Den Bybel met groter neersticheyt ghecorrigeert (Liesveltbijbel 1542)

Hoe dauid die Arcke op haer plaetse settede met vruechden, offerhanden ende loofsanghe.

Dat .xvij. Capittel.

1

⁺ENde doen si die Arcke Gods in brachten, so stelden sise inden Tabernacule dyen haer Dauid opgerecht had, Ende offerden brantofferen ende dootofferen voor Gode,

+ A vers 1

2

Ende doe Dauid die brantofferen ende dootofferen voleyndt hadde, so gebenedijde hy dat volck inden name des HEREN,

3

ende deelde elcken in Israhel, beyde mannen ende vrouwen, een stuc broots ende vleesch ende soppe.

4

Ende hi stelde voor die Arcke des HEREN, sommige Leuiten tot dienaers, dat si den HERE den God Israel, prijsen, dancken, ende louen souden, te weten,

5

Assaph den eersten, Sacharia den anderen, Ieiel, Semiramoth Iehiel, Mathithia, Eliab, Benaia, ObedEdom, ende Ieiel met psalteren ende herpen, mer Assaph met hellen cymbalen

6

Benaia ende Iehasiel die priesteren, met trompetten altoos voor die Arcke des verbonts Gods.

7

⁺In die tijt bestelde Dauid ten eersten den HERE te dancken door Assaph ende sine broeders. ⁺

+ B vers 7

+ psa. ciiij

8

Dancket den HERE, roepet sinen name aen, maket condich onder den volcken, sijn doen ofte daet.

9

Singet, spelet, ende dichtet hem, van allen sinen wonderlicheden

10

looft sinen heyligen name. Dat herte der geenre die den HERE soecken, verblide hem

11

Soect den HERE ende sine stercheit, soect sijn aensicht altoos,

12

ghedenct sijnder wonderlicheden die hi gedaen heeft, sijnder wonderlijcker wercken, ende oordelen sijns monts.

13

Ghi zaet Israel sijns knechts, ghi kinderen Iacob sijns wtuercorens,

14

Hi is die HERE onse God, sijn oordelen sijn in allen landen.

15

Gedenct eewelic sijns verbonts, wat hi geboden heeft in duisent geslachten.

16

Dat hi gemaect heeft met Abraham ende sijns eedts aen Isaac.

17

Ende hi stelde Iacob tot eenen recht, ende Israhel tot eenen eewigen verbont.

18

Ende sprac, Ic wil v dat lant Canaan gheuen, dat snoer ws erfdeels.

19

Doen si noch weynich waren int getal ende cleyne, ⁺ ende vreemdelingen daer inne.

+ psa. ciiij psa xciij

20

⁺Ende si trocken vanden eenen volc totten anderen, ende wt den eenen conincrijcke totten anderen.

+ C vers 20

21

Hi en liet hen nyemant scade doen, ende strafte die coningen om haren wille,

22

En tast mijne gesalfde niet aen ende en doet niet quaets aen mijnen propheten.

23

Singet den HERE alle ^a lant, vercondiget dagelicx sijn heyl,

a Lant dat sijn alle menschen Ge. vi b

24

vertelt onder die heydenen zijn heerlijcheyt ende onder den volcken sijn wonderlicheden.

25

Want die HERE is groot ende wtermaten looflic, ende veruaerlic ouer alle goden.

26

Want alle die goden der heydenen sijn afgoden, mer die HERE heeft den hemel gemaect.

27

Lof ende eere is voor hem, cracht ende blijscap is in sijn plaetse,

28

Geeft herwaerts den HERE ghi gheslachten der volcken, geeft herwaerts den HERE eere ende cracht.

29

⁺Geeft herwaerts des HEREN name die eere brenget giften ende comt voor hem, ende aenbidt den HERE in zijn heylige cieragie.

+ G vers 29

30

Alle lant ontsette hem voor hem Hi heeft dat aert-

[p. *]

rijc bereyt, dat het nyet beweecht en wort.

31

Den hemel verblijde hem, ende die aerde si vrolijck Ende men segghe onder die heydenen, dat die HERE regneert.

32

Die zee dondere ende hare volheit, ende dat velt si vrolic, ende alle dat daer inne is.

33

Dan iuychten alle boomen in dat wout voor den HERE, want hi comt om te oordelen die aerde.

34

Danct den HERE, want hi is lieflic, ende sijn ontfermherticheyt dueret eewelic.

35

Ende segt, Helpt ons God onse salichmaker, ende vergadert ons, ende verlost ons wt den heydenen, op dat wy uwen heyligen naem dancken, ende di lof seggen.

36

⁺Ghelooft si dye HERE dye God Israel, van eewicheyt tot eewicheit, ende alle dat volc segge Amen ende lof si den HERE.

+ D vers 36

37

Aldus liet hy aldaer voor die Arcke des verbonts des HEREN, Assaph ende zijn broeders om te dienen voor die Arcke altoos, elcken dach zijn dachwerc,

38

mer ObedEdom ende haer broeders .lxviij. ende ObedEdom den sone Iedithun, ende Hossa tot poortiers,

39

Ende Zadok den priester ende sine broeders, dye priesters liet hi voor dye wooninge des HEREN opter Hoochten tot Gibeon,

40

dat si den HERE daghelicx brantoffer souden doen, op des brantoffers outaer, des morgens ende des auonts, so inder wet des HEREN gescreuen staet, dye hi Israel gheboden hadde.

41

Ende met hen Heman ende Iedithun, ende die ander wtuercorene, dye met namen genoemt waren, om den HERE te dancken, dat sine ontfermherticheit eewelijck duert

42

ende met hen Heman ende Iedithun met trompetten ende cimbalen te clincken, ende met snaren ofte musijcspelen Gods Mer die kinderen Iedithun maecte hi poortwachters

43

Also troc al dat volc wech, elc in sijn huys, ende Dauid keerde ooc wederom zijn huys te seegenen.