Den Bybel met groter neersticheyt ghecorrigeert (Liesveltbijbel 1542)

Van Osea, hoe hem Salmanassar verwan, ende Samariam in nam, ende die inwoonders wech voerden. Ende hoe God dye strafte die welcke in haer plaetse int lant quamen.

Dat .xvij. Capittel.

1

⁺INden tweelfsten iare Ahas des conincx Iuda wert coninc ouer Israel tot Samarien, Hosea die sone Ela, negen iaer,

+ A vers 1

2

ende dede dat den HEERE mishaechde, nochtans niet gelijc dye coninghen in Israel die voor hem waren.

3

Teghen den seluen troc op Salmanasser die coninc tot Assyrien, Ende Hosea wert hem onderdaen, also dat hi hem giften schencte,

4

Mer doen doe coninc van Assirien seker wert dat Hosea een verbont op stelde, ende boden tot So, den coninc van Egipten hadde gesonden, ende niet alle iaer den coninc tot Assirien giften ouer een reycte, so belegherde hi hem, ende leyde hem in die geuangenisse,

5

Ende die coninck tot Assyrien troc opt geheele lant, ende tot Samaria, ende belegherdese drie iaer.

6

Ende inden negenden iaer Hosia wan dye coninc tot Assyrien Samaria, ende voerde Israel wech in Assyrien, ende settese tot Halach ende tot Habor, aent water Gozam, ende inden steden der Meden.

7

Want doen die kinderen Israel tegen den HERE haren God sondichden diese wt den lande Egypti gheleyt hadde, ⁺ wt der hant Pharao, des conincx in Egipten, ende ander goden vreesden,

+ B vers 7

8

ende wandelden na den seden der heydenen, die die HERE voor die kinderen Israel verdreuen hadde, ende gelijc dye coningen Israel deden,

9

ende si verwecten tot gramscap den HEERE haren God met boosen stucken die niet goet en waren, te wetene, dat si die hoochten timmerden in allen steden, beyde in sloten ende vasten steden

10

ende rechten calomnen op, ende bosscelkens op allen hoogen houelen, ende onder alle groene boomen,

11

Ende wierpen aldaer wierooc op allen hoochten gelijc die heydenen, die die HERE voor hen wech gedreuen had, ende bedreuen quade stucken, daer si den HERE mede vertoornden,

12

ende dienden den afgoden, daer af die HERE tot hen geseyt had, ghi en sult dat niet doen

13

⁺Ende als die HERE getuychde in Israhel ende Iuda door alle propheten ende Scouwers oft sienders, ende liet hen seggen, Keert omme van uwen bosen wegen, ende hout mine geboden ende seden, na alle wetten die ic uwen vaderen geboden hebbe, ende die ic tot v geseynt hebbe, door mijne knechten die propheten,

+ C vers 13

14

Soe en hoorden si niet, mer verherden hare necken als die necken haerder vaders, die niet en geloofden aenden HERE haren God,

15

daer toe verachten si sine seden, ende sijn verbont dat hi met haren vaderen gemaect hadden, ende sine getuygenisse die hi onder hen dede, mer wandelden na haer ydelheyt, ende worden ydel, na die heydenen die om hen woonden, van welcken hen die HERE geboden hadde, dat si niet en souden doen als die,

16

Mer si verlieten alle die geboden des HEEREN haers Gods ende maecten hen twee gegoten calueren ende boschkens, ende aenbaden alle dat ^a heyr des hemels ende dienden Baal,

a Hemels heyr dat en sijn niet alleen dye sterren ende ander planeten mer ooc alle dye crachten der hemelscher influentien. de. xvij.a

17

ende lieten hare sonen ende dochteren door tvier gaen, ende gingen met waerseggen ende touerien om, ende gauen hen ouer te doen dat den HERE qualic beuiel om hem te vertoornen

18

Doen wert die HERE seer toornich ouer Israel, ende dedese van sinen aensichte, also datter niet ouer en bleef dan den stam Iuda alleen,

19

Daer toe en hielt Iuda die geboden des HEREN haers Gods ooc niet, mer wandelden na den seden Israel die si ghedaen hadden,

