Den Bybel met groter neersticheyt ghecorrigeert (Liesveltbijbel 1542)

Van die straffinghe ende plaghe Tyri ende Sidonis, ende der eylanden met alle die steden aenden meyr gheleghen.

Dat .xxiij. Capittel.

1

⁺DIt is den last Tyri, Huylt ghi schepen aenden meyre, want si is verdestrueert, dat daer ooc niet een huys en is, noch yemant derwaerts en trect. Dat selue sal haer wt den lande Kithim gedaen worden, die inwooners der eylanden sijn stille geworden.

+ A vers 1

2

Die cooplieden tot Sidon die door die zee voeren die veruulden v.

3

Ende so wat vruchten aen Sihor, ende so wat corens aent water wiesch, dat selue brachtmen tot v in door grote wateren. Ende ghi waert der heidenen marct oft coopstadt gheworden.

4

O Sion du mogest wel bedruct sijn, want de geheele macht des meyrs seyt. Och ic en wort nv niet beurucht, Ic en bare niet. Ic en voede geen iongelingen op, noch en brenge geen maechdekens op,

5

ende als dat die Egyptenaers hooren, so sullen si haer bedroeuen, alleleens als Tyrus selue, doen si dat hoorden,

6

Vaert henen op dat meyr. Huylt ghi inwoonders der eylanden.

7

Is dat die vrolijcke stadt? die haer van haren ouderdom beroemde? Wiens ionghe gesellen verre reysen, en haer prisen?

8

⁺Wie soude dat gemeent hebben dattet Tyro (een croone alder steden) soude also gegaen hebben? so doch hare cooplieden vorsten sijn, ende de heerlicste liggeren oft contoorhouders inden lande.

+ B vers 8

9

De HEERE Sebaoth heeft also gedacht, op dat hi te scanden make die pomposicheit aller lustiger steden ende verachtelic make alle heerlicheyt inden lande,

10

vaert henen O du dochter des meyrs door dijn lant gelijc als eenen stroom,

11

daer en is gheenen gordel meer. Hy strect sijn handt ouer dat meyr, ende verscrict die Conincrijcken, Die HERE gebiet ouer Canaan, datmen hare machtige wt soude royen, ende seyt,

12

O du dochter Sidon, ghi en sult niedt meer vrolijck sijn, Wandt ghi sult geschent worden vanden Kithim,

13

Op, vaert henen. Daer ghy oock gheene rust hebben en sult, Siet dat lant der Caldeen, daer nv geen volck en is, dat selue hebben dye Assiriers ghefundeert, alsoo oock, datmen daer met schepen vaert, ende daer in timmeragie van thoornen opghericht,

[p. *]

palleysen ende salen getymmert heeft. Ende het is nochtans te gronde neder geworpen.

14

Huylet ghy scepen opter zee, want uwe macht is gedestrueert.

15

In dier tijt sal Tyrus vergeten worden tseuentich iaer, so lange als een coninc leuen mach. Maer na tseuentich iaer salmen van Tyro een hoeren liedt singen.

16

Neemt die harpe, gaet inder stadt rontomme ghi vergetene hoere, bedrijft wat genoechten opt snarenspel, ende singet met eenen moet, op datmen dijns weder gedencke,

17

Want na tseuentich iaren so sal dye HERE Tyrum besoecken, op dat si weder come tot haren hoeren loon, ende hoererie bedrijue met alle conincrijcken opter aerden.

18

Mer hare comenscappe ende hoeren loon sullen den HERE heylich sijn, men en salse niet tot scatten vergaderen noch verberghen Mer die ghene die des HEEREN sijn, dye sullen haer coopgoet oft neeringe hebben op dat si eten ende gespijst worden, ende wel gecleet mogen worden.