Den Bybel met groter neersticheyt ghecorrigeert (Liesveltbijbel 1542)

Die arcke wort van Sion inden tempel die Salomo ghetymmert hadde, met grooter eeren ende vruechden gedragen Salomo looft den HERE, ende dat ganssche volc met hem Ende hi doet ooc sijn gebet aen God den HERE, ende hi wijdet den tempel

Dat .viij. Capittel

1

⁺DOen vergaderde die coninck Salomo tot hem die Ouders in Israel, ⁺ alle ouersten der stammen ende princen, die vaders onder den kinderen Israel te Ierusalem, ende die Arcke des verbonts, ⁺ des HEEREN op te brengen wt der stadt Dauid, dat is Zion,

+ A vers 1

+ ij.pa. v a

+ Dye werelt had gestaen iiij.m.c. ende .lxxix. iaer voor cristus geboorte .m. ende xx iaer

2

Ende alle mannen Israel vergaderden hen totten Coninc, Salomo, inder maent Ethanim op die feeste dat is die seuenste maent.

3

Ende doen alle Ouders Israel quamen, hieuen die priesters die Arcke des HEREN op, ende brachtense opwaerts,

4

daer toe den Tabernakel des getuygenis, ende alle ghereetschap des Heylichdoms dat inden tabernakel was, Dat deden die priesters ende die Leuiten,

5

Ende die Coninc Salomo ende die geheele ghemeynte Israel, die hen tot hem vergadert hadden, gingen met hem voor die Arcke henen, ende offerden scapen ende runderen, soo veel datment niet ghetellen noch gerekenen en conste

6

⁺Also brachten die priesters die Arcke des verbonts des HEREN op haer plaetse, inden choor des huys in dat Alderheylichste, onder die vlogelen der Cherubin,

+ B vers 6

7

Want die Cherubin breyden die voghelen wt, ouer die plaetse aldaer die Arcke stont, ende bedeckten die Arcke ende hare hantboomen van bouen.

8

Ende die hantboomen waren so lanc dat hare knoopen ghesien worden buyten den Heylichdom voor den choor, maer voorder buyten en werden si niet gesien, ende waren aldaer tot op desen dach,

9

Ende daer en was niet inder Arcken, dan die twee steenen tafelen Mosi, die hy aldaer liet te Horeb, Doen die HERE metten kinderen van Israel een verbont maecte, Doen si wt den lande Egipti getrocken waren

10

Doen die priesters wt den Heylichdom ginghen so veruulde een wolcke dat huys des HEEREN,

11

dat die priesters niet en conden staen, ende haren dienst volbrengen om der wolcken wille, want die heerlijcheyt des HEREN veruulde dat huys des HEEREN,

12

Doen sprac Salomo, die HERE heuet ghesproken, dat hi in dat doncker wil woonen,

13

Ic heb (tis waer) een huys getimmert v tot eender woninghen, eenen stoel dat ghi daer eewelic woonen sout.

14

Ende die Coninc keerde sijn aensicht, ende seegende die gheheele gemeynte Israel, ⁺ ende die geheele ghemeynte Israel stont, ende hi sprack

+ C vers 14

15

Gelooft si die HERE die God Israel, die door sinen mont mijnen vader Dauid ghesproken, ende door sijn hant veruult heeft, ende geseyt.

16

Vanden daghe aen doen ic mijn volc Israel wt Egipten leyde, so en heb ic noyt geen stadt vercoren, onder eenighen stamme Israel, dat mi een huys getimmert soude werden, ende mijnen name daer soude sijn, Mer ic heb Dauiden vercoren, dat hi ouer mijn volc Israel soude zijn,

17

Ende mijne vader Dauid haddet (tis waer) inden sin, dat hi den name des HEREN des Gods Israhel een huys soude tymmeren.

18

Maer die HERE sprack tot mijnen vader Dauid, dat ghi inden sin hadt een huys te timmeren mijnen name, hebdi wel gedaen, dat ghy sulcx voor v naemt,

19

Nochtans ghi en sult dat huys niet timmeren, mer v soon, die wt uwen lendenen comen sal, die sal mijnen name een huys timmeren.

