Den Bybel met groter neersticheyt ghecorrigeert (Liesveltbijbel 1542)

Die HERE thoont den volcke sijn trouwe liefde, ende vrientschap.

Dat .ij. Capittel

1

⁺O Ghi vanden huyse Iacobs hoort des HEREN woort, ende alle gheslachten des huys Israels,

+ A vers 1

2

also seyt die HEERE. Wat ontrouwe (oft ghebrec) hebben uwe vaders aen mi geuonden? dat si van mi afgeweken sijn? ende hingen aenden ydelen ende onnutten afgodekens: daer si nochtans niet af en vercregen.

3

Ende en hebben niet eens ghedacht. Waer is de HEERE, die ons leyde wt den lande Egypti? ende bracht ons in die woestijne? inden wilden ongebaenden lande, inden dorren ende duysteren lande, inden lande daer nyemant en wandelde? noch geen mensche en woonde?

4

Ende ic bracht v in een goet lant, dat ghi eten sout haer vruchten ende goeden? Ende doen ghi daer in quaemt, ontsuuerde ghi mijn lant, ende ghi maecte my mijn erfdeel tot eenen grouwel.

5

Die Priesters en gedachten niet, waer is die HERE? ende die geleerde en achten mi niet, ende die ^a herderen leyden die lieden van

a Herderen, dat sijn ale ouersten als coningen princen leeraers ende predicanten. esa. xlvi.d. Eze. xxxiiij a

[p. *]

mi, ende die propheten predicten ende dienden Baal, ende sijn den onnutten goykens aengehangen.

6

Daerom moet ic altoos met v ende met uwe kints kinderen twisten seyt die HERE.

7

Gaet henen in die eylanden Chitim, ende siet, Ende seyndet in Kedar, ende merct neerstelijc, ende siet, oft ooc also daer toe gaet

8

oft ooc die heydenen hare Goden veranderen, hoe wel dat si nochtans geen Goden en sijn. Ende nochtans heeft mijn volc sijn heerlicheyt verandert, om eens onnutten Godekens wille,

9

O ghi hemelen weest daerom verbaest, verscrict v, ende beeft, spreect die HERE,

10

⁺Want mijn volc heeft een dubbel sonde ghedaen, si hebben mi verlaten, ⁺ een leuende water adere, ende si maken haer schone fonteynen, die nochtans allendige fonteynen ende watercuylen sijn, want si en geuen geen water.

+ B vers 10

+ Roma. i.

11

Is Israel dan een slaue: oft een kint inden huyse, om dat hi alle mans roof zijn moet?

12

Want die leeuwen brullen ouer haer, ende roepen, ende verwoesten zijn lant, ende si verbernen sine steden Iae datter ooc niemant in en woont,

13

Iae daer toe so hebben die kinderen ^a Noph, Ende Taphnes v den hals in tween geslagen,

a Noph of Memphis ende Taphnes waren die principael steden van Egipten daer dye Ioden te vergeefs in hoopten. Deut. xxviij.

14

dat selue hebt ghi v ghedaen, om dat ghi den HEER uwen God verlaten hebt so dicwils als hi v den rechten wech leyden woude.

15

Wat helpt v dat ghi in Egipten trect, ende wilt dat water Sihor drincken? ende wat helpt v dat ghi in Assirien reyst, ende wilt daer water Phrat drincken?

16

Het is dijnre boosheit scult, dat ghi alsoe gestraft wort, Ende dijne ongehoorsaemheit dat ghi also berispt wort. Also moetstu bekennen ende beuinden, wat iammer ende hertsen leedt dattet in brengt, den HERE uwen God te verlaten ende hem niet te ontsien seyt de HERE, HERE Zebaoth

17

Want ghi hebt altijt v ioc gebroken, ende dine banden gescoort, ende geseyt. Ic en wil also niet onderworpen sijn, ⁺ mer op allen hoogen houelen, ende onder alle groene bomen lieptstu die hoererie na,

+ C vers 17

18

Mer ic hadde v gheplant tot eenen soeten wijnstoc, ende tot een oprecht goet zaet, Hoe bistu dan mi gecomen tot eenen bitteren wilden wijnstoc?

19

¶ Ende al wasscet ghi v met looghe, ende neemt zeepe daer toe, so schijnt die onduecht dies te meer voor mi, seyt die HERE God.

