Den Bybel met groter neersticheyt ghecorrigeert (Liesveltbijbel 1542)

¶ God die HERE bekijft door den prophete den godloose ouerheeren des volcx, ende desgelijcx ooc die valsche propheten

Dat .xxiij. Capittel.

1

⁺WEe v ghi Herders dye mijn cudde verstroyt ende te niete brengheste seydt die HERE, ⁺

+ A vers 1

+ ez xxxiij. zacha. x Ioan. x. act. xx.

2

Daeromme spreect dye HERE, God Israhels vanden Herderen, die mijn volck weyden (oft regeren) Ghi hebt mijn cudde verstroyt ende verstooten, ende haerder geen acht gehadt, Siet, Ic wil v besoecken om uwe boose voornemen wille, spreect die HERE,

3

Ende ick wil die ^a ouergebleuene van mijnder cudden bi een verghaderen wt alle landen derwaerts icse verstooten hebbe Ende ic wilse weder brengen tot haren koyen (oft weyden) op dat si mogen wassen ende haer vermenichfuldighen.

a Ouergebleuene, dat sijn dye wtuercorene, om des wille datse een cleyn ghetal sijn esa. x.e. mat xxv

4

Ende ick wil herders ouer haer setten dyese weyden sullen, Si en sullen voortaen haer niet meer verscricken, noch vreesen. Want haer gheene schade gedaen en sal worden, spreeckt die HERE.

5

† Siet, die tijt coemt, spreect die HERE, dat ic die gerechte plante Dauids verwecken wil ende die sal een coninc sijn, die wijsselijck regeren sal, Ende hy sal dat gericht, oft oordeel, ende die gerechticheydt weder oprechten inder aerden,

6

⁺Inder tijt van desen sal Iuda geholpen worden, ende Israel sal onuersaecht woonen Ende dit sal sinen name sijn daermen hem mede noemen sal. Die HERE die ons oprecht maeckt

+ B vers 6

7

Daeromme siet, die tijt sal comen seyt die HERE, datmen niet meer seggen en sal. So waerlic als die HERE leeft, die de kinderen Israels wt Egipten geleyt heeft,

8

Maer so warachtelic als die HERE leeft, die dat zaet des huys Israels wt heeft geleyt, ⁺ ende gebracht heeft wt den lande van Noorden, ende wt allen landen, derwaerts icse verstooten hadde, op dat si weder in haren lande woonen souden. *

+ C vers 8

9

Wee oock den propheten, Mijn herte wil my in mijnen liue breken. Alle mijne gebeenten beuen mi Mi is recht als eenen dronckenen mensche, die vanden wine suyselt, oft onrustich is, voor den HERE, ende van sinen heyligen woorde,

10

Om dattet lant so vol ouerspeelders is, ende dattet so iammerlijcken verdoruen ende veruloect is. Ende dat die lustige beemden inder wildernissen, soo verdorret sijn Want den lope oft leuen, des menschen is boosch. Ende haer ver-

[p. *]

mogen is den heylighen woorde des HEREN ongelijck.

11

Want beyde die Propheten ende priesters sijn beulect ende geueysde de heyligen. Ende haer schalcheydt hebbe ic in mijnen huyse gehouden, seyt die HERE

12

Daeromme is haer haren wech tot eenen aenstoot inder duysternissen, daer si haer aen stooten ende vallen sullen. Want ic wil een ongeluc ouer haer laten comen, dat iaer haerder besoeckinghe, spreeckt die HERE

13

Effen die dwaesheyt die ick gesien hebbe bi den propheten Samarie, dat si door Baal predicten, ende mijn volc Israels verleyden,

14

die hebbe ic ooc gesien bi den propheten Hierusalem, hoe si ouerspel doen ende stoutelijcken lieghen. Ende si stercken die boosachtige, op datter ymmer niemant hem en bekeere van sijnder boosheydt. Si sijn alle voor mi ghelijck als Sodoma, ende haer inwoonders ghelijck Gomorra.

15

Daeromme seghet die HEERE der heyrscharen vanden propheten also, Siet ic wilse met alsene spijsen, ende met water dat met galle gemenget is lauen, Want vanden propheten tot Hierusalem, is die siecte der geueystheyt gecomen in dat ganssce lant

16

Also spreeckt die HERE der heyrscharen. En geeft den propheten die v prediken gheen ghehoor, want si bedriegen v Si prediken haers herten goet duncken, ende niet wt den monde des HEREN.

17

Sy segghen tot dyen die mi verachten. Die HERE heuet gesproken, Het sal v wel ghaen, Ende allen dye na haers herten begeerten wandelen, seggen si, V en sal geen ongeluc weercomen

18

Want wie heeft inden raedt des HEEREN gheseten? die sijn opset ghehoort ende verstaen hebbe? Wye heeft sijn woordt gemerct ende gehoort.

