Den Bybel met groter neersticheyt ghecorrigeert (Liesveltbijbel 1542)

Eenen troost totten volcke, van des goedertierenheyts weghen die haer God loonen sal, Ende van die roepinge der Heydenen.

Dat .v. Capittel.

1

O Hierusalem siet rontsomme v totten opganc der sonnen, ende siet dye vruechde die v van God coemt.

2

⁺Siet dijne sonen, die ghi verlaten hebt, ende verstroyt sijn, die comen verghadert vanden opganc ende nederganc der sonnen, die haer inden woorde des heylighen Gods te eeren verblijen.

+ A vers 2

3

Treckt af, O Hierusalem dat truercleet, dat ghi in dinen iammer aengehadt hebt, ende trect aen tchieraet, ende eere die v van Gode tot een eewighe heerlicheydt ontmoet,

4

God sal v metten mantel der gherechticheit cleeden, ende een croone der eewiger eeren sal hy v op dijn hooft setten,

5

Want God sal sijn claerheyt v verthoonen, die onder den hemel is.

6

Eenen eewighen name sal v God op setten, vrede der gerechticheyt ende eere der vreesen Gods.

7

Staet op Hierusalem, ende stelt v op die hoochte, Siet om tegen den oosten, ende siet dijne kinderen versaemt, ⁺ vanden opganc totten nederganc der sonnen, die haer inden heylighen woorde verblijden, als si Gods ghedachtich sijn,

+ B vers 7

8

Si trecken te voete van v geuangen, vanden vianden geleyt. Nv brengtse die HERE gedragen met eeren, als kinderen des rijcx betaemt.

9

Want God heeft voor hem genomen alle hooge bergen te vernederen, die hooge steenrootsen, ende die dalen (die eewelijcken meenden te blijuen) dat aertrijcke effen ende gelijc te maken, op dat Israel sekerlick (ende sonder sorge) woonen mach Gode te eeren

10

Alle Bosschagien ende lustige boomen sullen Israhel omschaduwen, ende dat wt beuel des HEREN,

11

Want God sal Israel veruoeren met genuechten ende vruechden, inden schijn ende claerheyt sijnder maiesteyt, met bermherticheit ende gherechticheyt, die welcke wt hem is.