Den Bybel met groter neersticheyt ghecorrigeert (Liesveltbijbel 1542)

Seba maect een meuterie ofte oproer, ende deelt dat geslachte Israhels van Dauid. Amasa wordt van Ioab doorsteken, Ioab veruolcht Seba, ende hi beleyt hem in Abela.

Dat .xx. Capittel

1

⁺ENde daer was een vermaert Belials man die hiet Seba, een soon Bichri, eens mans van Iemeni, die blies die basune ende sprac. Wi en hebben geen deel aen Dauid, noch erffenisse aen den sone Isai, elc heffe hem tot sijnder tenten, O Israel,

+ A vers 1

2

Doen viel alle man van Dauid in Israel, ende volchden Seba den sone Bichri, Mer die mannen Iuda hingen aen Dauid haren coninc, vander Iordanen aen, tot Ierusalem toe.

3

Doen die coninc Dauid thuys quam tot Hierusalem nam hi die thien concubinen, die hi gelaten hadde, om dat huys te bewaren, ende dedese in een bewaringe, ende besorchdese, mer hi en besliepse niet, ⁺ ende si waren also besloten, tot aen haren doot, ende leefden weduwen

+ B vers 3

4

Ende die coninc sprac tot Amasa, Roept mi tsamen alle mannen in Iuda, opten derden dach, ende ghi sult hier ooc staen,

5

Ende Amasa ginc om Iuda te roepen, ende den tijt verdroot hem die hi hem geset hadde,

6

ende Dauid sprac tot Abisai, nv sal ons Seba, de soon Bichri meer leets doen, dan Absalon, Neemt ghi die knechten ws heren ende iaecht hem na, op dat hi nieuwaerts vaste steden voor hem en vinde, ende ontloope wt onsen oogen,

7

doen trocken wt hem na die mannen Ioab, daer toe die Chreti ende Pleti, ende alle starcken, Mer si trocken wt van Hierusalem, ⁺ om Seba den sone Bichri nae te iagen

[afbeelding]

+ i.re. xvi c

8

⁺Mer doen si biden grooten steen te Gibeon waren so quam Amasa hen te gemoet, ende Ioab was ghe-

+ C vers 8

[p. *]

gordet ouer sijn cleet, dat hi aen hadde, ende had daer een sweert ouer gegordet, dat hinc aen sijn dgye inder scheden, dat ginc lichtelic wt ende in,

9

Ende Ioab sprac tot Amasa, ⁺ Vrede met v mijn broeder, Ende Ioab vaette Amasa met sijnder rechter hant biden baerde, dat hi hem cussen soude,

+ ij.re ij.d

10

Ende Amasa en nam des sweerts geen ware in die hant Ioab, ende hi stac hem daer mede in zijn liese, also dat sijn ingewant opter aerden scudde, ende hi en gaf hem geenen steeck meer, ende hi sterf

⁺ Ioab ende sijn broeder Abisai, iaechden Seba den soon Bichri na,

+ D vers 10

11

ende een vanden knapen Ioab, trac den doden Amasa, ende sprac, wie is dese, die tegen Ioab Dauid behaecht, ende in Ioabs plaetse bi Dauid zijn wilt?

12

Amasa lach int bloet gewentelt midden opter straten Mer doen een sach dat al dat volc daer bleef staen, dede hi hem vander straten opten acker, ende wierp clederen op hem want hi sach, dat wie aen hem quam, bleef staen.

13

Als hi nv vander straten gedaen was, soo volchde alle man Ioab nae om Seba, den soon Bichri na te iaghen.

14

⁺Ende hi troc door alle stammen Israel, tot Abel, ende Beth Maacha, ende geheele Haberim Ende si vergaderden hen, ende volchden hem na,

+ E vers 14

15

ende quamen ende beleyden hem tot Abel, ende Beth Maacha, ende maecten een bescutsel om die stadt, ende gingen aen die mueren, ende alle tvolc, dat met Ioab was, stormde, ende wilden die mueren neder worpen

16

Doe riep een wijse vrouwe wt der stadt, Hoort hoort, segget tot Ioab dat hi herwaerts come, ick wil met hem spreken,

17

Ende doen hi tot haer quam, so sprack die vrouwe, Sijt ghi Ioab? Hi seide Ia,

18

Si sprac tot hem, hoort die reden uwer maerten, Hi sprac, ic hoore Si seyde, Voortijts seidemen, wie vragen wil, die vrage tot Abel, ende so verginct wel,

19

Dit is die redelike ende getrouwe stadt in Israel, ende wilt ghi die stat dooden ende die moeder in Israel, waer om wildy dat erfdeel des HEREN verslinden.

20

⁺Ioab antwoorde, ende sprac, dat si verre, dat si verre van mi, dat ick verslinden ende verderuen soude, Het en heeft hem also niet,

+ F vers 20

21

Mer een vanden geberchte Ephraim, geheeten Seba, den soon Bichri, heft hem op tegen den Coninc Dauid, Geeft den seluen alleen herwaerts, so wil ic vander stadt trecken, die vrouwe sprac tot Ioab, Siet zijn hooft sal tot v ouer die mueren geworpen worden.

22

Ende die vrouwe quam in tot alle den volcke, met haerder wijsheyt, Ende si hieuwen Seba den sone Bichri dat hooft af, ende wierpent tot Ioab, Doen blies hi die basuynen, ende si stroeyden hen vander stadt, elc in sijn tente, Mer Ioab quam weder te Hierusalem in totten Coninc

23

Ioab was ouer dat geheel heyr Israel, Benaia die soon Ioiada, was ouer die Chreti ende Pleti,

24

Adoram was een rentmeester, ⁺ Iosaphat die soon Ahilud was cancellier,

+ G vers 24

25

Seia, was scriuer, Zadok ende AbIathar waren priesteren, Daer toe was Ira, die Iairite Dauids priester.