Den Bybel met groter neersticheyt ghecorrigeert (Liesveltbijbel 1542)

Wat straffinghe dyen ontmoeten sal, die den HERE God verlaten, ende op die menschen betrouwen. Wat eynde si hebben sullen, die, die rijcdommen niet oorbaerlijck en verdoen hi ghebiet den Sabboth te houden

Dat .xvij. Capittel

[p. *]

1

⁺DIe sonde Iuda is ghescreuen met yseren griffien, ende met eenen Diamanten naghel gescreuen, ende op die tafele haers herten ghegrauen, ende op die hoecken haerder outaren,

+ A vers 1

2

op dat haer kinderen gedencken souden, der seluer outaren ende bosschen, byden groenen boomen op die hooghe berghen.

3

Maer ic wil dijne hoochten beyde op die bergen ende op dye velden tsamen met dijne haue, ende alle dijne schatten in eenen roof geuen, om der sonden wille die in alle dijne palen bedreuen sijn.

4

Ende ghi sult wt dijn erue ghestoten worden, die ic v gegeuen hebbe, ende ic wil v tot slauen (oft eyghene knechten) maken dijnre vyanden, in een lant dat ghi niet en kent, wandt ghi hebt een vier mijnder gramscappen aengesteken, dwelcke inder eewicheyt bernen sal.

5

† Also spreect die HERE, veruloect si die mensche die op eenen mensche betrout, ende dye een vlees hout voor sinen arme, ⁺ ende met zijnder herten vanden HERE wijcket,

+ ps. xlvij. eze. xxix

6

Hi sal sijn als een Thamarisca (oft heyde) inder woestijnen. Ende hi en sal niet sien den toecomenden troost, maer hi sal blijuen in die dorre plaetse inden woesten, in eenen onuruchtbaren ende onbewoonden lande.

7

Mer gesegent si die mensche die hem opten HERE verlaet, ende wiens die HERE sijn toeuerlaet is

8

Die is gelijc als eenen boome aenden watere geplant ende aender beke gewortelt. Want ofter al een hitte coemt, so en vreest hi nochtans niet, Mer sine ^a bladeren bliuen groene. Noch en sorget ooc nyet al coemter een drooch iaer. Mer hi brenget sonder ophouden vruchten.

a Bladeren, daer door verstaetmen dwoort, gelijcmen door dye vrucht die wercken verstaet. psal. i.b.

9

Onder allen dingen die leuen, heeft dye mensce dat alder scalcste ende listichste herte. Wye salt dan gronderen?

10

Ic die HERE can dat herte ondersoecken ende die nieren proeue ic. Ende ic geue eenen yegelijcken na sinen wegen, ende na die vruchten sijnder wercken. *

11

Want gelijc als eenen vogel die hem op dye eyer stelt, mer en broetse niet wt, also is oock die onrecht goet vergadert. Want hi moet daer af, als hijt alderminste vermoeyt ende moet ten laetsten ooc eenen spot daer toe hebben.

12

Mer die plaetse ons heylichdoms, te weten, den throon der godlijcker eeren is altijt vast ghebleuen

13

⁺Want o HERE du bist den hope Israels. † Alle die v verlaten die moeten beschaemt worden. Ende dye afuallige moeten inder aerden gescreuen worden. Want si verlaten den HERE die fonteyn adere des leuende waters

+ B vers 13

14

O HERE maect mi ghesont, so worde ic ghesont Helpt mi, so is mi gheholpen.

15

Want du mijnen lof bist.

Siet, si segghen tot mi. Waer is dan des HEEREN woort? Latet her comen,

16

maer ic en ben daeromme niet van v geuloden, mijn herder, Ooc en hebbe ic noyt menschen prijs begeert gehadt. Dat weetstu wel, so wat ic gepredict hebbe, dat is recht voor v,

17

Daeromme en weest mi nv niet veruaerlijck O mijne toeuerlaet inder noot.

18

Laetse te scande worden die mi veruolgen, mer niet mi. Laetse verscricken, ende niet mi. Laet den dach des ongelucx ouer haer gaen ende slaetse oueruloedelic met tweeuoudiger maten seer

19

Also spreect die HERE, gaet henen, ende tredet onder die poorte des volcx. daer door die coninghen Iuda wt ende ingaen, ende onder alle die poorten tot Hierusalem,

20

ende segt tot haer lieden, o ghi coninghen Iuda hoort dat woort des HEREN, ende ghansch Iuda ende alle inwoonders tot Hierusalem, die tot deser poorten in gaen.

21

Also seyt die HERE, wacht v, dat ghi geenen last (oft borden) opten Sabbath dach voor dese poorte tot Hierusalem in en brengt.

22

Ende en voert geenen last wt dijnen huyse opten Sabbaths dach, ende en doet geen werc ooc, mer heyliget den Sabbaths dach, gelijc ic uwen vooruaderen geboden heb,

23

maer si en hooren niet, ende en neygen haer ooren ooc niet. Mer si blijuen hartneckich, dat si ymmer mi nyet en hooren, noch haer castijen en laten.

24

⁺In dien ghi mi hoort, seyt de HERE, dat ghi genen last en draget des Sabbath dach door deser stadt poorten in, mer den seluen heyliget, dat ghi geen werc opten seluen dach en doet.

+ C vers 24

25

So sullen ooc door deser stat poorten wt ende ingaen, coningen ende vorsten, die opten stoel Dauids sitten, ende riden, ende varen, beyde op waghens ende peerden. Si ende hare vorsten met allen die in Iuda ende tot Hierusalem wonen. Ende dese stadt sal eewelijc bewoont worden.

26

Ende daer sullen comen wt den steden Iuda, ende die rontsomme Hierusalem liggen, ende wt den lande BenIamin, wt den valleyen ende vanden geberchte, ende vanden zuyden, die daer brengen sullen brantoffer, spijsoffer, ende dancoffer inden huyse des HEREN. *

27

Mer ist dat ghi mi niet ghehoorsaem en sijt, dat ghi den Sabbaths dach heylicht, ende gheenen last en draget door die poorte tot Hierusalem in, opten Sabbaths dach, so wil ic een vier onder haer poorten ontsteken dattet die huysen tot Hierusalem verbernen sal, ende nyemant en salt mogen lesschen.