Den Bybel met groter neersticheyt ghecorrigeert (Liesveltbijbel 1542)

Van gehoorsaemheyt diemen Gode ende den ouersten schuldich is. Van des eedts schult, datmen die lancmoedicheyt Goods niet verachten en sal, Dattet den mensche onmoghelijck is dye wercken die inder werelt sijn, te begrijpen.

Dat .viij. Capittel.

1

⁺DIe wijsheyt des menschen verlicht sijn aensichte, mer wie wreet is, die is viantlijc,

+ A vers 1

2

Ic neme des conincx mondt ware, ende des eedts Goods,

3

En haest niet van sinen aenschijn te gaen, ende en blijft niet in een quaet dinc, want hi doet wat hem gelust,

4

In des conincx woort is macht, ende wye mach tot hem seggen, wat maect ghi?

5

wie dat ghebot hout, die en sal nyet quaets onderuinden, Maer eens wijsen herte weet tijt ende wijse,

6

want een yegelijc voornemen heeft sinen tijt ende wijse, want des ongelucx des menschen is vele bi hem,

7

want hi en weet nyet wat gheweest is, Ende wie wil hem segghen wat sijn sal,

8

Een mensche en heeft geen macht ouer den gheest, den geest te weten, ende en heeft gheen macht ter tijt des steruens, Ende en wert niet losse ghelaten inden strijt, ende dat godloose wesen, en verlost den godloosen niet.

9

⁺Dat hebbe ic al gesien, ende ghaf mijn herte op alle wercken die onder der sonnen gheschieden, Een mensche heerschapt somtijden ouer den anderen tot sinen ongeluc,

+ B vers 9

10

Ende daer sach ic godlose die gegrauen waren, Die gegaen waren, ende ghewandelt hadden in heylige plaetsen, ende waren vergeten inder stadt, dat si alsoo ghedaen hadden, dat is ooc ydel.

11

Om dat niet volliken een oordele en geschiet ouer die quade wercken, daer door wert dat herte der menschen vol quaets te doen,

12

⁺Al ist dat een sondaer hondert mael quaet doet, ende nochtans langhe leeft, So weet ic nochtans dat wel gaen sal den ghenen, dye God vreesen, die sijn aensicht vermijden,

+ C vers 12

13

want het en sal den godlosen niet wel gaen, ende gelijc een schaduwe, niet langhe leuen, die God niet en vreesen.

14

Daer is een ydelheyt die opter aerden gheschiet, Het sijn gerechtige, dien gaet het als oft si wercken der godloser hadden, ende het sijn godlosen, dien gaet het als oft si wercken der gerechtiger hadden. Ic sprac, Dat is ooc ydel,

15

⁺daerom loofde ic die vruechde, dat die mensche niet beters en heeft onder der sonnen, dan eten ende drincken, ende vrolic sijn, ende sulc ghewerde hem vanden arbeyt sijn leuen lanc, dat hem God geeft onder der sonnen.

+ D vers 15

16

Ic gaf mijn herte om te weten die wijsheyt, ende om te aenschouwen die moeyte, die opter aerden geschiet, dat een ooc noch dach noch nacht den slape en siet met sinen ooghen.

17

Ende ic sach alle wercken Gods Want een mensche en can dat werck niet vinden, dat

[p. *]

onder der sonnen geschiet, Ende so dye mensche meer arbeyt om te soecken so hi min vindt. Al ist dat hi al seyt, ic ben wijs om te bekennen, so en can hijt nochtans niet vinden.