Den Bybel met groter neersticheyt ghecorrigeert (Liesveltbijbel 1542)

Dauid begracijt die maechschape Sauls ende bewijst haer veel duechden om Ionathas wille.

Dat .ix. Capittel.

1

⁺ENde Dauid sprac, isser ooc noch yemant ouer bleuen, vanden huyse Saul, dat ick ontfermherticheyt aen hem doe, om Ionathas wille?

+ A vers 1

2

Daer was een knecht vanden huyse Saul die hier Siba, dien riepen si tot Dauid, ende die coninc sprac tot hem,

3

Sijt ghi Siba: Hi sprac Ia v knecht, die coninc sprac, en isser noch nyemant meer vanden huyse Saul, dat ick Gods ontfermherticheyt aen hem doe, Siba sprack totten coninc. Daer is noch een soon Ionathans, lam aen die voeten,

4

Die coninc sprac tot hem, Waer is hi, Siba sprac totten coninc, siet hy is te Ladabar, inden huyse Machir, des soons Ammiel,

5

Doe seinde die coninc Dauid henen, ⁺ ende liet hem halen van Lodabar, wt den huyse Machir des soons Ammiel.

+ B vers 5

6

Doen nv MephiBoseth die soon Ionathan des soons Sauls tot Dauid quam viel hi op sijn aensicht, ende aenbede hem, Dauid sprac, MephiBoseth, Hy sprac Hier ben ic v knecht.

7

Dauid sprac tot hem, En vreest niet, want ic wil ontfermherticheyt aen v doen, om Ionathan ws vaders wille, ende wil v alle die ackeren ws vaders Saul weder geuen, mer ghi sult dagelicx aen mijn tafele broot eten,

8

⁺Hi aenbede ende sprac. Wie ben ic v knecht, dat ghi v keert tot eenen dooden honde, gelijc ic ben.

+ C vers 8

9

Doen riep die coninck Siba den knape Saul, ende sprac tot hem, allet wat Sauls geweest is, ende sijns geheelen huys, dat heb ic den soon ws heren gegeuen.

10

Dus arbeit nv sinen acker, ghi ende uwe kinderen ende knechten, ende brenget in, dat ws heren soon broot hebbe dat hi geuoet worde, ⁺ Maer MephiBoseth ws heeren soon, sal dagelicx broot eten aen mijn tafele Siba had vijfthien sonen ende twintich knechten.

+ D vers 10

11

Ende Siba sprac totten coninc. Allet gelijc mijn here de coninc sinen knechte geboden heeft, so sal sijn knecht doen, ende MephiBoseth ete op dijn tafel als een des conincx kinderen,

12

ende MephiBoseth had eenen cleynen soon die hiet Micha, mer allet wat inden huyse Siba woonde dat diende MephiBoseth,

13

mer MephiBoseth woonde te Ierusalem, want hi adt daghelicx op des conincx tafel, ende hincte met beyde sijn voeten.