Den Bybel met groter neersticheyt ghecorrigeert (Liesveltbijbel 1542)

Achitophels raedt wort vanden HEERE ghewent. Cusais raet gaet voort

Dat .xvij. Capittel

1

⁺ENde Achitoohel sprac tot Absalon, Ic wil .xij. dusent mannen wt lesen, ende my op maken, ende Dauiden na iaghen inder nacht,

+ A vers 1

2

ende wil hem oueruallen, want hi mat ende luesich is, Als ic hem dan veruare, dat allet volc dat bi hem is vluchtet, so wil ic den coninc alleen slaen,

3

ende allet volc weder tot v brengen

Als dan alle man tot v gebracht is, so ghi begeert, so blijft allet volc met vreden.

4

Dat docht Absalon goet sijn ende alle den Ouders in Israel.

5

Mer Absalon sprac Lieue laet Husai den Arachite ooc roepen ende hooren, wat hi daer toe seyt.

6

Ende doen Husai tot Absalon in quam, so sprac Absalon tot hem, Sulcx heeft Achitophel gesproken, Segt ghi, sullen wi dat doen oft niet

7

Doen sprac Husai tot Absalon, Het en is geenen goeden raet de Achitophel op dese reise gegeuen heeft

8

Ende Husai seyde voort, Ghi kent uwen vader wel ende zijn lieden, dat si sterc zijn, ende toornich van gemoede als eenen beyre, dien zijn iongen opt velt gherooft zijn Daer toe is v vader een oorlochs man, ende en sal hem niet versuymen metten volc,

9

Siet hi heeft hem misscien, nv erghent in eenen graft verborgen oft elders op een plaetse, Waert dat gesciede, dat die eerste reyse qualijc verghinck,

[p. *]

ende daer quam een gecrijsch ende sprake, Daer is eenen slach ghesciet int volc dat Absalon nae volchde,

10

soo soude elc versaecht worden, die ooc anders geraey is ende een hert heeft als eenen leeu, Want alle Israel weet, dat v vader sterc is, ende gheraey die bi hem sijn,

11

⁺Mer dat rade ic dat ghi alle Israel tot v vergadert van Dan aen tot Barseba toe, ⁺ so vele als des zants bi der zee, ende uwen persone trecke onder hen,

+ C vers 11

+ Sa. xv.g

12

so willen wise oueruallen, in wat plaetse dat wise vinden, ende wi willen ouer hen comen, gelijc den dauwe opter aerden valt, also dat wi aen hem, ende aen allen sinen mannen niet eenen ouer en laten,

13

Ist ooc dat hi hem in een stadt vergadert, so sal alle dat geheele Israel eenen stric aen die selue stadt worpen, ende in die beke trecken datmender niet eenen steen en vinde,

14

Doen sprac Absalon, ende elc man in Israel, Den raet Husai des Arachiten, is beter dan Achitophels raet

⁺ Mer die HERE scicte dat also, dat den goeden raet Achitophels behindert werde, op dat die HERE ongeluc ouer Absalon brengen soude,

+ D vers 14

15

Ende Husai sprac tot Zadok ende AbIathar den priesteren, Also ende also heeft Achitophel Absalon ende den Ouders Israel geraden, Mer ic hebbe aldus, ende aldus geraden

16

Dus seynt nv haestelic wech, ende laet Dauiden te kennen geuen ende segt, En blijft ouer nacht niet op dat vlacke velt der woestinen, mer maect v daer ouer, op dat die coninc niet verslonden en worde, ende alle dat volc dat bi hem is,

17

Ionathan ende Achimaaz stonden by die fonteyne Rogel, ende een maerte ginc henen ende bootscaptent hen, ⁺ Si gingen ende seydent den coninc Dauid. Want si en dorsten hen niet laten sien, dat si in die stat hadden mogen comen.

+ E vers 17

18

Maer een knechtken sachse ende ghaft Absalon te kennen, mer si gingen beide haestelijc wech, ende quamen in eens mans huys te Bahurim, die hadde eenen put in sinen hof opte sale, daer dalden si in,

19

Ende dat wijf nam ende spreyde een decsel daer ouer, datment nyedt en mercte,

20

Als nv die knechten, Absalon totten wijue int huys quamen, spraken si, Waer is Achimaaz, ende Ionathan? so sprac dat wijf tot hen, Si gingen ouer dat waterken, Ende doe si sochten ende niet en vonden, gingen si weder tot Ierusalem,

21

Ende doen si wech waren clommen si wt den putte, ende gingen henen, ende bootscaptent Dauiden den coninck, ende spraken tot Dauid, maket v op, ende gaet haestelijc ouer dat water, want also ende also heeft Achitophel raet tegen v gegeuen.

22

Doe maecte hem Dauid op, ende allet volck dat bi hem was, ⁺ ende gingen ouer die Iordane, tot dattet lichten morgen wert. Ende ten faelgeerde niet aen eenen die ouer die Iordane niet gegaen en ware,

+ F vers 22

23

Als Achitophel sach, dat sinen raet niet voort ghegaen en was, sadelde hi sinen ezel, ende maecte hem op, ende trock thuys in sijn stadt ende bescicte sijn huys ende verhinc hem seluen ende sterf, ende wert begrauen in sijns vaders graft

24

Ende Dauid quam tot Mahanaim, ende Absalon troc ouer die Iordane, ende alle mannen Israel met hem

25

Ende Absalon hadde Amasa in Ioabs stede geset ouer dat heyr, Amasa was eens mans soon, die Itra hiet, een Israelijt, die welcke lach bi Abigail, die dochter Naas, die suster SeruIa, Ioabs moeder,

26

Mer Israel ende Absalon legerden hen in Gilead.

27

⁺Doen Dauid tot Mahanaim ghecomen was, doe brachten Soby die sone Nahas van Rabbath der kinderen Ammon, ende Machir die sone Ammiel van Lodabar, ende Barsillai, een Gileadijt van Roglim,

+ G vers 27

28

bedwerc tapecerie, aerden vaten, tarwe, gherste, meele, gort boonen, wicken, rijs honich, boter, scapen ende runderen, ende keese tot Dauiden,

29

ende totten volcke dat bi hem was, om te eten, want si dachten, Dat volc sal hongerich, dorstich, ende moede sijn inder woestinen.