Den Bybel met groter neersticheyt ghecorrigeert (Liesveltbijbel 1542)

Isboseth Sauls soon wordt vanden verraders doorsteken, ende die selue worden van Dauiden ghestraft ende gedoot.

Dat .iiij. Capittel.

1

⁺DOen die sone Saul hoorde dat Abner tot Hebron doot was, so worden sine handen mat, ende alle Israel wert bedroeft.

+ A vers 1

2

Daer waren twee mannen hooftlieden ouer die crijschknechten onder den sone Saul, deene hiet Baena, die ander Rechob, die sonen Rimon, des Berothiten, wt den kinderen BenIamin, want Beroth wert ooc onder BenIamin gerekent

3

Ende die Berothiten waren geulucht tot Bethaim, ende vreemdelingen aldaer geworden, tot op den dach van heden.

4

Ooc hadde Ionathan die sone Saul eenen soon die lam was aen die voeten, ende was vijf iaer out doen dat gecrijsch van Saul ende Ionathan wt Israel quam, ende sine voester oft amme hief hem op ende vluchte Ende in dien si haeste ende vluchte viel hi, ende werdt hinckende, ende hi hiet MephiBoseth.

5

⁺Dus ginghen nv henen die sonen Rimon des Berothiterst Rechob, ende Baena, ende quamen totten huyse Isboseth doen den dach alder heetst was, Ende hi lach op sinen leger smiddaechs,

+ B vers 5

6

ende si quamen int huys om tarwe te halen ende staken hem in sijn dunste ende ontliepen,

7

want doe si int huys quamen lach hi op sijn bedde in sijn slaepcamer, ende staken hem doot, ende hieuwen hem dat hooft af ende namen sijn hooft, ende gingen henen ouer den wech, op dat blac velt alle den nacht,

8

Ende brachten dat hooft Isboseth tot Dauiden tot Hebron, ende spraken totten coninck, Siet daer is dat hooft Isboseth des soons Sauls, dijns vyants die na v siele stont, Die HERE heeft heden mijnen heere den coninc gewroken aen Saul, ende aen sijn saet.

9

⁺Doen antwoorde Dauid, so warachtelick als die HERE leeft, die mijn siele van alder tribulatien verlost heeft,

+ C vers 9

10

Ic greep dien die mi vercondichde, ende sprac Saul is doot, ende hi waende hi ware een goet bode, ende doode hem tot Ziklag, dien ic boden loon soude geuen,

11

Ende dese ongodlike lieden hebben den gerechten man in sinen huyse op sinen leger verworcht Ia en soude ic dies bloet van uwen handen nyet eysschen, ende v

[p. *]

vander aerden doen?

12

Ende Dauid geboot sinen iongelingen, die doodense ende hieuwen hen handen ende voeten af ende hingense op aenden poel tot Hebron, mer dat hooft Isboseth namen si ende begroeuent in Abners graf tot Hebron.