19

⁺Siet, Een rou weder des HEEREN sal met grammen thoorne wtghaen, ende een veruaerlijck onweder sal den godloosen op den cop vallen, ende ter neder slaen.

+ D vers 19

20

Ende den thoorne des HEREN en sal ooc niet weder keeren, voor dat hijt doe ende volbrenghe dat hi inden sinne heeft. Mer namaels sult ghijt wel ghewaer worden,

21

Ick en hebbe dese propheten niet gesonden, nochtans so liepen si. Ick en hebbe tot haer niet ghesproken, nochtans soo propheteerden si.

22

Want in dien si bi mijnen raet gebleuen hadden, ende hadden mijnen volcke mijn woort gepredict, so hadden si die selue van haren boosen wegen, ende van haren boosen leuen gekeert.

23

Ben ic dan een God die alleen dat na bi siet: ende dat verre niet? spreeckt die HEERE,

24

meynstu dat hem yemant so heymelijc verborgen can, dat ick hem niet en sie? spreect die HERE. Ben ict niet die daer veruulle den hemele ende dat aertrijcke? spreeckt dye HERE.

25

Ick hebbe wel gehoort wat die Propheten seggen, dye in mijnen name loghenen prediken Ende segghen. Mi heeft ghedroomt, mi heeft ghedroomt.

26

Wanneer willen doch die propheten op houden, dat si loghenen propheteren, ende haers herten arghelist prediken. Ende arbeyden,

27

dat mijn volck mijns naems verghete, met haren droomen, dye si alle man prediken, gelijck als hare vooruaders mijnen name verghaten, om den Baal.

28

Een propheet die eenen droom heeft, die segge eenen droom, Mer so wien mijn woort geopenbaert is, die vercondige mijn woort te recht, want hoe accorderen doch die tarwe ende dat caf? spreect die HERE,

29

En is mijn woort niet gelijc een vier? seyt de HERE, Ende gelijc eenen hamer die die steenrootsen in stucken slaet

30

Daeromme spreect die HERE,

31

Syet, Ick wil aen die propheten, die mijn ^a woort altijt heymelijck den naesten stelen.

a Dat woort Gods heymelic stelen, dat is dat woort Gods valscelic wtleggen ende na eygen vernuft ende wille trecken.

32

Siet ic wil aen die Propheten seit die HERE, die haer eyghen woordt voeren, ende spreken, Die HERE heuet gheseydt, Syet, Ick wil aen die, die valsche (oft logenachtige) droomen propheteren seyt die HERE, ende prediken die, ende verleyden mijn volc, met hare logenen ende ydele tijdingen. Hoe wel ickse nochtans niet ghesonden, noch haer beuolen en heb, ende die desen volcke ooc tot een grote hindernisse sijn, spreect die HERE

33

Als v dit volc, oft een Propheet, oft een Priestere vragen sal, ende spreken. Wat is den ^b last des HEREN? So sult ghi tot haer segghen, welcke den last si Daeromme wil ick v lieden van mi worpen, om dat ghi eenen last sijt, seyt die HERE,

b Last des heren dat is, dat hardt woort des heren, door welc bedudet ende beteykent wort die toecomende armoede verdriet ende bederfenisse om der afgoderien ende valsche leeringen wille.

34

Ende als een Propheet, oft Meester, ofte volcke met schimppe dyen name (Den last des HEREN) ghebruycken sal, dyen seluen wil ic besoecken (oft straffen) ende sijn huys daer toe.

35

Mer alsoo sult ghi seggen deen totten anderen. Wat heeft die HERE geantwoort Ende wat seyt die HEERE?

36

Ende ghy en sultet niedt meer noemen, des HEEREN last. Wandt eenen yegelijcken sal sijn eyghen woort eenen last sijn, Om dat ghi die woorden des leuendigen Gods des HEEREN der heyrscaren ons Gods verkeert

37

Daeromme sal een yegelic totten Propheten alsoe seggen. Wat heeft die HERE geantwoort?

38

Oft wat segget die HERE, Ende ghi en sultet niet den last des HEREN heeten, Daeromme heeft dye HERE also geseyt. Want ghi dit woort (den last des HEREN) int gebruycke hebt. Hoe wel dat ic nochtans tot v lieden gesonden, en verboden heb, dat ghijt niet heeten en soudt, Last des HEREN,

39

Syet, daeromme wil ic v voor eenen last achten Ende ic wil v lieden wech nemen, ende tsamen metter stadt, die ic v lieden, ende uwen vooruaderen ghegheuen hebbe, van mijnen aensicht wech worpen.

40

Ende ick wil v een eewighe scande ende verachtinghe toe voeghen, dye nymmermeer vergheten en sal worden.