Den Bybel met groter neersticheyt ghecorrigeert (Liesveltbijbel 1542)

Die propheet beclaecht hem wt medelijden, ende smerten vander verstoctheyt ende verhartheyt des volcx, die den wtgherecten arme Gods, dats den gheopenden Chirstum niedt aen nemen, en sullen. Daer na bescrijft hi voorder, opt voorgaende dye verneertheyt ende hoocheyt Cristi.

Dat .liij. Capittel

1

⁺SIet, mijn dienaer sal wijsselic wandelen ende sal daeromme verhoocht ende seer hooch verheuen worden,

+ A vers 1

2

Ia datter vele om sinen wille haer verergeren sullen, om dat sijn gedaente hatelicker sijn sal, dan der andere menschen, ende sijn opsien onghestelder, dan der menschen kinderen,

3

Mer hi sal alsoe veel heydenen besprengen, Ia dat dye coningen oock haren mont teghen hem sullen toe sluyten, want si sullent met lust aenschouwen, den welcken van hem nyet vercondicht en is. Ende die niet van hem gehoort en hebben die sullent verstaen.

4

† Maer wie gelooft onsen prediken. Oft wien is den ^a arm des HEREN bekent. Want hi sal voor hem op schieten, gelijc als een spruyte, Ende gelijc als een wortel wten dorren aertrijcke,

a Arm beteekent hier Cristum. ps. cxvij c Ioan. xij. Roma. x

5

Hi en sal gheen ghedaente noch schoonte hebben, soo wie hem aensiet, noch daer en was geen gedaente, dat wi hadden sijnder mogen begeeren.

6

Hi was die alder verachste ende onwertste, vol smerten ende crancheden. Hi was alsoo veracht datmen ooc daenscijn voor hem verborch, daeromme en hebben wy hem nerghens voor gheacht.

7

Voorwaer hi droech onse crancheden, ende onse smerten nam hi op hem, maer nochtans hielden wy hem, voor den ghenen die van Gode geplaecht, ⁺ ende tot schanden gemaect ware.

+ Cor. xij Ioan. ij. Psalmo. lxviij.c.

8

Hoe wel dat hi om onse misdaden wille gewont ende om onser sonden wille gebroken is, want die straffinge leyt op hem, ⁺ op dat wi vrede mochten hebben, ende door sine wonden sijn wi gheheelt,

+ B vers 8

9

wi gingen alle dolende gelijc als schapen, een yegelijc ^b sach op sinen wech, mer de HERE worp onser alder sonden op hem.

b Op sinen wech sien, dat is een yegelic dede dat hem goet dochte Psalmo lxxx.c.

10

Doen hi ghestraft ende onteert wert, So en dede hi sinen mont niet op, gelijc als een lammeken dat totter slachbancken geleit wort, ende gelijc als een schaep, dat stomme is, voor sinen sceerdere, ende dat sinen mont niet op en doet.

11

⁺Maer hi is wt den anxt, ende wt dat ordeel wech ghenomen, wie can sijn geslachte vertellen, wandt hi wt den ^c lande der leuender wech geruct is, doen hi om die misdaet mijns volcx gheplaecht wert,

+ C vers 11

c Lant der leuender, dat is dit tegenwoordich leuen ps. c.xiiij b

12

ende hi is begrauen, gelijc als die godlosen, ende gestoruen, als een rijcke oft ongodlijcke. Hoe wel hi nyemanden geen onrecht ghedaen en heeft, noch eenich bedroch in sinen monde geuonden en is geweest,

13

mer die HERE woude hem also slaen met crancheden.

Wanneer hi sijn leuen tot eenen scultoffer ghegheuen heeft, so sal hi een saet hebben, ende in die lanckheden leuen. Ende des HEREN voornemen sal door sijn hant voortgaen.

14

Ende om dat sijn siele gearbeyt heeft, so sal hi sinen lust sien, ende die volheyt hebben Ende door sijn kennisse sal mijn knecht die gherechtige veel gerecht maken, want hi haer sonden draecht

15

ende daeromme wil ick hem een grote menichte tot eender buete gheuen. Ende hi sal die stercke tot eenen roof hebben, om dat hi sijn leuen inden doot ouergegeuen heeft, ende den misdadighen ghelijc gherekent, heeft hi die sonden van vele ghedragen, ende voor die ouertredinge heeft hi ghebeden.