Den Bybel met groter neersticheyt ghecorrigeert (Liesveltbijbel 1542)

¶ Sedekias seyndt tot Hieremiam, om voor hem te bidden Pharao treckt wt Egypten den coninck te helpen, Maer te vergheefs.

Dat .xxxvij. Capittel.

1

⁺ENde Zedekias die sone Iosie werdt coninck in dye plaetse Iechanie, des soons Ioakim, want NebucadNezar dye Babyloonsche coninc maect hem coninck inden lande Iuda.

+ A vers 1

2

Mer hi ende sine knechten, ende dat volc inden lande, en waren nyedt ghehoorsaem den woorden des HEREN, die hi door den Propheet Hieremiam sprack.

3

Dies niet te min so seynde dye coninck Zedekias Iuchal den sone Selemia, ende Zephania, den sone Maasie, den priester totten prophete Hieremiam, ende dede hem segghen, bidt doch den HEERE onsen God voor ons,

4

Want Hieremias ghinck doen vry wt ende in, onder den volcke, ende nyemant en vinck hem. Doen was dat heyr Pharao wt Egypten getoghen, Ende doen die Chaldeen die voor Hierusalem lagen, dat vernamen, so togen si van Hierusalem af.

5

⁺Ende dat woordt des HEREN gheschiede totten propheet Hieremiam, ende seyde.

+ B vers 5

6

Also spreeckt die HERE Israels God, Segt den coninck Iuda also, dye v tot mi ghesonden heeft, om mi te vraghen, om raet Siet dat heyr Pharao, dat om v te helpen wt is ghetoghen, dat sal wederom in Egipten trecken,

7

Ende dye Chaldeen sullen wederom comen, ende dese stadt bestrijden, ende winnen, ende metten viere verbernen.

8

Daerom spreeckt dye HERE also. En bedriecht v sielen nyet also dat ghi denckt, Die Chaldeen sullen van ons af trecken, ⁺ si en sullen nyet aftrecken.

+ iiij.Reg xxiiij

9

Ende oft ghi al dat gansche heyr der Chaldeen versloecht, dye tegen v strijden, ende datter sommige ghewonde ouerbleuen, so sullen si nochtans een yegelick in zijnder tenten (oft boeyen) haer op maken, ende dese stadt metten viere verbernen.

10

Als nv dat Chaldeesche heyr van Hierusalem was afgetogen, ⁺ om Pharaonis heyr wille,

+ C vers 10

11

so ghinck Hieremias wt Hierusalem, ende woude int lant BenIamin gaen, om aldaer onder den volcke wat te beschicken vanden ackeren.

12

Als hi nv onder der poorten der BenIamiten quam, daer was gestelt een poortwachter gheheeten Ieria, dye sone Selemia, des soons Hanania, Die selue greep Hieremiam den prophete, ende sprack ghy sult totten Chaldeen vallen.

13

Hieremias seyde, dat en is niet waer, Ick en wil totten Chaldeen niet vallen. Maer Ieria en woude hem niet hooren, mer hi vinck hem, ende bracht hem totten vorsten.

14

Ende die vorsten werden toornich op Hieremiam, ende si deden hem slaen, ende werpen in een gheuangenisse inden huyse Ionathan des scrijuers, Ende si stelden den seluen tot eenen kercker meester.

15

Also ghinck Hieremias inden cuyle ende kercker, ende lach aldaer eenen langhen tijt.

16

Ende Zedekias die coninck sandt henen, ende liet hem halen, Ende vraechde hem heymelick in sinen huyse, ende sprack, ⁺ isser ooc eenich woort nv vanden HERE? Hieremias sprack, ia, Wandt ghi sult den coninc tot Babel inden handen gegeuen worden.

Ende Hieremias sprack totten coninck Zedekiam

+ D vers 16

17

Wat heb ic tegen v, ende tegen v knechten, ende tegen dit volck ghesondicht? dat si mi inden kercker geworpen hebben?

18

Waer sijn nv uwe propheten, dye v predicten, ende seyden? Die Babiloonsche coninck en sal nyet teghen v ende dit lant comen?

19

Ende nv mijn heer coninc hoort my, ende laet mijn bede wat voor v ghelden, Ende en laet my nyedt weder in Ionathans des scrijuers huys brenghen, op dat ic aldaer niet en sterue.

20

Doen beual die coninck Zedekias, datmen Hieremiam inden voorhof vander gheuanghenissen doen soude, Ende dede hem alle dage eenen cant broots gheuen wt der backers strate, tot dat al tbroot inder stadt op was, Alsoo bleef Hieremias inden voorhof des geuangenissen.