegewebbe geworden,

7

Si hebben ^a wint ghesaeyt, daerom sullen si ooc eenen draeywint maeyen. Haer zaet en sal niet voortbrenghen, Gheen meel en sal daer af ghemaect worden, Ende oft al wat voortbrochte, so sullent die vianden verteeren ende verslinden.

a wint saeyen, dat is te vergheues arbeyden, met ongeruster conscientien sonder gelooue hope ende liefde

8

Israhel heeft hem verdiept, Daerom is hy onder den heydenen gheworden gelijc een onlustich ende oneerbaer vat.

9

Sindt dat si henen op totten Assyriers sijn ghetogen, soo sijn si wilt gheworden ende schou, Daerom so dient haer die wildernisse, Ephraim heeft boeleerders ghestelt, daerom sijn si onder dye Heydenen verstroyt,

10

daer wil icse vergaderen. ⁺ Binnen een corte tijdt sullen si des lasts der Coninghen ende Princen los worden.

+ B vers 10

11

Ephraim heeft veel outaers gemaect op dat si souden sondighen, om dies wille sijn hem die outaers tot sonden ghecomen,

12

Al scrijf ick haer die menichte mijnder wet, So sullen sijt doch voor een selsaem dinc achten.

13

Ende oft si alle dat vleessche offerden, ende aten, so en sal nochtans die HERE geen behagen daer in hebben, Als hi haerder misdaden ghedenct, Ende haer sonden met straffingen besoect, Israel keert hem weder in Egypten,

14

Hi vergeet dien die hem ghemaect heeft, Hi tymmert veel costelijcker salen, Ende Iuda maect veel stercker steden, Daerom wil ic een vier in hare steden seynden, dwelc haer palleysen verslinden sal.