Den Bybel met groter neersticheyt ghecorrigeert (Liesveltbijbel 1542)

Hoe dat Iosias dat boeck des verbonts dede den volcke lesen, Ende hoe hi die rechte Gods eere weder oprechte, Van Ioachas sinen sone.

Dat .xxiij. Capittel.

1

⁺ENde doen die coninc wech sant so vergaderden hen tot hem alle de ouders in Iuda ende Ierusalem,

+ A vers 1

2

ende de coninc ghinc op int huis des HEREN, ende alle mannen Iuda, ende al de inwoonders te Ierusalem, met den priesters ende propheten, ende allet volc beyde cleyn ende groot, ende men las voor haer ooren alle die woorden des boecx, vanden verbonde dat inden huyse des HEREN geuonden was,

3

ende die coninck ginc aen een calomne, ende maecte een verbont voor den HERE, dat si den HERE na souden volgen, ende houden sine geboden getuygenisse, ende seden, wt gheheelder herten, ende wt geheelder sielen, dat si op souden rechten die woorden des verbonts die gescreuen stonden in desen boec. Ende allet volc terde in dat verbont.

4

Ende die coninc geboot den hoogen priester Hilkia, ende den priester der tweeder oordinen, ende den duerwachters aenden dorpel, dat si wt den tempel souden doen alle die vaten die den Baal, ende den Bosschen, ende alle den heyr des hemels gemaect waren, ende verbrandese buyten voor Ierusalem, int dal Kidron, ende haer stof wert gedragen tot Bethel,

5

ende hi dede die Camarim af, dewelcke die coningen Iuda gesticht hadden, om op de Hoochten te roocken inden steden Iuda, ende rontom Ierusalem, Ooc die roockers Balaas, ende der Sonnen ende der Manen, ⁺ ende der twaelf tekenen, ende alle des heyrs aenden hemel,

+ B vers 5

6

Ende dede dat boschken wt den huise des HEREN voeren, buyten voor Ierusalem in dye beke Kidron, ende verberndet in die beke Kidron, ende maectet tot puluer, ende werp dat stof op die grauen der gemeynder lieden.

7

Ende hi brac af die huysen der hoereerders, die aenden huyse des HEREN waren daer inne die wijuen, huysen totten boschken maecten.

8

Ende hi liet alle priesters wt den steden Iuda comen ende veronreynichde de Hoochten daer die priesters roocten, van Geba aen, tot Berseba toe, ende brac de Hoochten in die poorten af, die dueren der poorten waren Iosua des stadt voechs oft baeliou, welc ter slincker hant was, alsmen totter poorten der stat gaet,

9

nochtans en hadden die priesters der Hoochten noyt opten outaer des HEREN te Ierusalem geoffert, mer si aten vanden ongesuerden broode met haren broederen.

10

⁺Hi ontsuyuerde oock dat Tophet in dat dal der kinder Hinnon, op dat niemant sinen soon oft sine doch-ter den Molech doort vier en liet gaen,

+ C vers 10

11

Ende dede dye peerden af, welcke die coningen Iuda der sonnen hadden geset, inden inganc des HEREN huys, tot een teeken NethanMelech, des Camerlincx, die tot Parwarim was, ende de wagens der sonnen verbernde hi met vier,

12

ende die outaers opt dack inden sael Ahab die dye coningen Iuda gemaect hadden, Ende dye outaers die Manasse gemaect hadde inden twee houen des HEREN huys, brac de coninc af, ende liep van daer ende wierp haren stof in die beke Kidron.

13

Ooc die Hoochten die voor Ierusalem waren ter rechter hant aenden berch Mashith, die Salomo die coninc Israel getimmert hadde Astharoth den grouwel van Sidon, Ende Camos den grouwel van Moab ende Milcom den grouwel der kinderen Ammon, veronreynichde die coninc,

14

ende brac die calomnen, ende wtroyede die bosschelkens, ende veruulde hare plaetse met menschen gebeenten.

15

⁺Ooc den outaer te Bethel, de hoochte die Ierobeam gemaect hadde, die sone Nebath, die Israel sondigen dede, den seluen outaer brac hi af, ende de hoochte ende maectese tot puluer, ende verbrande dat boschken,

+ D vers 15

16

ende Iosia keerde hem om, ende sach die grauen die opten berch waren, ende sant wech, ende liet de knoken of beenen wt desen grauen halen, ende verbrandese opten outaer, ende verontreynichde dien na den woorde des HEREN, dat die man Gods wtgeroepen had, die sulcx voorseit had.