20

Ende die HERE heeft sijn woort beuesticht, dat hi ghesproken heeft, want ic ben op comen in mijns vaders Dauids plaetse, ende sitte opten stoel Israel, so de HERE gesproken heeft, ende heb ghetimmert een huys den naem des HEREN des Gods Israel,

21

ende heb daer een plaetse bereyt der Arcken, daer inne dat verbont des HEREN is, dat hi gemaect heeft, met onsen vaderen, doen hijse wt den lande Egipti leyde

22

⁺Ende Salomo tradt voor den outaer des HEEREN, in die tegenwoordicheyt der geheelder gemeynten Israel, ende streckte sijn handen wt ten hemel, ende sprac, HERE God Israel, daer en is geen God, noch daer bouen inden hemel,

+ D vers 22

23

noch onder opter aerden ws ghelijcx, ghi die dat verbont ende die ontfermherticheydt houdt, dijnen knechten die voor v wandelen wt geheelder herten,

24

Ghi die uwen knecht mijnen vader Dauid hebt gehouden, al wat ghy hem gesproken hebt, met uwen mont hebt ghijt ghesproken, ende met dijne hant hebt ghijt veruult, soot desen dach bewijst

25

Nv HERE God Israel, hout uwen knecht mijnen vader Dauid, al wat ghi hem gesproken hebt, ende geseyt, Het en sal v niet ghebreken aen eenen man voor mi, die daer sitte opten stoel Israel Ist nochtans dat uwe kinderen haren wech bewaren dat si voor mi wandelen, so ghi voor mi gewandelt hebt

26

Nv God Israel laet v woorden warachtich werden, die ghi uwen knecht mijnen vader Dauid gesproken hebt

27

⁺Want meynt ghi oock dat God opter aerden woone? Siet die hemelen ende alder hemelen hemel en mogen v niet begrijpen, hoe sout dan dit huys gedoen dat ic ghetymmert hebbe?

+ E vers 27

28

Maer keert v totten gebede dijns knechts, ende tot sinen smeecken HERE mijn God, op dat ghi hoort dat lof ende gebet, dat v knecht heden voor v doet,

29

dat v oogen open staen ouer dat huys nacht ende dach, ouer dye plaetse daer ghi af geseyt hebt, mijnen naem sal daer sijn, wilt doch hooren dat gebet, dat v knecht op dese plaetse doet,

30

ende wilt verhooren dat smeecken dijns knechts, ende dijns volcx Israel, dat si hier doen sullen op dese plaetse uwer wooninghen inden hemele, ende als ghijt hoort, ghenadich sijt

31

Wanneer yemant teghen sinen naesten sondicht, ende neemt den eet op hem daer hi hem mede verbint, ende dien eedt comt voor uwen outaer, in desen huyse,

32

wilt dat hooren inden hemel, ende uwen knecht recht doen, om den ongodlijcken te verdoemen, ende sinen wech op sijn hooft brengen, ende den gerechten rechtueerdighen, om hem te gheuen na sijnder gherechticheyt

33

Als v volc Israel geslagen wort voor sine vianden om dat si aen v gesondicht hebben, ende bekeeren hen tot v, ende bekennen uwen name, ende bidden ende smeecken tot v in desen huyse,

34

so wilt dat hooren inden hemel, ende der sonden ws volcx Israels ghenadich sijn, ende brengtse weder int lant, dat ghi haren vaderen ghegheuen hebt

[p. *]

35

Als den hemel gesloten wert dattet niet en regent om dat si aen v gesondicht hebben, ⁺ ende bidden op dese plaetse, ende uwen naem belijden, ende hen van haren sonden bekeeren, om dat ghijse benaut,

+ F vers 35

36

so wilt hooren inden hemel, ende ghenadich sijn der sonden uwer knechten, ende ws volcx Israel, dat ghi hen den goeden wech wijst, daer si in wandelen moghen, ende laet opt lant reghenen, dat ghi uwen volcke tot een erffenisse ghegheuen hebt

37

Als die dierte oft pestilencie, oft droocht, oft brant oft sprinchanen, oft rupsenen inden lande sijn, oft sijn viant inden lande is, oft sijn poorten beleegert sijn oft eenighe plaghe oft crancheyt is,

38

wye dan biddet ende smeeckt, Het sijn ander menschen oft oock v volck Israel, Die daer gewaer werden haerder plaghen, elc in sijnder herten. Ende strect sijn handen wt tot desen huyse,

39

Soo wilt dat hooren inden hemel, inden setel daer ghi woont, ende genadich sijn, ende doen, dat ghi elcken gheeft so hi gewandelt heeft, gelijc ghy sijn herte bekent, want ghi alleen kent dat herte alder kinderen der menschen,

40

Op dat si v altijt vreesen, so lange als si opten lande leuen, dat ghi onsen vaderen ghegheuen hebt

41

Als ooc een vreemde, die niet en is van uwen volcke Israhel, ende coemt wt verren landen,

42

om dijns naems wil (want si sullen van uwen grooten name hooren, ende van uwer machtiger hant, ende van uwen wtgherecten arme) ende coemt dat hi v soude bidden voor uwen huyse,

43

so willet hooren inden hemel inden setel uwer wooninghen, ende doent al, daer v die vreemde om aenroept, op dat alle volcken opter aerden uwen name bekennen, dat si v ooc vreesen als v volc Israel ende dat si seker werden, hoe dit huys na uwen name ghenaemt si, dat ic ghetymmert hebbe

44

Als v volc wtrect inden strijt tegen sine vianden, door den wech dien ghijse seynden sult, ende sullen bidden totten HERE, tegen den wech totter stat die ghi vercoren hebt, ende totten huyse dat ic uwen name getymmert hebbe,

45

so wilt haer gebet ende smeecken hooren inden hemel, ende recht doen.

