Den Bybel met groter neersticheyt ghecorrigeert (Liesveltbijbel 1542)

God dye HERE beueelt den prophete eenen halsbandt te maken met den welcken hi den Heydenschen coninghen haer geuangenissen soude bewijsen, ende te verstaen gheuen.

Dat .xxvij. Capittel.

1

⁺INden beghinne des coninckrijckx Iehoiakim, des soons Iosia, des Coninckx Iuda, so gheschieden dese woorden vanden HERE, tot Hieremiam, ende sprack

+ A vers 1

2

Also seyt dye HERE tot my, Maeckt v banden (oft ketenen) ende hanghet die aen dijnen hals

3

ende seyndtse den Coninck in Edom, den Coninck in Moab, den Coninck der kinderen Ammon, den Coninck Tyri, ende den Coninck Sydons, door die Ambassaten, dye tot Sedekiam den Coninck Iuda tot Ierusalem gecomen zijn,

4

ende beueelt haer, dat si haren Heeren segghen. Also spreect dye HEERE

[p. *]

der heyrscaren, God Israhels. Aldus sult ghy uwen Heeren segghen,

5

Ic ben dye dat aertrijcke gemaect hebbe, die menschen, dye beesten, dye opten aertbodem sijn, door mijne grote cracht, ende wtgestrecten arme Ende ic hebt ghegeuen, dyent mi belieft heeft.

6

Nv heb ick alle dese landen ouer ghegeuen in dye handen mijns knechts NebucadNezars, des Babyloonschen coninckx. Ende ic hebbe hem oock die wilde dieren opten velde ghegheuen tot sinen dienste.

7

Ende alle volcken sullen hem dienen, ende sinen sone, ende zijns kints kinderen, tot des seluen landts tijdt oock coemt. Ia hem sullen veel volcken, ende grote coninghen dienen.

8

Maer so wat volck ende coninckrijck den Babiloonschen coninck NebucadNezar niet dienen en wil. Ende so wye sinen hals nyedt gheuen en wil onder dat iock, des coninckx tot Babel, die selue wil ick besoecken, metten sweerde, hongher, ende pestilencie, seyde dye HEERE, tot dat icse door sine handt te nyet make.

9

⁺Daeromme en hoort niet na uwe propheten (oft waersegghers) Droombedieders, dachuerkiesers, ende toeuenaers, die v seggen. Ghi en sult den Babilonischen coninc nyet dienen.

+ B vers 9

10

Want si seggen v luegenen, op dat ic v verre wt uwen lande brenge, ende dat ick v verdriue, ende verniele.

11

Want so wat volc dat sinen hals gheuet onder dat iock des Babilonischen conincx, ende hem dient, dat wil ick in sinen lande laten, seydt dye HERE, dattet aldaer timmere ende woone.

12

Ende ic sprac alsulcx tot Zedekiam den coninck Iuda, ende sprack. Geeft uwen hals onder dat iock des coninkcx tot Babel, ende dient hem ende sinen volcke, so sult ghi leuendich blijuen.

13

Waeromme wilt ghi steruen? ghy ende dijn volck door tsweert, honghere, ende pestilencie ghelijck dan dye HERE voorghenomen heeft ouer dat volck dye den coninck tot Babilonien nyet en willen diene.

14

Daeromme en gheeft den Propheten gheen gehoor, dye v seggen. Ghi en sult nyedt moeten dienen den coninc tot Babel. Want si propheteren v valscheyt. ⁺

+ ij.Regum. xxiij. eze. xiiij

15

Ende ick en hebse nyet gesonden Mer si prediken valschelijck in mijnen name, op dat ick v dyes te eer wt drijue, ende dat ghi tsamen metten propheten die v prediken moecht vergaen.

16

Ende totten priesteren ende tot allen desen volcke seyde ic, ende sprac. ⁺ Aldus spreect die HERE. En hoort die woorden uwer propheten niet dye v prediken, ende seggen Siet dye vaten des huys des HEREN, sullen nv haest weder van Babylonien ghebracht werden.

+ C vers 16

17

Want si propheteren v valschelijcken En hoort haer nyedt, Maer dyent den coninck tot Babel, soo sult ghy leuendich blijuen. Waeromme wilt ghy doch dese stadt laten verderuen?

18

Maer zijn si ghewarighe propheten, ende hebben si des HEEREN woordt, so laet haer den HERE der heyrscaren bidden, dat die ouerghebleuene vaten inden huy des HEEREN, ende inden huyse des Coninckx Iuda ende tot Hierusalem oock nyet tot Babilonien geuoert en worden.

19

Wandt also seydt dye HERE der heyrscharen, vanden calomnen, vander zee, ende vanden ghestoelte, ende vanden vaten dye noch ouerghebleuen sijn in deser stadt

20

Dye welcke NebucadNezar dye Babilonische coninck nyet wech en nam, doen hy Iechoniam den sone Ioiakim des Coninckx Iuda van Ierusalem wech voerde gheuanghen tot Babel met alle den vorsten in Iuda ende Hierusalem.

21

Wandt aldus spreekt dye HEERE der heyrscharen, dye God Is-rahels, vanden vaten dye noch ouerghebleuen sijn inden huyse des HEEREN, ende inden huyse des Coninckx Iuda, ende Hierusalem.

22

Sy sullen te Babilonien gheuoerdt worden, ende aldaer blijuen, tot op den dach toe, dat ickse versoecken sal, seydt dye HEERE, Ende dan wil icse weder op deser plaetsen brenghen. Ende dyt is gheschyet inden seluen iaer int beghinne des coninckx Zedechie, des Coninckx Iuda.