Den Bybel met groter neersticheyt ghecorrigeert (Liesveltbijbel 1542)

Noch vanden voorgaende, Ende ooc van die roepinghe der heydenen

Dat .xviij. Capittel

1

⁺WEe den lande, dat onder den vliegenden schepen inder schaduwen vaert, aen dese side des waters des Morenlants,

+ A vers 1

2

dwelcke legaten, oft ambassaten seyndt op den meyre, ende met riet schepen opten water vaert. Gaet hen ghi snelle boden, totten volcke, dat tot verschoren ende plonderen gheneycht is, totten volcke, dat grouwelijcker is, dan ergens eenich andere, totten volcke dat hier ende daer wtgetogen is, om te verderuen, wiens lant met riuieren onderscheyden is, wiens die waterstroomen haer lant in nemen:

3

Alle ghi die opter aerden woont ende inden lande sittet, ghi sult sien, hoe datmen die banier opten berghe verthoonen sal, ende hooren hoe datmen die trompetten blasen sal.

4

Want also spreect die HERE tot mi, Ic wilt stille houden, ende besien in mijnder woninge, ⁺ gelijc als een hitte die den regen wt droocht, ende ghelijc eenen hoydauwe in die hitte des oogst,

+ B vers 4

5

want door den oogst sullen die vruchten verderuen. Ende die onrijpe vruchten int bloeyen verdorren datmen die stelen met wijnranc messen sal moeten afsnijden ende die rancken afhouwen ende wech werpen,

6

datmen tsamen sal moeten laten ligghen, voor die vogelen opten berge, ende den beesten inden lande. Ia dat des somers die vogelen daer in nestelen. Ende dat des winters alderley ghedierte inden lande daer inne haer onthouden moghen.

7

Tot dier tijt, sal dat verschorende ende roofachtich volc, dwelc grouwelijcker is dan yewaerts eenich ander, dat hier ende daer wtgetogen is om te vertreden oft te verderuen welckes dye waterstroomen sijn lant in nemen, geschencken brengen den HERE der heyrscaren, op die plaetse, daer den name des HEREN der heyrscaren is, opten berghe Zion.