Den Bybel met groter neersticheyt ghecorrigeert (Liesveltbijbel 1542)

Dat .ij. Capittel

1

Aleph. ACh hoe heeft die HERE die dochter Sion so met gramscappe ouerstroeyt. Hi heeft die heerlicheyt Israels vanden hemel af ter aerden gheworpen, hy en heeft inden dage sijns thoorns niet gedachtich geweest op sine voetbancke.

2

Beth. Die HERE heeft alle die woningen Iacobs sonder bermherticheit verdoruen, hi heeft die vesten der dochter Iuda afgebroken in sinen thoorne, ende ter aerden gesticht. Hi heuet ontwijdet beyde haer conincrijcken ende hare princen.

3

Gimel Hi heeft die stercte Israels in sinen grammigen thoorne in stuckens ghebroken. Hi heeft sijn rechterhant achter hem getogen, als die vyanden aen quamen. Ende hi heeft in Iacob een vier aengestooct, dwelcke rontomme al verteert.

4

Dalech Hi heeft sinen boge gespannen als een viant, sine rechterhant heeft hi gesterct als een tegenpaertijder, ende hi heeftet al verslagen, dat lustich omte aensien was Ende sinen thoorne heeft hi in die tenten Iacobs wtgegoten. Ende hi heeft sinen thoorne gelijc een vier wtgestort, inder wooningen der dochteren Sion.

5

He Die HERE is geworden als een vyant. Hi heeft Israel vernielt, hi heeft verderft alle haer palleysen, ende heeft alle sine stercke vlecken verwoest. Hi heeft der dochtere Iuda veel leets ende verdriets aenghedaen.

6

Vau Hi heeft sine hutten oft boeyen omgewoelt, gelijc eenen hof, ende sijn wooninghe verdoruen. Dye HERE heeft tot Sion beyde die Vierdagen, ende Sabbathen, in die vergetenisse gebracht. Ende in sinen fellen thoorne beyde Coninghen ende Priesteren te schande laten comen.

7

Sdain Die HERE heeft sinen outaer omgeworpen, ende heeft sijn heylichdom verbannen. Hi heeft die mueren haerder palleysen inder vianden handen gegeuen, also dat si inden huyse des HEREN gecrijst hebben, alsmen op eenen Vierdach plach.

8

Heth Die HERE heeft voorgenomen te verderuen die mueren der dochter Sion. ⁺ Hy heeft dat ^a richtsnoer daer ouer getogen, ende hi en heuet sijn hant niet wtgetogen ter tijt dat hijse verdoe Daeromme staen die voorbolwercken clagelijcken, ende die mueren leget iammerliken.

+ C vers 8

a Dat richtsnoer daer ouertrecken, dat is geheelic verderuen, ende te niete doen, of sulcx voornemen te doen. ij.regum viij.a

9

Theth Hare poorten liggen diep inder aerden. Hi heeft haer grendelen ghebroken, ende te niet gemaect, hare coningen ende princen sijn onder die heydenen, daer si dat geset niet en connen geoeffenen. Ende haer propheten en hebben gheen gesicht vanden HERE.

10

Iod Die Outste der dochter Sion, sitten opter aerden al swighende. Sy werpen stof op haer hoofden, ende hebben sacken aen getogen. Die dochteren Sions laten haer hoofden ter aerden hangen.

11

Caph Ic heb schier mijn ooghen wt gheweent, dat my mijnen buyck daer van wee doet. Mijn leuer is opter aerden wt gheschudt, ouer die dochter mijns volcx doen die suygelinghen ende onmondige kinderen opter straten, inder stadt versmachten.

12

Lamed. Doen si tot haren moederen spraken, Waer is spijs oft dranc? doen si opter straten inder stadt versmachten, gelijc als die dootlijcke gewonde ende gauen den geest op inden armen haerder moederen.

13

Mem Och dochter Iherusalem wien sal ick v gelijcken? ende waer voor sal ic v houden? O ioncfrouwe dochter Syon wien sal ic v gelijcken: daer mede ic v troosten mochte? Want dine schade is bouen maten groot. Wie can v geheelen?

14

Nim Die Propheten hebben v ydele ende sotte visioenen gepredict, ende en hebben di dijne ouertredinge niet geopenbaert, daer mede si dine geuangenissen gekeert hadden. Mer si hebben v ydele sermonen gepredict, waer mede si v henen ten lande wt preeckten.

15

Samech Alle dye v voorbi gaen, slaen die handen tsamen, pijpen v aen, ende scudden die hoofden ouer die dochter Hierusalem seggende, Is dat die stadt, waer af men seyde, dat si ware die alderscoonste? waer af haer dat ganssche

[p. *]

lant verblijde?

16

Ain. Alle dijne vianden sperren haren muyl op teghen v, pijpen v aen, ende laten haer tanden sien segghende. Ehe. Wi hebbense vernielt, dit is den dach dien wi hebben begeert, Wi hebbent vercregen, Wi hebbent beleeft.

17

Pe. Die HERE heuet volbracht, dat hi voor hem ghenomen hadde, Hy heeft sijn woort veruult, dat hi voor langhe tijt gheboden hadde, Hi heeft sonder bermherticheyt verdestrueert, Hy heeft den viant ouer v verblijt, ende dat ghewelt dijner vyanden verheuen.

18

Zade. Laet dijn herte tot den HERE roepen, O du muere der dochter Zion, laet dach ende nacht tranen hier af vlieten gelijc een beke, ende en hout ooc niet op. Ende dijnen ooghen appel en laet oock nyet af.

19

Cof. Staet des nachts op ende roept. Schuddet dijn herte wt inder eerster wake teghen den HERE gelijc als water. Heft dijne handen teghen hem op, om dleuen wille dijner ionger kinderen, die van hongher steruen op alle straten.

20

Res. O HEERE aenschout ende siet doch dien ghi also verderft hebt, Sullen dan die wijuen haers lijfs vruchten eten? dye ionghe kinderkens eender spannen lanck? Sullen dan die Propheten ende Priesters in dat Heylichdom des HEREN so vermoort worden?

21

Sichin. Ionghen ende ouden ligghen inder straten opter aerden, Mijne ionghe maechden ende iongelinghen sijn metten sweerde verslaghen, dye ghy inden dach dijns grooten thoorns verslaghen hebst, Ghi hebtse sonder alle barmherticheyt gheslagen.

22

Tau Du hadtst mijnen vianden rontomme gheroepen, als op een hoochtijt, alsoo dat opten dach dijns toorns niemant ontloopen noch ouerghebleuen is, Die ick ghehouden ende opgheuoet hebbe, die heeft die viant verslonden.