17

Ende hi sprac. Wat is den titel die ic hier sie? ende die lieden inder stadt spraken tot hem, Het is dat graf des mans Gods, die van Iuda quam, ende riep dat wt, dat ghi gedaen hebt tegen den outaer te Bethel,

18

ende hi seyde, Laet hem liggen, niemant en bewege sijn gebeente, Also worden sine gebeenten gesalueert, metten gebeenten des propheten die van Samaria gecomen was.

19

⁺Hi dede ooc wech alle die huysen der Hoochten inden steden Samarie, welcke die coningen Israel gemaect hadden om te vertoornen, ende dede met hem in alle manieren so hijt tot Bethel gedaen hadde,

+ E vers 19

20

ende hy offerde alle priesters der Hoochten die daer waren op die outaren, ende verbernder also menscen beenen op, ende quam weder te Ierusalem.

21

Ende die coninc geboot den volc ende sprac, Hout den HERE uwen God paesschen, so het ghescreuen staet inden boec des verbonts.

22

Want daer en was gheenen paesscen so gehouden als desen, van der rechters tijt aen die Israel geordeelt hebben, en in allen den tijden der coningen Israel, ende der coningen Iuda,

23

maer inden achtthienden iare des conincx Iosia wert desen paesschen gehouden den HERE te Ierusalem.

24

Ooc vaechde Iosias wt alle waerseggers, tekenbediers, beelden ende afgoden, ende alle grouwelen dye inden lande Iuda ende Ierusalem gesien worden, op dat si die woorden der wet op souden rechten, die gheschreuen stonden inden boec dat Hilkia die priestere inden huyse des HEREN vont,

25

Sijns gelijcken en was voor hem geen coninc geweest, die also wt geheelder herten, wt geheelder sielen, wt allen crachten hem totten HERE keerde, na alle die wet Mose, ende na hem en quam sijns gelijcken niet op.

26

Nochtans en keerde hem die HERE niet vander verbolgentheit sijnder groter gramscappen, ⁺ daer mede hy ouer Iuda vertoont was, om alle die verweckinge of tempteringe, daer mede hem Manasse verwect had,

+ F vers 26

27

Ende die HERE sprac, Ic wil van Iuda mijn aensichte doen, gelijc ic Israel wech ghedaen heb, ende wil dese stadt verwerpen, die ic vercoren had, te weten Ierusalem

[p. *]

en dat huys daer ic af gheseyt hebbe, Minen name sal daer sijn,

28

Wat meer van Iosia te segghen is, ende al wat hi gedaen heeft, siet dat is gescreuen inde cronike der Coningen Iuda.

29

Tot sijnder tijt troc Pharao Necho, die coninc in Egypten op, tegen den coninc van Assyrien, aen dat water Phrath, Mer die coninc Iosia troc hem tegen, ende sterf in Megiddo, doe hi hem gesien hadde,

30

ende zijn knechten voerden hem doot van Megiddo, ende brachten hem tot Ierusalem, ende begroeuen hem in sinen graue. Ende dat volc inden landen nam Ioahas den soon Iosia, ende salfden hem, ende maecten hem coninc in sijns vaders stede.

31

Drientwintich iaer was Ioahas out, doen hi coninc wert, ende regneerde drie maenden te Ierusalem ⁺ Sijn moeder hiet Hamutal, een dochter Ieremia van Libna,

+ G vers 31

32

ende dede dat den HERE mishaechde, ghelijc sine vaders gedaen hadden.

33

Mer Pharao Necho vinc hem te Rillat, inden lande Hemath, op dat hi niet regneren en soude te Ierusalem, ende leyde een scattinge opt lant, hondert pont siluers, ende een pont gouts,

34

Ende Pharao Necho maecte Eliakim den sone Iosia coninc in sijns vaders Iosia plaetse, ende keerde sinen name Ioiakim, mer Ioahas nam hi ende bracht hem in Egipten, aldaer sterf hi.

35

Ende Ioiakim gaf dat siluer ende gout Pharao nochtans schatte hi dat lant, dat hi dat siluer soude geuen na dat beueel Pharao, Elcken na sinen vermogen scatte hi aen siluer ende gout, onder dat volc inden lande, dat hi den Pharao Necho gaue,

36

Ioiakim was .xxv. iaer out doe hi coninc wert, ende regneerde elf iaer te Ierusalem, Sijn moeder hiet Sibida, een dochter Pedaia van Ruma,

37

ende dede dat den HERE mishaechde, gelijc sijn vaders gedaen hadden.