Den Bybel met groter neersticheyt ghecorrigeert (Liesveltbijbel 1542)

Een prekinghe die Hieremie vanden HERE geopenbaert is, vanden dieren tijdt. God verbiedt oock den Prophete, dat hi voort volc niet bidden en soude.

Dat .xiiij. Capittel.

1

⁺DIt is dwoort dat die HERE tot Hieremiam sprack, vanden dieren tijt,

+ A vers 1

2

Iuda leghet iammerlic ende haer poorten staen ellendelic. Het staet clagelic opten landen, ende tot Ierusalem is een groote droochte

3

Die grote seynden die cleyne om water, ende als si aen die fonteynen oft putten comen, so en vinden si geen water, ende si brengen hare vaten weder ydele.

4

Si gaen truerich ende bedroeft, ende decken hare hoofden om dattet aertrijcke dorre leghet, ende niet en regent opter aerden De ackerlieden gaen bedroeft ende bedecken hare hoofden

5

Die hinden verlaten ooc de iongen, die opten velde werpen om dat si geen gras en vinden.

6

Die walt ezelen sullen staen op die houelen (oft steenrootsen) ende snacken na dye lucht, ghelijc die draken. Ende si versmachten wandt daer gheen cruyt en wascht.

7

⁺Och HERE onse misdaden hebbent ymmer verdient. ⁺ Maer helpt doch om dijns naems wille, Want onse ongehoorsaemheit is groot, waer door dat wi tegen v gesondicht hebben,

+ B vers 7

+ Ier. xlij.

8

Want ghi sijt den troost Israels, ende haren noothelper.

9

Waeromme gelaet ghy v recht oft ghi een vreemdelinc waert inden lande ende als een wandelaer oft pelgrim, die maer eenen nacht in en blijft. Waerom stelt ghi v als een versaecht man, ende als een ruese die nyet ghehelpen en can? Du bist doch ymmer onse HERE, ende wi heeten na dijnen name, daeromme en verlaet ons niet.

10

Also seyt die HERE van desen volcke. Si loopen geern herwaerts ende gints, ende en blijuen niet geerne thuys. Daerom en wil haer die HERE niet. Mer hi wort haerder misdaet gedachtich, ende wil hare zonden besoecken ende straffen,

11

Ende die HERE seyde tot mi. Ghi en sult voor dit volc om geen genade bidden

12

Ende oft si al schoon vasten, so en wil ick nochtans haer gebet niet verhooren. Ende oft si al brantoffer ende spijsoffer brengen, so en behagen si doch mi niedt. Maer ick wilse metten sweerde, honger, ende pestilencie vernielen

13

Doen antwoorde ic. Och HERE HERE, siet Die propheten segghen haer. Ghi lieden en sult gheen sweert sien, noch geenen dieren tijt bi v hebben, Mer die HERE sal v goeden vrede gheuen op dese plaetse

14

Ende die HERE sprac tot mi. De propheten prediken haer logenen in mijnen name. Ic en hebse niedt ghe-sonden, ende haer niet beuolen, noch met haer ghesproken. Si prediken v valsche visioenen, wtleggingen, afgoderie, ende bedroch haers herten.

15

⁺Daerom so seyt die HERE, vanden propheten, die in mijnen name prediken hoe wel icse niet ghesent en hebbe, ⁺ ende si prediken nochtans, daer en sal gheenen dieren tijt inden lande comen. Sulcke propheten sullen steruen, doort sweert ende den honger.

+ C vers 15

+ mat. xv. Hiere. v.

16

Ende tvolck dien si gepredict hebben, die sullen vanden sweerde ende den honger opter straten te Ierusalem hier ende daer liggen, datse ooc niemant begrauen en sal. Ende hare wiuen ooc also, haer sonen ende dochteren. Ende ic wil haer boosheit ouer haer wtstorten.

17

Ende ghi sult tot haer segghen dit woort. Mijn oogen vloyen met tranen dach ende nacht ende si en houden niet op. Want dye ioncfrouwe die dochter mijns volcx is deerlic geplaecht ende iammerlic gheslaghen.

18

Ga ic henen wt opt velt. Siet so liggen daer verslagene metten sweerde, Come ic in dye stadt, so liggen daer die van honger sijn versmacht. Want de propheten, ende daer toe ooc die priesters moeten in een lant trecken, dat si niet en kennen.

19

⁺Hebt ghi Iuda verworpen Oft heeft v siele een walgen aen Sion? ⁺ Waerom hebt ghi ons dan also geslagen, dat ons nyemant gehelpen en can? Als wi hoopten dattet vrede soude worden, so en coemt daer niet goets. Wy hoopten wi souden gesont worden. Mer so coemter noch meer scadens.

+ D vers 19

+ esa. xlix Rom. ix.

20

O HERE wi bekennen ons godloos wesen, ende onser vooruaders misdaet. Want wi hebben tegen v gesondicht.

21

Mer om dijns naems wil en laet ons doch niet geschent worden. En laet den troone dijnre heerlicheyt niet bespot worden. Gedenct doch, ende en laet dijn verbont met ons niet ophouden.

22

Daer en is onder den heydenschen godekens gheen diet can doen regenen. Also en can den hemel ooc niet reegenen. Du bist doch ymmer onse HERE, ende onse Godt, op wien wi hopen, want du conste sulcx alle doen.