Den Bybel met groter neersticheyt ghecorrigeert (Liesveltbijbel 1542)

Hoe dat Ioas regneerde, die wijle dat Ioiada leefde, Ende hoe daer na Ioiada sterf

Dat .xij. Capittel

1

⁺INt seuenste iaer Iehu, wert Ioas Coninc, ende regneerde veertich iaer te Iherusalem, ⁺ sijn moedere hiet Zibea, van Bersaba

+ A vers 1

+ ij.Para. xxiiij.a.

2

ende Ioas dede wat recht was ende den HERE wel behaechde, also lange als hem die priester Ioiada leerde,

3

dan dat si dye hoochten niet af en deden, want tvolc offerde, ende wierp wierooc noch opten Hoochten

4

Ende Ioas sprac totten priesteren. Allet gelt dat geheylicht wort daer toe, dat het aent huys des HEREN gekeert soude worden, te weten, dat ghelt, dat elc geeft, inder scattinghe, ende dat ghelt dat elck voor zijn siel geeft, ende allet gelt, dat elc van vrier herten offert daer toe, dat aen thuys des HEREN gerekent soude worden, dat laet die priesters tot hen nemen,

5

elcken zijn deel, daer af sullen si reken of beteren, al wat verualt aen den huyse des HEREN, waer si vinden, dat yet verualt

6

⁺Mer doen die priesters tot int .xxiij.tichste iaer, des conincx Ioas, niet en reecten oft beterden dat veruiel aen den huyse,

+ B vers 6

7

doen riep die coninc Ioas den priester Ioiada, metten priesteren, ende sprack tot hen, Waerom en reket ghi niedt, wat verualle is aenden huyse, daer om en sult ghi nv niet tot v nemen dat gelt, elck sijn deel mer sullet geuen tot dyen dat veruallich is aenden huse,

8

Ende die priesters consenteerden vanden volc geen gelt te nemen, ende dat veruallende aen den huyse te reeken

9

Doen nam die priester Ioiada, een arcke oft kiste ende boorder bouen een gat in, ende settede ter rechter hant neffens den outaer, daermen in dat huis des HEREN gaet, ende die priesters, die aenden dorpel bewareden deden allet ghelt daer inne, dat tot des HEREN huys gebracht wert.

10

Als si dan sagen, dat veel ghelts inder kisten was, soo quam des conincx scriuer op metten hoogen priester, ende bonden dat gelt tsamen, ende telden dat al wat voor des HEREN huys geuonden wert

11

⁺Ende men gaf dat gelt gereet ouer, den genen dye daer arbeyden, ende ghestelt waren totten huyse des HEREN,

+ C vers 11

12

Ende si gauent wt den timmerlieden, die daer timmerden ende arbeyden aen den huyse des HEREN te weten, den muermakers, ende steeemetsers, ende die daer hout ende behouden steenen cochten, dat dat veruallen aen den huise des HEREN gebetert soude worden, ende al wat si beuonden van noode te sijn te beteren aenden huyse.

13

Nochtans en lietmen gheen silueren schalen maken, noch bekers, beckens, trompetten, noch eenige ghouden, oft silueren gereetscap, inden huyse des HEEREN, van dyen ghelde dat totten huyse des HERE gebracht wert,

14

mer men ghaf dat den arbeyders, ⁺ dat si daer mede dat veruallen aen den huyse des HEREN souden reeken.

+ D vers 14

15

Ooc en behoefden die mannen gheen rekeninghe dyemen dat ghelt dede, dat si dat den arbeyders souden geuen, Mer si hanteerdent op gelooue,

16

Maer dat gelt van schultofferen ende sondofferen, en werdt niet totten huy-se des HEEREN ghebracht, wandt het was der Priesteren.

17

Tot dyer tijt troc Hasael die coninc tot Sirien op ende street teghen Gath, ende wontse. Ende doen Hasael sijn aensichte stelde, om tot Hierusalem op te trecken,

18

nam Ioas, die Coninc Iuda alle dat geheylichde, dat sijn vaders Iosapht, Ioram ende Ahasia, dye Coningen Iuda gheheylicht hadden, ende wat hi gheheylicht hadde. Daer toe allet gout, datmen vant inden scat, inden huyse des HEREN, ende in des conincx huyse, ende seyndet tot Hasael den Coninc tot Sirien Doen troc hi af van Ierusalem

19

Wat meer van Ioas te seggen is, ende wat hy ghedaen heeft, dat is gescreuen in de Cronike der coningen Iuda,

20

ende sine knechten stonden teghen hem op, ende maecten een verbont, ende sloeghen hem inden huyse Millo, daer men af ghaet tot Silla,

21

Want Iosabat die sone Simeath, ende Iosabad die sone Somer, sine knechten sloegen hem doot, ende men begroef hem met sinen vaderen, in die stadt Dauid, ende Amasia sijn soon wert coninc in sijn plaetse.