Den Bybel met groter neersticheyt ghecorrigeert (Liesveltbijbel 1542)

¶ Hi bewijst hier wat dat officie eens propheten si, te weten, Dat woort wt Gods mont ontfangen, die boose van haren boosen wech trecken, ende voor die straffinghe waerschouwen Ende die goede in haerder oprechticheyt te stercken.

Dat .iij. Capttel

1

⁺ENde hi sprack tot mi, Du menscen kint Alle mijne woorden die ick v segge, die aenmerct metten ooren ende metter herten

+ A vers 1

2

ende gaet henen totten gheuangenen dijns volcx, ende predict haer, ⁺ ende spreect tot haer Also spreect die HERE der heyrscaren (si hoorent oft si latent)

+ Psalm. c.xviij Exo. x.

3

Ende eenen wint (oft gheest) hief my op, ende ic hoorde achter mi een gheluyt, ghelijck eender grooter aertbeuinghen. Ghelooft si die heerlijcheyt des HEREN op haerder plaetse,

4

Ende ic hoorde dat ruysschen vanden vloghelen der dieren, dye haer teghen malcanderen sloegen, ende ooc dat ratelen der raders, die seer na by haer waren,

5

ende dat gheruyssche van een groote aertbeuinge. Doen hief mi die wint (oft gheest) op, ende voerde mi wech, ende ic voer daer henen, ende was seer veruaert, Maer dye hant des HEREN hielt mi vast.

6

Ende ic quam totten geuangenen, die aen dwater Chebaer woonden, inden Meye, Ende ic stelde mi bi haer, die daer saten, ende bleef aldaer onder haer, seuen dagen gansch truerichlijc

7

Ende doen die seuen dagen omme waren, ghesciede dat woort des HEREN tot mi, ende sprac. Ghi menscen kint,

8

Ic hebbe v tot eenen ^a wachtere geset, ouer dat huys Israels, Ghi sult wt mijnen monde dat woort hooren, ende haer van mijnen wegen waerschouwen

a Bi die wachters, worden ghefigueert dye apostelen ende predicanten i.timo iij a

9

So wanneer ic den godloosen segge, Ghi moet den doot steruen, ende ghi en waerschouwet hem niet, ende en segget hem niet, op dat die godloose hem van sinen godloosen wege hoede, ende dat hi leuendich bleef, So sal die godloose om sijnder sonden wille steruen, Mer sijn bloet wille ic van dijnre hant eysschen.

10

Ende in dien ghi den godloosen waerschout, ⁺ ende dat hi hem niet en bekeert van sinen godloosen wesen ende wegen, ⁺ Soe sal hi om sijnre sonden wille steruen, Mer ghi hebt v siele verlost

+ B vers 10

+ Actu. x. Iere. iij Hiere, xxiij

11

Ende als een oprechte hem van sijnder gerechticheit keert, ende doet quaet, So sal ic hem laten aenloopen, dat hi moet steruen, Want ghi hem niet gewaerscout en hebt, so sal hi om sijnder sonden wille steruen moeten, ende sijn gherechticheyt, die hi gedaen heeft, dye en sal niet aengesien worden, Maer sijn bloet wil ic van dijnre hant eysschen.

12

Als ghi den gherechtighen waerschouwet, dat hi niet en sondige, ende hi en sondicht ooc niet, So sal hi leuen, Want hi heeft hem ghehoet, ende ghi hebt uwe siele verlost.

13

⁺Ende aldaer quam die hant des HEREN ouer my, ende sprac tot mi, Staet op, ende gaet henen wt int velt aldaer wil ic met v spreken.

+ C vers 13

14

Ende ic stont, ende ghinc henen wt int veldt. Ende siet, doen stont die heerlicheit des HEREN daer ghelijck icse ghesien hadde aen dwater Chebaer. Ende ic viel neder op mijn aensichte,

15

ende ic wert vertroost, ende ghinck op mijne voeten. Ende hi sprac met mi, ende seyde tot mi. Gaet henen ende besluyt v in dijnen huyse

16

⁺Ende ghi menscen kint, Siet, men sal v stricken (oft banden) aendoen, ende v daer mede binden, also dat ghi haer niet ontgaen en sult.

+ D vers 16

17

Ende ic wil v die tonge aen dijnen rake doen cleuen, dat ghi stomme sijn sult, ende haer niet meer en sult mogen straffen, Want het is een ongehoorsaem volc,

18

Maer als ic met v spreken sal, dan sal ic v den mont op doen, dat ghy tot haer seggen sult, Also spreect die HERE der heyrscaren, Diet hooren wille die hooret, diet laet, die latet Want het is een onghehoorsaem volc.