Den Bybel met groter neersticheyt ghecorrigeert (Liesveltbijbel 1542)

Hier wort bediedelijcken bescreuen die toecomst Christi, ende sine macht, Gods lof wort hier vercondicht, Ende den godlosen Ioden worden met swaer straffinge gedreycht

Dat .xlij. Capittel.

1

⁺SIet, dit is mijn knecht. Ic onderhoude hem, ende mijn wtuercoren, in welcken mijn siele een welbehagen heeft, ⁺ ic hebbe hem mijnen geest ghegheuen.

+ A vers 1

+ mat. xij.

2

Hi sal dat recht onder den heydenen brenghen, hy en sal niet crijsschen noch roepen, ende men en sal sine stemme niedt hooren opter straten.

3

Dat ghecrooct riet en sal hi niet breken, ende dat roeckende vlas (oft lijnwaet) en sal hi niedt wt lesschen. Hi sal dat recht metter waerheyt voortbrenghen,

4

hi en sal noch bijtachtich, noch grouwelijck sijn, op dat hy opter aerden dat rechte doe, ende die heydenen sullen op sine insettingen wachten

5

Also spreect God die HERE, die die hemelen schept ende wtbreet, die de aerde maeckt, ende dat daer in wascht, die den volcke dat daer in is den adem, ende haer den gheest (oft leuen) gheeft, die daer in wonen

6

Ick die HERE hebbe v geroepen in gerechticheyt ende ic hebbe v bi dijnre hant ghenomen, ende hebbe v behoet, ende ic hebbe v tot een verbont onder den volcke gegeuen, tot een lichte der heydenen,

7

op dat ghi sout openen die oogen der blinden, ende die geuangenen wt der geuangenissen sout laten, ende die daer sitten inder duysternissen wt den kercker.

8

Ic die HERE dat is mijnen name, ende ic en wil mijn eere geenen anderen geuen, noch mijn ghewalt den godekens )oft beelden)

9

siet so wat ick voortijts hebbe vercondicht, dat is ghecomen, ⁺ ende alsoo vercondighe ick oock nv dat nieuwe, eer dat gheschiet is so laet ick v dat hooren

+ B vers 9

10

Singhet daeromme den HEERE een nieuwe liet, Sijn glorie is al aen die eynden der weerelt, ende die opter zee varen, ende al wat daer in is. Dye eylanden, ende die daer in woonen,

11

roept luyde ghy woestijnen, ende die steden daer in sijnde, oock met den dorpen die in Kedar sijn, laetse iuychen die inden steenrootsen woonen, ende roepen van die hoochten der bergen

12

laetse den HERE die eere gheuen, ende sijn almachticheyt inden eylanden vercondighen,

13

die HEERE sal wt treden ghelijck als een Ruese, ende hi sal die ^a zeloersce ernstighe liefde op wecken ghelijck als een crijschman, hi sal iuychen ende crijschen. Ende hi sal sine vryanden verwinnen.

a Seloersche liefde is hier dye wrake Goods. Nahum. i.

14

Ic hebbe lange gesweken, ende ben stilgeweest, ic hebbe mi onthouden. Nv wil ic roepen ghelijc als een vrouwe in haren arbeyt, ic wilse verwoesten, ende alle verslinden,

15

ic wil die berghen ende houelen verwoesten, ende alle haer gras verdorren. Ende ic wil die waterstromen tot eylanden maken, ende die zee verdroogen,

16

mer die blinden wil ic opten wege leyden, den welcken si niet en kennen, Ic wilse op die bane brengen die haer onbekent is, Ick wil die duysternisse voor haer tot een licht maken, ende dat cromachtich is tot een effen plaetse, sulcx wil ic haer doen, ende haer nyet verlaten,

17

maer die haer op godekens (oft beelden) verlaten ende seggen totten gegoten beelden. Ghi sijt onse Goden, die sullen haer achterwaerts keeren, ende bescaemt worden

18

O ghi doouen hoort, ende siet herwaerts o ghi blinden, op dat ghi sien moget.

19

Wie is doch so blint als mijn knecht? ende wie is so doof als mijn bode dyen ic seynde? Wie is so blint, als die volcomen? Ende so blint als die knecht des HEREN?

20

Men saeyt genoech mer men en behoudes niet, men heeft die ooren open mer men en hoort doch niet,

21

nochtans wil dye HERE haerder genadich sijn, om sijns gerechticheits wille, op dat si sijn gheset groot ende heerlick maken

22

maer het is een berooft ende verdoruen volc. Si sijn altesamen inden holen verstrict, ende ghestooten inden kerckeren. Si sijn tot eenen roof gheworden, ende daer en is geen diese verlosse Si sijn met voeten getreden, ende niemant en isser die segge brengtse weder herwaerts,

23

Wie isser onder v lieden, die sulcx hoore, aenmercke, ende ter herten neme, tgene dat hier nae coemt?

24

Wie heeft Iacob ouer gegeuen te verderuen? ende Israel den roouers? En heuet die HERE niedt ghedaen? wy hebben tegen hem ghesondicht, ende wi en wouden op sine wegen niet wandelen, ende wi en sijn ooc sine geboden niet gehoorsaem geweest,

25

daeromme heeft hi wtghestort die gramheit sijns toorns ouer haer, ende eenen stercken crijsch, ende hi heeft ons rontsomme aengesteken? mer noch en willen wijs niedt mercken. Hy bernt ons, ende noch en nemen wijs niet ter herten