46

Als si tegen v sondighen sullen (wandt daer en is gheen mensce die niet en sondicht) ende ghi gram wert ende gheeftse voor haren vianden, also dat sise geuangen leyden inder vianden lant, verre oft oock nae,

47

Ende si in hare herte slaen, inden lande daer si geuangen sijn, ende bekeeren hen, ende smeeken v inden lande haerder gheuanckenissen, ende spreken, Wi hebben gesondicht ende misdaen, ende ongodlijc geweest,

48

ende bekeeren hen also tot v, wt geheelder herten, ende wt gheheelder sielen, in haerder vianden landt, diese wech geleyt hebben, ende bidden tot v teghen den wech tot haren lande dat ghi haren vaderen ghegeuen hebt, totter stadt die ghi vercoren hebt, ⁺ ende totten huyse dat ic uwen name getymmert hebbe

+ G vers 48

49

So wilt haer ghebet ende smeecken verhooren inden hemel, vanden setel uwer wooningen, ende recht doen

50

ende uwen volcke ghenadich sijn dat tegen v gesondicht heeft, ende alle haer ouertredingen, daer si v mede ouer getreden hebben, ende ontfermherticheit geuen voor die gene diese gheuanghen houden, ende v haerder te ontfermen,

51

want si sijn v volc, ende v erffenissen, die ghi wt Egipten, wt den yseren ouen geleyt hebt

52

op dat v oogen open sijn op dat smeecken ws knechts, ende ws volcx Israel, dat ghijse hoort in allen dien, daer si v omme aenroepen,

53

Want ghi hebtse v afgescheyden tot een erffenisse, wt allen volcken opter aerden, doen ghi onse vaders wt Egipten leydet, HERE, HERE

54

Ende doen Salomo alle dit gebet ende smeecken voor den HERE wt hadde gebeden, stont hi op vanden outaer des HEREN, ende hielt op van knielen, ende handen wt te strecken ten hemel,

55

ende hi stont ende seegende die geheele gemeynte Israhel met luyder stemmen, ende sprac.

56

Gelooft si die HERE, die sinen volcke Israel ruste gegeuen heeft, soo hi ghesproken heeft Daer en is niet een veruallen wt alle sine goede woorden, die hi gesproken heeft, door sinen knecht Mosen,

57

die HERE onse God si met ons, gelijc hi geweest heeft met onsen vaderen, Hi en verlate ons niet, ende en trecke die hant niedt van ons,

58

onse herte tot hem te neygen, dat wi wandelen in alle sine weghen, ende houden sine geboden, seden ende rechten, die hy onsen vaderen geboden heeft

59

Ende dese woorden die ic voor den HEERE ghesmeect hebbe, moeten genaken den HERE onsen God, dach ende nacht, dat hi recht doe sinen knecht ende sinen volcke Israel, eenen yegeliken tot sijnder tijd,

60

op dat alle volcken opter aerden bekennen dat die HEERE God is, ende geen meer,

61

ende onse hert si oprecht metten HERE onsen God, te wandelen in sinen seden ende te houden sine geboden, soo het heden toe gaet.

62

Ende die coninc metten geheelen Israhel sijn volck offerden voor den HERE offer, Ende Salomo offerde die dootoffer (die hi den HERE offerde)

63

tweentwintich dusent ossen, ende hondert ende twintich duysent scapen, Also wijden si dat huys des HEREN, die coninc ende alle die kinderen Israel,

64

Inden seluen dach wijde die coninck den middelsten hof, die voor den huyse den HEREN was, Daer mede dat hy brantoffer, spijsoffer, ende dat vette der dootofferen aldaer wt rechtede, Want den metalen outaer die voor den HERE stont, was te cleyne totten brantoffer, spijsoffer, ende totten vette der dootofferhanden

65

Ende Salomo maecte tot dier tijt een feeste, ende al Israel met hem een groote vergaderinghe, vanden pale Hemath aen, totter beken Egipti toe, voor den HERE onsen God .vij. dagen, ende weder .vij. dagen, dat waren .xiiij. dagen,

66

Ende liet dat volc den achsten dach gaen, ende si gruetten den Coninc, ende si ghinghen tot haren woonsteden vrolic, ende goets moets, van alle den goeden dat die HERE aen Dauid sinen knecht, ende aen sijn volc Israel gedaen hadde