Den Bybel met groter neersticheyt ghecorrigeert (Liesveltbijbel 1542)

¶ Een vaderlijcke vermaninghe, der wijsheyt aen te hanghen, met den profijte daer aen hanghende, ende hoe datmen die leden des lichaems voor quaet behoeden sal.

Dat .iiij. Capittel.

1

⁺HOort mijne kinderen die onderwisinge ws vaders, ende merct, op dat ghi die verstandenisse bekennet,

+ A vers 1

2

want ic gheue v een goede leeringe, en verlaet mine wet niet

3

Want ic was mijns vaders soon, een teeder ende een eenige voor mijn moeder,

4

Ende hi leerde mi ende sprac, Laet v herte mijne woorden om nemen, houdt mijne geboden so suldi leuen.

5

Vercrijcht wijsheyt, vercrijget verstandenisse, en vergetet niet, ende en wijct niet vander redene mijns monts,

6

En verlaetse niet, so sal sy v behouden, bemintse, so sal si v bewaren,

7

Vercrijcht die wijsheyt voor die eerstelingen der wijsheyt, ende vercrijcht die verstandenisse voor alle uwe besittinge,

8

verhoochtse, so sal si v verhoogen, ende sal v tot eeren maken, ist dat ghise aenueert,

9

Sy sal v hooft scoon toe maken, ende sal v vercieren met eender fraeyer croonen.

10

⁺Hoort mijn kint ende ontfanct mijn redene, soo sullen uwer iaren veel worden,

+ B vers 10

11

Ick wil v den wech der wijsheyt leyden.

12

Ick wil v op die rechte bane leyden, Dat wanneer ghi gaet, uwen ganc niet suer en worde, ende als ghi loopt, dat ghi v niet en stoot,

13

Vaet dye onderwijsinghe, en laetse niet, bewaertse, want si is v leuen.

14

En comt niet op der godlooser padt, ende en treet niet op den wech der boosen,

15

Laet hem varen, ende en gaet niet daer inne, ⁺ Wijcket van hem ende gaet voorby,

+ C vers 15

16

Want si en slapen niet, si en hebben quaet gedaen, ende si en rusten niet, het en si dat si schade hebben gedaen,

17

want si voeden hen van ongodlijcken broode, ende drincken vanden wijn des ongerechticheits,

18

Maer der gherechtiger pat blinct gelijc een licht dat daer voort gaet, ende lichtet totten vollen dach toe,

19

Maer der godloser wech is doncker, ende en weten niet waer si vallen sullen.

20

Mijn sone aenmerct op mijne woorden, ende neycht v oore tot mijnder redene,

21

en laetse nyet van uwen oogen varen, behoutse in uwer herten,

22

Want si sijn dat leuen den ghenen diese vinden, ende ghesont haren geheelen lijue,

23

Bewaert v herte met alder neersticheyt, want daer wt gaet dat leuen,

24

⁺doet van v den verkeerden mont, ende laet die lasterlippen verre van v sijn,

+ D vers 24

25

laet uwe ogen stracx voor hen sien,

26

ende uwe wijnbrauwen, recht voor v henen sien. Laet uwe voeten gelijc voor hen gaen, so worden alle uwe weghen gheuordert, En wanckelt niet ter rechter noch ter slincker siden, keert af uwen voet vanden quaden.