Den Bybel met groter neersticheyt ghecorrigeert (Liesveltbijbel 1542)

Iesaie den Prophete wort verthoont die straffinghe Egypti, ende Ethiope.

Dat .xx. Capittel.

1

⁺INden iare doen Tharthan tot Asdod quam doen hem ghesonden hadde Sargon die coninc tot Assirien, ende streedt teghen Asdod ende wanse,

+ A vers 1

2

inder seluer tijt sprac die HERE door Isaiam den sone Amoz, ende seide, Gaet henen ende trect af den sack van dijne lendenen, en die schoenen wt dijne voeten.

3

Ende hi dede also, hi ghinc naect ende bloots voets.

4

Doen sprac die HERE. Gelijc als mijn kncht Iesaia naect ende baruoets gaet, dats tot een teeken ende verwonderen van drie iaren ouer Egypten, ende Moren lant. Also sal die coninc tot Assyrien henen drijuen die geuangen Egipti ende Moren lant, beyde ionc ende out, naect ende baruoets, ⁺ met die scamelheyt bloot, tot schanden den Egiptenaers.

+ B vers 4

5

Ende si sullen haer verscricken, ende met schande blijuen voor Morenlant daer si haer opsien op hadden, Ende wederomme dat Morenlant beschaemt sijn voor Egipten. Vanden welcken si haer beroemden,

6

Ende die inwoonders deser eylanden sullen seggen ter seluer tijt Is dat onse toeulucht, daer wy toe vloden om hulpe? dat wi verlost mochten worden vanden coninck tot Assiria? Sijn wi niet sijn ontloopen.