Den Bybel met groter neersticheyt ghecorrigeert (Liesveltbijbel 1542)

Dat vier coemt vanden hemele, ende verteert die offerhande, Die coninc ende dat volck offeren. Die HERE openbaert den coninck Salomon, ende hi belooft hem, dat hi hem wil verhooren

Dat .vij. Capittel

[p. *]

1

⁺ENde doe Salomo wt gebeden hadde, so viel een vier vanden hemel, ende verslinde dat brantoffer, ende dat ander offer, ende die heerlicheyt des HEREN veruulde dat huys,

+ A vers 1

2

dat die priesters niet en conden in gegaen, int huys des HEREN, Wandt dye heerlicheyt des HEREN veruulde des HEREN huys.

3

Ooc sagen alle kinderen Israel, dat vier af vallen ende die heerlicheyt des HEREN ouer dat huys, ende vielen op haer knyen metten aensichte ter aerden, opt plaueytsel, ende aenbaden ende dancten den HERE, dat hi goet is, ende dat zijn ontfermherticheyt eewelijc duert.

4

⁺Die coninck ende alle tvolc offerden voor den HEERE,

+ B vers 4

5

want die coninc Salomo offerde tweentwintich duysent runderen, ende hondert ende twintich dusent scapen, ende wijden also dat huys Gods, beyde die coninc ende alle tvolc.

6

Mer die priesters stonden in hare officien ende die Leuiten in die musijcspelen des HEREN dye de coninc Dauid hadde laten maken, om den HERE te dancken, dat sine groote ontfermherticheyt eewelijc duert, metten Psalmen Dauid door hare handt. Ende die priesters bliesen trompetten voor hen, ende gheheel Israel stont.

7

Ende Salomo heylichde den middelhof dat voor den huyse des HEREN was, Wandt hy hadde aldaer brantoffer ende dat vette der dootofferen bescicket, want den metalen outaer, dye Salomo hadde laten maken en conste alle dat brantoffer, spijsoffer, ende dat vette niet gheuaten.

8

⁺Ende Salomo hielt in dye selue tijt een feeste seuen dagen lanc, ende geheel Israel met hem, een seer ontallike groote gemeynte, van Hamath aen, totter beken Egipti toe,

+ C vers 8

9

ende hielt opten achsten dach een vergaderinge, want die wijdinge des outaers hielden si seuen daghen, ende die feeste ooc seuen dagen.

10

Mer inden .xxiiij. dage der seuender maent, liet hi dat volc vrolic ende goetsmoets in haren tabernaculen gaen ouer alle den goede, dat dye HERE aen Dauid ende Salomo, ende alle sijn volc Israel gedaen hadde,

11

Also voleynde Salomo dat huys des HEREN, ende dat huys des conincx, ende al dat in sijnder herten gecomen was te maken, inden huyse des HEREN, ende in sinen huyse voorspoedelick.

12

⁺Ende die HERE openbaerde Salomo tsnachts, ende sprac tot hem, ⁺ Ic heb v gebet gehoort, ende mi dese plaetse vercoren, tot eenen offerhuyse,

+ D vers 12

+ iij.regum. vij. vi

13

siet, Als ick den hemel toe sluyte, dattet niet en reghent oft heet dye sprinchanen dat lant verslinden, oft late een pestilencie ouer mijn volc comen,

14

dat si mijn volc verootmoedigen dat na mijnen name ghenoemt is, ende si bidden, ende mijn aensichte soecken, ende si hen van haren quaden seden bekeeren, so wil ic vanden hemel hooren, ende haer sonden vergeuen, ende haer lant heelen.

15

So sullen nv mijn oogen open sijn, ende mijn ooren toe luysteren totten ghebede, in deser plaetsen.

16

Dus heb ic nv dit huys vercoren, ende geheylicht, dat mijnen name daer sijn soude eewelijc, ende mijne oogen, ende mijn herte soude altoos daer sijn.

17

Ende ist dat ghi voor mi wandelt, gelijc v vader Dauid gewandelt heeft, dat ghi doet al dat ic v heete, ende hout mijn seden ende rechten,

18

so wil ic den stoel ws conincrijcx beuestighen, so ic mi, dijnen vader Dauid verbonden hebbe, ende geseyt. Het en sal v nyet gebreken aen eenen man die ouer Israel heere si,

19

Mer keert ghi v af ende mijn geboden ende seden die ic v voorgeleyt hebbe verlaet ende wech gaet, ende anderen goden dient, ende dien aenbidt

20

so sal icse wtwortelen wt mijnen lande, dat ic hen gegeuen heb, ende dit huys dat ic mijnen name geheylicht hebbe sal ic van mijnen aensichte werpen, ende salt tot eender byspraken oft segwoort geuen, ende tot eender fabulen onder allen volcken.

21

Ende voor dit huys dattet hoochste gheworden is, sullen hen ontsetten, alle die daer voorbygaen, ende segghen, Waerom heeft die HERE desen lande ende desen huyse also gedaen,

22

so salmen segghen, Daeromme dat si den HERE haerder vaderen God verlaten hebben, diese wt den lande Egypti gheleyt heeft, ende hebben hen aen anderen goden ghehanghen, ende die aengebedet, ende ghedient, daerom heeft hi alle dit ongeluc ouer hen ghebracht.