Den Bybel met groter neersticheyt ghecorrigeert (Liesveltbijbel 1542)

God die HERE biedt sine ghenade, ende noodet alle menschen tot sine maeltijt, die welcke hi in Christo bereyt heeft, ende dat profijt sijns lijdens wort hier bescreuen

Dat .lv. Capittel.

1

⁺WEl aen, alle ghi dye dorst hebt, coemt herwaerts totten watere, ende ghy, dye geen gelt en hebt, coemt, coopt, dat ghi te eten hebt, comt, ende coopt, beyde wijn, ende ^a melck sonder ghelt, ofte ware.

+ A vers 1

a Wijn ende melck dats dwoordt Gods, wandt den wijn, hi verblidet dat herte, ende Gods woort verblijt die conscientie, ende melck want het voet, ende doet dye kinderen ofte cleyne wassen i.pe. ij.a.

2

Waeromme gheeft ghi v gheldt wt, om dat ghene dat niet en spijst, Ende uwen arbeyt, om dat gene dat niet en versaet? Hooret doch na mi, soo sult ghy dat beste eten, ende uwe siele sal inden vette wellust hebben.

3

Neyget uwe ooren herwaerts, ende coemt tot mi, hoort, so sal uwe siele ghesont sijn, want ick wil met v een eewich verbont maken, die sekere ghenade Dauids,

4

siet ick hebbe hem den lieden tot een getuyge ghegeuen, tot eenen vorste ende gebiedere den volcke,

5

siet, ghi sult die ^b heydenen roepen, die ghy niet en kennet. Ende die heydenen, die v niet en kennen dye sullen tot v loopen om des HEEREN dijns Gods wille, ende des heyligen in Israel, die v heerlijc maeckt.

b Dye heydenen roepen, dat is den natien ende volcken dat euangelium vercondigen, Ose. ij.d deut. iiij. ende .xxix

6

† Soect den HERE, die wijle dat hi te vinden is, roept hem aen, die wijle dat hi na bi is.

7

Die Godlose laet af van sinen wege, ende dye ongerechtige van sinen ghedachten, ende bekeere hem totten HERE, ⁺ so sal hi sijnder ontfermen, ende tot onsen God, want hi geneycht is om te vergeuen,

+ B vers 7

8

want mijn gedachten en sijn niet gelijc die uwe. Ende dijne wegen en sijn niet gelijc die mijne, spreect die HERE.

9

Maer gelijc die hemel hooger is dan die aerde, soo sijn oock mijne weghen hooger dan dijne weghen, ende mijne ghedachten dan die uwe.

10

Want ghelijc als die reghen ende snee vanden hemel af coemt, ende derwaerts niet weder en keert mer maeckt die aerde vocht, ende vruchtbaer, ende groeyende, datse saet gheeft te saeyen, ende broodt te eten,

11

Also sal ooc dat woort dat wt mijnen monde coemt, niet leech weder tot mi comen, maer tsal mijnen wille doen, ende tsal gheluckich sijn, in tgheen daer icket toe seynde.

12

⁺Also sult ghi met vruechden wt trecken, ende in vreden gheleyt worden. Die berghen ende die hueuelen sullen van vruechden clincken, ende alle boomen opten velde, sullen metten handen clappen.

+ C vers 12

13

Daer sullen denneboomen voor die doornen wassen, ende myrtus (oft gagelboom, in die plaetse van dijstelen. Ende den HERE sal eenen name, ende een eewich teeken zijn, dat niet wtgeroeyt en sal worden.