20

Daerom verworp die HERE alle dat saet Israel ende drongse, ende gafse in die handen der roouers, tot dat hise van sinen aensichte wierp, Want Israel wert vanden huyse Dauid geschoort,

21

ende si maecten Ierobeam den sone Nebath tot eenen coninc, Die selue keerde Israel achterwaerts af vanden HERE, ende dede dat si swaerlijc sondichden,

22

Also wandelden die kinderen Israhel

[p. *]

in allen den sonden Ierobeam, die hi opgesteld had, ende en lieten daer niet af

23

tot dat die HERE Israel van sinen aensichte dede, so hi gesproken hadde door al sijn knechten die propheten, Also wert Israel wt sinen lande wech geuoert in Assyrien tot op desen dach.

24

⁺Die coninck tot Assyrien liet comen van Babel van Cutha, van Awa, van Hetmath, ende van Sepharnaim, ende besette die steden in Samaria, ende die steden der kinderen Israel, Ende si namen Samaria in, ende woonden inder selfder steden

+ E vers 24

25

Mer doen si daer begonsten te woonen, ende den HEERE niet en vreesden, seynde die HERE leeuwen onder hen, ende die verworchdense

26

Ende lieten den coninc van Assyrien seggen, Die heydenen die ghi hier hebt gebracht, ende die steden Samarie mede beset en weten vander manieren des Gods inden lande niet, daerom heeft hy onder haer leeuwen gesonden, ⁺ ende siet, die selue doodense om dat si dye manieren des Gods inden lande niet en weten

+ F vers 26

27

Die coninc tot Assyrien geboot ende sprac. Brenget een vanden priesters derwaerts, die van daer wech zijn geuoert, ende trect wech, ende woont aldaer, Ende hi leertse die wijse des Gods inden landen,

28

Doen quam een vanden priesteren die van Samaria wech geleyt waren, ende woonde te BethEl, ende leerdese hoe si den HEERE souden vreesen,

29

mer elc volc maecte sinen Godt, ende dedese indie huisen, op die hoochten die die Samaritanen maecten, elc volc in sijn steden daer si in woonden,

30

Die van Babel maecten Sochot, Benoth, dye van Chuth maecten Nerghel, Die van Hemath maecten Asima,

31

Dye van Awa maecten Nibehao ende Tharthak, die van Sephernaim verbernden hare sonen, den Adramelech, ⁺ ende Anamelech den goden dier van Sepharnaim.

+ G vers 31

32

Ende want si den HERE ooc vreesden, maecten si hen priesters opten Hoochten, wt den ondersten onder hen, ende dedense inden huysen opten Hoochten,

33

Also vreesden si den HERE, ende dienden ooc den afgoden nae elcx volcx wijse, van daer si ghebracht waren,

34

Ende tot op desen dach doen si na der ouder wijsen, dat si noch den HERE en vresen, noch hare seden ende recht en doen na de wet, ende geboden dat die HERE den kinderen Iacob geboden heeft,

35

den welcken hi den name Israel gaf, ende maecte een verbont met hen ende geboot hen ende sprac, en vreest geen ander goden, ende en aenbidtse niet, ende en dient hen niet, ende en offert hen niet,

36

mer den HERE, die v wt den lande Egypti geleyt heeft, met groter cracht, ende wtgerecten armen, dien vreest, dien aenbedet, dien offert,

37

ende die seden rechten oft ordeel, wet ende gebot, die hi v heeft laten scriuen, die houdet, dat ghi daer altijt na doet, ende ander goden niet en vreest,

38

ende des verbonts dat hi met v gemaect heeft, en vergetet niet, dat ghi ander goden niet en vreest,

39

Mer vreest den HERE uwen God, die sal v verlossen van uwen vyanden,

40

Maer dese en hoorden niet, maer si deden na hare voorledene wijse,

41

Also vreesden dese heydenen den HERE, ende dienden ooc haren afgoden Also deden ooc hare kinderen, ende kints kinderen, gelijc hare vaders gedaen hebben tot op desen dach