Den Bybel met groter neersticheyt ghecorrigeert (Liesveltbijbel 1542)

Vander straffinghe Ephraim ende der priesteren die dat volc Gods met menschen insettingen beswaerden, ende haerder verblintheyt, ende aenstoot aenden steen dien Godt in Sion tot een fundament legghen wil.

Dat .xxviij. Capittel.

1

⁺WEe der houaerdiger croonen der dronckenen van Ephraim, ende der verwelcter bloemen haerder lieflijcker heerlicheyt, Dye welcke staet bouen een vet dal, der gheenre die vanden wijn tuymelen,

+ A vers 1

2

Siet, een stercke ende machtige vanden HERE, gelijc een hagel storm, gelijc een schadelic onweder, gelijc een water stroome die geweldelic inbreken sal int lant,

3

Ia ooc also dat die stoute crone der dronckenen van Ephraim met voeten vertreden sal werden,

4

Ende die verwelcte bloem haerder liefliker heerlicheyt, Die welc staet bouen ouer een vedt dal, si sal sijn ghelijck dye vroech rijpe vrucht voor den somer, dye welck verdorret alsmense noch aen haren tacken hangen siet

5

Tot dier tijt sal die HERE der heyrscaen wesen

[p. *]

een lieflijcke croone ende heerlijcken crans sinen ouer gebleuen volc.

6

Ende eenen geest des rechts, den ghenen die totten gerecht sittet. Ende eene stercte den genen die vanden strijt weder comen totter poorten.

7

⁺Daer toe so sijn dese ooc vanden wijn dulle geworden, ende gaen al tuymelende van stercken drancke.

+ B vers 7

8

Want beide die priesters ende propheten sijn dulle, van stercken drancke, si sijn inden wijn versmoort, ende tuymelen van stercken drancke Si dolen int propheteren ende Prediken. Ende int oordelen missen si. Want alle tafelen sijn vol spiens ende onsuyuerheyts. Ia ooc alle plaetsen.

9

Wien sal hi dan leeren die kennisse? Wien sal hy prediken, den gespeenden van melcke, den genen dye vanden borsten af getogen sijn.

10

Want si seggen, Gebiet hier, Gebiet daer, Gebiet hier, Gebiet daer, Vertoeft hier, Vertoeft daer, Vertoeft hier, Vertoeft daer, Hier een weynich, Daer een weynich,

11

wel aen, Hi sal noch eens met spotteliken lippen, ende met een ander sprake tot desen volc spreken, den welcken nv dit gepredict wort,

12

Alsoe salmen ruste hebben. Alsoo vertroostmen die herten. Also wort men stille, ende si en willen nochtans sulc sermoen niet hooren.

13

Daeromme sal haer ooc des HEREN woort effen also gheschieden, Gebiet hier, Gebiet daer, Ghebiet hier, Gebiet daer, Vertoeft hier, Vertoeft daer, Vertoeuet hier, Vertoeft daer, Hier een weynich, daer een weynich, dat si henen gaen, te rugge vallen, ghebroken, gestrict, ende geuangen mogen worden.

14

Daeromme O ghi spotters, hoort des HEEREN woort, ghi die ouer dit volc regneert, dat te Iherusalem is.

15

Want ghi segt. Wy hebben metter doot een compackt, ende metter hellen een bestant gemaect. Ende ofter al een groote vloet in breect, dat si ons niet en treffe. Want wi hebben ons een valsche toeulucht ende een bedriechlijc bescuttsel gemaect.

16

Daeromme seyt die HEERE der heyrscharen Siet, ick legghe in Sion eenen ^a grontsteen, eenen proefsteen, eenen costelijcken hoecsteen, tot een vast fundament, soo wie in hem betrout die en sal nyedt moeten haesten.

a grontsteen, proefsteen ende hoecksteen, dat is waerachtelijc Cristus om dat hy alleen is, die Ioden. ende heydenen in een geloue geroepen ende gebonden heeft. psalmo. c.xvij.c.ende he. ij.e

17

Ende ick wil dat oordeel tot een rechtsnoer. Ende die gerechticheyt, tot een waghe maken So sal dan den hagel die valsche tueulucht wech driuen. Ende die wateren sullen dat bescutsel wech vloeyen,

18

dat also uwe verbont metter doot ghemaect, losch werde. Ende dat v bestant metter hellen niet en blijue. Ende als een vloet daer henen vaert, so salse v vertreden

19

Ende so haest si daer henen ghaet, dan salse v wech nemen, Coemt si des morgens so gescietet des morgens, Also ooc, si come des daechs, ofte des nachts, Want dat ongeual alleen leert opt woort mercken,

20

Want dat bedde is so enghe, datter niet ouer en schiet, Ende dat decsel so cort, datmen daer niet in ghewenden en mach,

21

Want die HERE sal hem op maken, ghelijc als opten berch Phrazin, ende toornich sijn, gelijck int dal Gibeon, op dat hi sijn werck doe, dwelcke nochtans zijn werc niet en is, ende op dat hi sinen arbeyt doe, die welcke nochtans sinen arbeyt niedt en is.

22

Daeromme laet nv uwe spotten, dat uwe banden nyedt harder en worden, Want ic hebbe een verderuen ende verstoren ghehoort, dwelcke vanden HERE, HERE Zebaoth in die gansche werelt geschieden sal

23

Neemt ter ooren ende hoort mijn stemme, Luystert op ende hoort mijn reden,

24

En ploecht oft eert oft spittet een ackerman niet sinen acker altoos eerst eer hi saeyt?

25

Ist niet also? Wanneer hijt geegget of geeffent heeft, dan saeyt hi wicken ende werpt comijn, Ende saeit terwe ende gerste, ⁺ een yegelick op sijn plaetse daer hijt hebben wilt, spelte, rogghe, garste, op sijn plaetse,

+ God straffet maer hy en verdoemt die sine niet

26

Also straftse ooc haer God voor tgericht ende leertse,

27

Want men en dorscet die wicken nyet wt metten vlegel, Desgelijcx en laetmen ooc niet dat wagenradt gaen ouer den comijn, Maer die wicken slaetmen met eenen staf wt, ende den comijn met een roede,

28

Men maket den tarwe dattet broot wert, ende en dorsscet nyet geheelic te niet, alsment metten wagenraden ende paerden wt dorsschet,

29

Sulcx gheschiet oock vanden HERE Sebaoth, Want sinen raet is wonderlijck Ende hi volbrenghet heerlicken.