Den Bybel met groter neersticheyt ghecorrigeert (Liesveltbijbel 1542)

¶ Een copie des mandements dwelck dye Coninck Artaxerxes wt hadde laten gaen in alle landen, wt ingeuen Amans des hoofmeesters, datmen ouer al dye Ioden soude wtroeden ende ter doot brenghen.

Dat .xiij. Capittel.

1

⁺DIe groote Coninck Artaxerxes die van India aen tot Ethiopiam ouer hondert ende seuenentwintich landen regneerdt, ontbyet allen den vorsten ende lantuoechden dye sijnder ghewalt onderworpen sijn, vriendelijcke groete,

+ A vers 1

2

Als ic een heere gheworden ben ouer veel volcx, ende den gantschen aertbodem in mijnder ghewalt gebracht hebbe, so en hebbe ic nyet met vermetentheyt ende onrecht my van mijnder macht weghen willen verheffen, mer ic hebbe voor my ghenomen dye ghene die onder mijn gewalt sijn met behoorlicheyt ende saechtmoedicheyt altijt te regeren, ende die gansschelic in een rustich leuen te stellen. Daer mede ooc mijn rijck ten vrede te brengen, datment ouer al sekerlic mochte doorreysen, ende oock den vrede dye alle menschen begheeren, wederomme te vernieuwen,

3

Als ic nv met mijne raetsheren ouerleyde, hoe dat alsulcke tot eenen goeden eynde gebracht mochte worden, ⁺ soo was een daer by ons in voorsichticheyt die voornaemste, wiens goetwillicheit, trouwe ende gelooue dicwils betoont ende beproeft is geweest, dye welcke ooc dye voornaemste ende eerlijcste naest den coninck was, met name Aman,

+ B vers 3

4

die ghaf ons te kennen, hoe dat een rebellich volc in alle den lande ingeulochten had, dwelc tegen alle andere lieden statuten ende wetten maecten, ende dwelcke ooc der Coninghen wtgegaen mandementen altijt verachtede, waerom niet toe te laten en is, dat alsulc regiment bi v lieden sonder afstellinge mochte blijuen.

5

Als wy sulcx vernomen hebben dat dat volck gansch ende eenen yeghelijcken contrarie is, ende by haer vreemde ende ander insettinghen ghebruyct, oock onser settingen ende handelinghen wederstaet, ende neemt voor hem quade saken te volbrenghen,

6

Daerom dat onse rijck tot eenen goeden staet ende stantachticheyt come, so hebben wi gheboden, dat alle die ghene dye v lieden van Aman (welcke ouer alle onse saken gheset ende gheordineert is, dye voornaemste na den coninc, ende ooc also vele als een vader is) int ghescrift gheoordineert ende betoocht worden, dat dye met wijf ende kinderen sullen wtgeroedet ende verdaen werden met haerder vyanden ende haerder wederpartijen sweert, ende dat daer ooc geen ontfermherticheyt ghebruyckt, oock nyemant ghespaert en worde,

7

ende dat sal gheschieden den .xiij. dach der twaelfster maent Adar ghenoemt van desen iare op dat die ghene die van oudts heyr altoos ende ooc noch op desen tijdt rebellich gheweest zijn, op eenen dach met ghewalt inder hellen afghestooten worden, dat also ons regiment volcomen vrede ende rust hebben mach.

8

⁺Mardocheus dacht aen alle die wercken ende grooten daden des HEEREN, heeft hem ghebeden met dese woorden.

+ C vers 8

9

⁺ O HEERE HERE gheweldighe almachtighe coninck, want in dijnder ghewout zijn alle dinghen, ende als ghi Israel helpen ende verlossen wilt, so en mach v nyemant wederstaen noch beletten.

+ Tgebet Mardochei.

10

Want ghi hebt den hemel ende die aerde ghemaect, ende so wat wonderlicx onder den hemele is,

11

du bist aller dingen een HERE, daer en is ooc nyemant die v O HERE wederstaen mach,

12

Du weetst alle dinghen Du weetst HERE dat ick noch wt boosheyt, noch wt hoochmoet, noch wt eerbegeeringe dat niet ghedaen en hebbe, dat ic niet en hebbe willen mi neygen noch bucken voor den hooueerdigen Aman,

13

want ick wel te vreden ware geweest, ende goetwillich sine voetstappen te cussen,

14

in dien dat Israel ten besten hadde moghen gheschieden, mer ic hebbe dat ghedaen op dat ic des menschen eere nyet en soude voor Goods eere setten,

15

⁺ende dat ic nyemant en soude aenbeden dan v mijnen HERE alleene, ende dat en sal ick in gheenen stouten noch houaerdigen moedt doen. Ende daeromme O HERE God ende coninc spaert dijn volc, want si leggen daer op toe, hoe dat si ons mochten vernielen,

+ D vers 15

16

si dencken ende begheeren te verderuen, ende te verdoen dat volck, die welcke altoos v erffenisse gheweest is, En wilt niet verachten v deel dat ghi v selfs wt den lande Egipti verlost ende gheleyt hebt.

17

Verhoort mijn ghebet, ende weest ghenadich, dijnen volcke, dat ghi v tot eenen erue vercoren hebt, verandert onse clage ende droefheyt in vruechde, dat wi leuende blijuen, O HERE ende dijnen name louen mogen, En wilt doch den mont der gheenre die v louen nyet laten (O HERE) verdaen werden.

18

Dier ghelijcken riep ooc dat gansschen volc Israel so crachtelijc als si ymmermeer mochten totten HERE, want haer doot ende verderffenisse stont haer lieden voor den ooghen.