Den Bybel met groter neersticheyt ghecorrigeert (Liesveltbijbel 1542)

[p. *]

¶ Die Propheet Hezekiel

[afbeelding]

¶ God die HERE verthoont den prophete in een gesichte sijn maiesteyt, voorsichticheyt, wijsheyt, ende macht.

Dat .I. Capittel.

1

⁺INden dertichsten iare opten vijfsten dach der vierder maent, doen ick onder die gheuanghenen aen dat water Chebar was deden haer ^a die hemelen op, ende God toonde mi een gesichte (oft visioen(

+ A vers 1

a Die hemelen opghedaen sijn, dat is, dat die godlicke maiesteit door visioenen haer den mensche openbaert mat. iij.d mar. i.b. act. vij.g ghelijck ooc den derden hemel daer Paulus hoorde dye verborgentheit Goods. Cor. xiij.a.

2

Den seluen vijfsten dach der maent was effen inden vijfsten iare, nae dien dat Ioakim die Coninck Iuda was geuangen wech gheuoert

3

Doen geschiede dat woort des HEREN tot Hezekiel den sone Busi des priesters inden lande der Chaldeen by dat water Chebar, aldaer quam die hant des HEREN ouer hem.

[afbeelding]

4

Ende ic sach, ende siet, Daer quam eenen ancxtelijcken wint van Tnoorden herwaerts met een groote wolcke vol viers, dattet ouer al rontsomme blincte Ende midden in dat selue vier was een ganssche claerheyt

5

ende daer in was een ghedaente, gelijc vier dieren, ende onder eens yegelijcx gesteltenisse gelijc een mensce,

6

Ende si hadden vier aensichten, ende vier vlogelen,

7

Ende hare beenen stonden stracx, mer haer voeten waren als osscen voeten, ende si blincten gelijc een claer metael

8

Ende si hadden menschen handen onder haer vlogelen, Want si hadden vier aensichten ende vier vlogelen.

9

Ende die selue vlogelen waren deen aenden anderen Ende als si ghinghen, so en ghinghen si van malcanderen niet, Mer so waer dat si ginghen, so ghinghen si stracx voor haer

10

Haer aensichten ter rechter siden waren gelijc eenen mensche ende leeuwe, Maer ter slincker siden waren hare aensichten gelijc een ossche, ende arent,

11

Ende haer aensichten ende vlogelen waren bouen gedeelt, dat altoos twee vlogelen tsamen sloegen, ende met twee vlogelen haer lichaem bedecten,

12

So werwaerts dat si ginghen daer ghingen si stracx voor haer henen, Ende si gingen so werwaerts dat die wint stont, Ende si en ghingen niet van malcanderen, als si gingen.

13

Ende die dieren waren aen te sien, gelijc vierige colen, die daer bernen, Ende tusschen den dieren een claerheyt ghelijck als fackelen, ⁺ Ende dat vier gaf een claerheyt van hem, ende wt den viere ghinc eenen blixem

+ B vers 13

14

Mer die dieren liepen herwaerts ende ghints, gelijc als eenen blixem.

15

Als ic die dieren alsoo sach, Siet, doen stont daer een radt (oft wiel) op der aerden bi den vier dieren, Ende het was aen te sien gelijc vier raderen,

16

Ende die selue raders waren gelijc een Turkoys, Ende si waren alle viere deen gelijc dandere. Ende si waren aen te sien, recht oft deen radt waer gewest in dandere.

17

So wanneer een onder haer ginc, so gingen si alle viere, ende si en gingen niet van malcanderen, Ende haer velgen (oft canten) ende hoochten waren veruaerliken,

18

Ende hare velghen waren vol ooghen, rontommt, aen alle die vier raderen.

19

Ende als die dieren gingen, so gingen die raders ooc neffens haer, Ende als die dieren haer vander aerden opwaerts hieuen, soo hieuen haer die raders oock opwaerts,

20

waer die wint henen ghinc, daer ghinghen si ooc henen, Ende die raderen hieuen haer neffens haer opwaerts, Want daer was eenen stercken wint inden raderen,

21

Als si ghingen, so ghinghen dese oock als si stonden so stonden dese oock Ende als si haer opwaerts hieuen vander aerden, so hieuen haer oock die raders neffens haer opwaerts, Want daer was eenen stercken wint in die raderen

22

⁺Maer bouen onder die dieren, wast gestelt, gelijc die hemel, als een Cristal schrickelijcken, recht bouen ouer haer wtgebrect, dat onder den hemel haer vlogelen, deen stracx tegen den anderen stont

+ C vers 22

23

Ende die twee vlogelen bedecten eens yegelijc lichaem,

24

Ende ick hoorde die vlogelen ruysschen gelijc groote wateren, ende gelijc een geluyt des Almachtigen, als si ghinghen Ende gelijc een ghedruyssche in een heyre, Maer als si stil stonden, so lieten si die vlogelen neder,

25

Ende als si stil stonden, ende haer vlogelen neder lieten, so donderdet inden hemel bouen ouer haer.

26

Ende ouer den hemel, die bouen haer was, wast gestelt gelijc een Saphir, gelijc eenen stoele, Ende opten seluen stoele sadt eene, gelijc als een mensche gestelt,

27

Ende ic sach hem aen, ende hi was ghestelt, ghelijck als een claer licht, Ende inwendich wast ghestelt, ghelijck een vier rontsomme, van sinen lendenen ouer hem, ende onder hem, doen sach ickt, ghelijc vier blincken rontsomme, ghelijc als den regenboghe siet inden wolcken, alst ghereghent heeft,

[p. *]

alsoo blinctet rontsomme. Dit was dat aensien der heerlicheyt des HEREN. Ende doen ict hadde gesien, so viel ic op mijn aensichte, ende hoorde een sprake