Den Bybel met groter neersticheyt ghecorrigeert (Liesveltbijbel 1542)

Hoe Saneherib die Assirissche Coninck Hierusalem belegerde Dat aenbrenghen des Assirisschen hooftmans, ende die schampere redene tegen God ende sinen hoochmoet ende stout beroemen.

Dat .xxxvi. Capittel

1

⁺HEt ghesciede inden veertienden iaer des conincx Hiskia, ⁺ dat die coninck van Assirien Saneherib op tooch teghen alle vaste steden Iuda te strijden, ende hi ghewanse.

+ A vers 1

+ iiij.Reg. xviij. ij.Pa. xxxij.

2

Ende die coninc tot Assirien sant Rapsazen van Lachis tot Hierusalem, tot den coninc Hiskia met groter macht, ende hi trat aenden waterstrome des oppersten grachts, aenden wech by des verwers ackere.

3

Ende daer ghinck tot hem wt Eliakim die sone Hiskia, die hooftmeester, ende Sebna die Cancellier, ende Ioah Asaphs sone die scriuer.

4

Ende Rabsases sprack tot haer, segt doch Hiskia, also spreect die groote coninc, die coninc tot Assirien. Wat is doch dat voor eenen tort, daer ghi v op verlaet,

5

Ic denke dat v redene is, dat ghi noch raet ende macht hebt te strijden. ⁺ Op wyen verlaet ghy v dat ghi my sijt afgeuallen?

+ iiij.Reg. xix.

6

verlaet ghi v opten ghebrokenen rietstoc? welcke so hem een daer op lenet, so gaet hi hem door die hant, ende doorboortse. Also doet Pharao die coninc in Egipten allen den ghenen, die haer op hem verlaten,

7

mer in dyen ghi nv seggen wilt, wy verlaten ons opten HERE onsen God, en is hy dan niet die gene, welckes hoochten ende outaeren Hiskia wech gedaen heeft? ende die tot Hierusalem ende Iuda geseyt heeft, voor desen outaer sult ghi aenbeden?

8

⁺Wel aen Ic scat ghi hebt met mijnen here die coninc tot Assirien een verding gemaect, dat ic v twee duysent paerden soude gheuen, laet sien, oft ghi by v selfs condt wt gemaken die daer op rijden.

+ B vers 8

9

Hoe soudt ghi dan eenen hooftman den aldercleynsten dienaer mijns heren mogen wederstaen? ende ghi verlaet v op Egipten, om der wagens ende der ruyters wille.

10

Daer toe meynstu dat ic sonder den HERE ben op getogen in dit lant om dat selue te bederuen? Ia dye HERE sprac tot mi, reyst op in dit landt ende bederuet.

11

Mer Eliakim, ende Sebna, ende Ioah spraken tot Rabsasen, ⁺ lieue spreect doch met dijnen knechten in Siriscer sprake, want wi verstaent wel, ende en spreect doch niet opt Ioodsche met ons, voor den ooren des volcx, dat op der mueren is,

+ C vers 11

12

doe seyde Rabsase, meynstu dat mijn here mi tot dinen heer oft tot dy alleen gesonden heeft, sulcke woorden te spreken, Ende niet veel meer tot die mannen die opter mueren sitten, dat si tsamen met v haren eyghenen dreck eten, ende hare eygene pisse souden drincken?

13

Ende Rabsace stont ende riep luyde in Ioodscher sprake, ende seyde,

14

hoort die woorden des groten conincx tot Assirien En laet Hiskia v heden niet bedriegen, want hi en can v lieden niet verlossen

15

en laet ooc Hiskian v lieden niet vermanen opten HERE te betrouwen, dat hi segghe, die HERE sal ons verlossen, ende dese stadt en sal niedt in die handen des conincx tot Assirien gegeuen worden,

16

en hoort Hiskian niet, want also spreect die coninc tot Assyrien

Doet een segheninghe, ende gaet tot mi wt, soo sal een yegelijc van sinen wijnstoc, ende van sinen vigheboom eeten? ende wt sine fonteyne drincken,

17

⁺totdat ick come ende hale v lieden in een lant, gelijc als uwe lant is, een lant daer most ende koren inne is, een lant daer broot ende wijngaerden in sijn

+ D vers 17

18

en laet v lieden Hiskia niet bedriegen, dat hi segge. Die HERE sal ons verlossen, Hebben ooc die Goden der heydenen, een yeghelijc sijn lant verlost vander hant des conincx tot Assirien

19

Waer sijn die Goden tot Hamath? ende Arphad? Waer sijn die Goden Sepharnaim? hebben si oock Samarian verlost van mijnder hant?

20

welcke onder aller deser landen God, heeft sijn lant verlost van mijnder hant? Hoe soude die HERE dan Hierusalem verlossen van mijnder hant?

21

Si swegen stille, ende en antwoorden hem niet. Wandt die coninc hadde geboden ende geseyt, en antwoort hem niet.

22

Doe quamen Eliakim die sone Hilkia die hofmeester, ende Sebna die Cancellier, ende Ioah die sone Assaphs die scriuer, met verscoorde cleederen tot Hiskiam, ende gauen hem te kennen die woorden van Rabsases.