Den Bybel met groter neersticheyt ghecorrigeert (Liesveltbijbel 1542)

¶ Die propheet seyt den coninck Sedekie wt Gods beuele, wat ongheluc hem ouer comen sal, ende den volcke voorseyt hy haer straffinghe, dye haer God seynden sal, om dat si dat verbont ghebroken hebben.

Dat .xxxiiij. Capittel.

1

⁺DIt is dat woordt, dat vanden HERE gheschiede tot Hieremiam, doen NebucadNesar die coninck tot Babilonien, met alle sinen heyr, ende alle coninckrijcken opter aerden, dye onder zijn gewout waren, ende alle volcken teghen Hierusalem streden ende alle haer steden, ende sprac. Also spreect die HE-

+ A vers 1

[p. *]

RE God Israels. Gaet henen ende segt Zedekia, den coninck Iuda, ende segt tot hem. Alsoo seyt die HERE Siet, ick wil dese stadt in die handen des conincx tot Babel gheuen, ende hi salse metten vier verbernen,

2

ende ghy en sult sijnder hant nyet ontloopen, mer geuanghen worden, ende in sine handen ghegeuen worden, also dat ghi hem met ooghen aensien, ende mondelick met hem spreken sult, ende tot Babel comen.

3

Daerom hoort doch Zedekia, ghi coninck Iuda des HEREN woort, Alsoo seyt die HERE van v, Ghi en sult door tsweert niet steruen, maer in vrede sult ghi steruen,

4

Ende gelijc alsmen dijne vooruaders die voorleden coninghen die voor v gheweest sijn, verbernt heeft, Also salmen v oock verbernen, ende beweenen. Ach HEERE, want ick hebt ghesproken, seyt die HERE,

5

ende die propheet Hieremias sprack alle dese woorden tot Zedekiam den coninck Iuda, ende Hierusalem,

6

doen dat heyr des Conincx tot Babel nv voor Hierusalem lach, ende oock voor alle ouer ghebleuen steden Iuda, te weten Lachis ende Aseka, Want dese waren als die stercste steden noch ouerghebleuen onder die steden Iuda.

7

⁺Dit is dat woort dat vanden HERE gheschiede tot Hieremiam, na dien dat die coninck Zedekias een verbondt ghemaect hadde metten gansschen volcke tot Hierusalem, Een vry iaer wt te roepen,

+ B vers 7

8

Dat een yeghelijc sinen knecht, ende een yeghelijc sijn maecht, die Hebreen ende Hebreinnen waren, souden vry laten, also dat gheen Ioden sinen broeder voor lijfeyghen oft een slaue en souden houden.

9

Dat consenteerden ooc alle Vorsten ende alle tvolck, die sulcken verbondt aen ghenomen hadden, dat een yeghelijck sinen knecht ende sijn dienstmaecht vryheydt soude gheuen, ende haer niet meer en souden voor lijfeygen houden, Ende si lietense los,

10

Maer daer nae beroudet haer, ende begheerden die knechten ende maechden weder tot haer welcke si vry ghelaten hadden, ende dwonghense weder eygen knechten ende maechden te worden.

11

Doen gheschiede des HEREN woort tot Hieremiam vanden HERE, ende sprack, also spreect dye HERE, die God Israels. Ick hebbe een verbondt ghemaect met uwen vooruaderen, doen icse wt Egipten lant, wt den diensthuyse leyde, ende sprack,

12

Wanneer dat seuen iaer omme sijn, so sal een yeghelijck sinen broeder die een Hebreeusche is, ende dye hem selfs hem vercocht, ende ses iaer ghedient hadden, vry van hem laten. Maer uwe vaders en hoorden mi niet, noch en waren mi niet gehoorsaem.

13

Alsoo hebt ghi v huyden oock bekeert, ende ghedaen, dat mi wel behaecht, Dat ghi een vry iaer liet wt roepen, een yegelijc sinen naesten, Ende ghi hebt dies een verbondt ghemaect voor mi inden huyse, dat nae mijnen name ghenoemt is,

14

Maer ghi hebt v omghekeert, ende ontheylicht mijnen name, Ende een yeghelijc eyscht sinen knecht, ende sijne dienstmaghet weder, die welcke ghi hadt vry gelaten dat si haers selfs souden sijn, Ende dwingtse nv weder dat si uwe knechten ende maechden sijn moeten.

15

⁺Daeromme seyt die HERE also. Ghi en sijt mi niet ghehoorsaem, also dat ghi een vry iaer wt riept, een yegelijc sinen broeder ende sinen naesten, siet daeromme roep ick v een vry iaer wt, seydt die HEERE totten sweerde hongere, ende pestilencie, ende ic en wil v in gheen conincrijcke op aerden laten blijuen,

+ C vers 15

16

Ende ic wil die lieden die mijn verbont ouertreden, ende die woorden des verbonts die si voor mi ghemaect hebben, niet en houden, also maken, ghelijc als dat Kalf, dat si in twee stucken deelden, ende tusschen dye deelen henen doorghinghen,

17

te weten, die Vorsten Iuda, die princen Ierusalem, die Camerlinghen, die Priesters ende dat gheheele volc inden lande, die tusschen die stucken des Calfs doorghegaen sijn,

18

Ende ic wilse gheuen in die handen haerder vianden, ende der gheenre die na haren leuen staen, also ooc dat hare doode lichamen sullen den vogelen onder den hemel gegeuen worden, ende den dieren opter aerden, tot eender spijsen.

19

Ende ic wil Sedekiam den coninc Iuda ende sine Vorsten gheuen in die handen haerder vyanden, ende der gheenre, die haer na haren leuen staen, ende den heyre des conincx tot Babel, die nv van v af ghetoghen sijn,

20

Want siet, ic wil haer beuelen, seyt die HERE, ende ic wilse weder voor dese stadt brengen, ende sullen tegen haer strijden, ende haer winnen, ende metten viere verbernen. Ende ick wil die steden Iuda verwoesten, datter ooc nyemant meer woonen en sal.