20

Hoe dorfstu dan seggen, ic en ben niedt onreyn? ick en hebbe die Baalim (oft Godekens) niet na gheuolcht? Siet wat ghi bedreeft inden dale, ende bedenct hoe ghijt beschict hebt, Ghi loopt rontom gelijc een Kemelinne inder hitten.

21

Ende gelijc een wilden woutezel inder woestinen plach, wanneer hi van groter hitte snuyft, ende loopt dat hem niemant op gehouden en can. Diet weten wil die en derf niet verre loopen, Op die vierdagen sietment wel.

22

Lieue hout doch, ende en loopt so woedentlic niet, Mer ghi spreect, daer en sal anders niet af comen, Ic moet metten vreemden boeleren ende na loopen,

23

gelijc als een dief ter scanden coemt, als hi begrepen wort. Also sal ooc dat huys Israels te scanden comen, tsamen, met haren coninghen ende Vorsten, priesteren ende propheten,

24

die totten houte seggen. ⁺ Du bist mijn vader. Ende tot eenen steen Ghi hebt mi opgeuoet, want si keeren mi den rugghe toe, ende niet dat aensicht? Mer als den noot coemt, so seggen si wel op, ende helpt ons,

+ D vers 24

25

Mer waer sijn dan uwe godekens? die ghi v gemaect hebt? Gebiet haer dat si op staen, Laet sien oft si v helpen connen in uwer noot want O Iuda so menige stadt als ghi hebt, also menigen afgod hebt ghi ooc

26

¶ Waerom wilt ghi dan noch recht hebben aen mi? Ghi sijt doch alle van mi afgeuallen seyt die HERE.

27

Alle die slagen sijn doch aen dijne kinderen verloren, want si en nemen der castijdingen niet waer.

28

V sweert verslint uwe propheten, gelijck een rasende leeu. O du boose aert, merckt op des HEREN woort. Ben ic dan Israel een woestenie geworden? oft een woest duyster lant? Waerom spreect dan mijn volc. Wi zijn heeren, wi en willen v niet meer na loopen.

29

Een ioncfrouwe en vergetet haer cieraet (oft crans) niet, noch een bruyt haren borstdoec, mer mijn volc vergetet mi eewelic?

30

¶ Wat wilt ghi veel dijne wercken verschoonen, op dat ic v genadich si? Onder sulcken schijn bedrijfstu altijt meer, ende meer boosheyt.

31

Bouen dien so vintmen bi v dat bloet der armer ende ontsculdigher sielen, aen allen hoecken, ende dat en is ooc niet heymelic, mer openbaer in die selue plaetse

32

Noch spreecstu, ic ben onsculdich, Hi keerde sinen thoorne van mi, siet, Ick wil met v te recht gaen, om dat ghi segt. ⁺ Ic en hebbe niet gesondicht.

+ E vers 32

33

Waerom wijct ghi doch so geerne, ende valt nv herwaerts nv gintswaerts? Mer ghi sult aen Egypten te schande worden, gelijc ghi aen Assyrien te scande gecomen sijt,

34

Want ghi moest van daer ooc wech trecken, ende v handen ouer v hooft tsamen slaen, want die HERE sal dijne hope laten faelgeren, ende het en sal v bi hem niet gelucken.

35

Ende ghi spreect, wanneer hem een man van sinen wijue sceyden laet, ende si trect van hem, ende neemt eenen anderen man, derf hise ooc weder aennemen? ⁺ En ist niet alsoo? dat dat lant ontsuyuert is? Mer ghy hebt met veel boeleerders ^b gehoereert. Mer nochtans coemt wederom tot mi, spreect die HERE.

+ de. xxiiij mat. xix

b Hoereren dat is afgoderien doen ende vreemden Gods dienst gebruycken. eza xlviij a.

36

Heft op dijn oogen tot die hoochten, en siet hoe du ouer al hoererie bedrijuest Ghi sidt op die straten, ende wacht op haer, gelijc als een Araber (oft moorder) inder woestenije, ende ontreynicht dat lant met dijnre hoererie ende boosheytr

37

Daerom moet den vroegen regen wtblijuen, ende den spaden reghen niet comen, Ghi hebt eender hoeren voorhooft, Ghi en wilt v niet meer scamen,

38

ende nochtans roept ghi tot mi. O lieue vader, O meester mijnder ioncheit,

39

Wilt ghi dan inder eewicheit gram sijn? ende vander gramscappen niedt af laten? Siet, ghi leert ende doet dat quaet is, noch ghi en laet v niet bestieren