Den Bybel met groter neersticheyt ghecorrigeert (Liesveltbijbel 1542)

Dauid trect wt ten raet des HEREN tot Hebron, daer wort hi van dat huys Iuda coninc ghesaluet. Maer Abner die hooftman Saul neemt voor hem Isboseth Sauls soon eenen coninc ouer Israel.

Dat .ij. Capittel.

1

⁺NA dese gesciedenisse vraechde Dauid den HERE ende sprac sal ic op reysen in een vanden steden Iuda? Ende dye HERE sprac tot hem, reyst op,

+ A vers 1

2

dauid sprac, waer henen? ⁺ hi sprac, tot Hebron, Also troc Dauid derwaerts met sinen twee wiuen Ahinoam die Iesraelitin, ende met Abigail, Nabals des Carmeliten wijf,

+ Dido timert dye groote stadt van Cartago die naemaels vele strijden teghen de romeinen hadde

3

daer toe die mannen die bi hem waren leide Dauid op, eenen yegelijcken gafmen sine huysen, ende woonden in die steden Hebron,

4

Ende die mannen Iuda quamen ende salfden Dauiden aldaer tot eenen coninc ouer thuis Iuda. Ende doent Dauiden te kennen wert gegeuen, ⁺ dat die van Iabes in Gilead Saulen begrauen hadden,

+ B vers 4

5

seinde hi boden tot hen, ende dede hen seggen. Geseegent sijt ghi den HERE, dat ghi sulcke ontfermherticheyt aen uwen Here Saul gedaen hebt, ende hebt hem begrauen,

6

so doe die HERE nv aen v ontfermherticheyt ende trouwe, ende ic wil v ooc goet doen, om dat ghijt gedaen hebt,

7

Dus moeten nv uwe handen getroost zijn, ende sijt redelijc. Want uwe heere Saul doot is, so heeft my dat huys Iuda gesalft tot eenen coninc ouer hen.

8

⁺Mer Abner die sone Ner, die Sauls velthooftman was, nam Isboseth Sauls soon ende leyde hem doort heyr,

+ C vers 8

9

ende maecte hem tot eenen coninc ouer Gilead, Assur, Iesrael, Ephraim, BenIamin, ende ouer alle Israel,

10

Ende Isboseth Sauls soon was .xl. iaer out, doe hi coninc wert ouer Israel, ende regneerde twee iaren Maer dat huys Iuda hielt met Dauid,

11

Ende dien tijt die Dauid coninc was tot Hebron ouer dat huys Iuda, was seuen iaer ende ses maenden.

12

Ende Abner die sone Ner, troc wt metten knechten Isboseth des soons Saul, wt den heyr tot Gibeon

13

Ende Ioab die soon SeruIa, troc wt metten knechten Dauid, ende ontmoeten malcanderen biden poel tot Gibeon so stelden hen dese op dese side des poels, dander op geen side,

14

⁺ende Abner sprac tot Ioab, Laet hen die iongelingen op maken ende voor ons spelen, Ioab sprack, Het gelt wel.

+ D vers 14

15

Doen maectense hen op, ende gingen henen int getal .xij. wt BenIamin op Isboseths Sauls soons deel ende .xij. vanden knechten Dauid,

16

ende elc greep den anderen biden cop, ende stiet hem sijn sweert in sijn side, ende viellen tsamen, waer af die plaetse genoemt wert Helkath Hazurim, die tot Gibeon is,

17

Ende daer verhief eenen seer scherpen strijt in dien dage. Abner ende die mannen Israel werden geslagen vanden knechten Dauid.

18

Daer waren drie sonen SeruIa, Ioab, Abisai, ende Asahel,

19

mer Asahel was rasch te voete als een rhe opt velt,

20

ende iaechde Abner na, ende en weke noch ter rechter noch ter slincker hant van Abner.

21

Doen keerde hem Abner om ende sprac, Sijt ghi Asael? Hi seyde ia, Abner sprac tot hem, Gaet ter rechter of slincker hant, ende neemt een vanden iongelingen voor v, ende neemt hem zijn harnasch, Mer Asahel en wilde niet aflaten van hem

22

doch seyde Abner noch tot Asahel, Heft v van my, waerom wilt ghi dat ic v ter aerden slae, ende hoe dorste ic mijn aensicht op heffen voor uwen broeder Ioab? ⁺ maer hi weygerde hem te wijcken.

+ E vers 22

23

Doen stack hem Abner achter hem, met een spies in zijn gemachte, also dat de spies achter wt quam ende hi viel aldaer, ende sterf voor hem, ende wie op de plaetse quam daer Asahel doot lach, die stont stille,

24

Maer Ioab ende Abisai die iaechden Abner na, tot de sonne onder ginc, ende doen si quamen opten houel Amma, die voor Giah leyt, opten wech der woestinen Gibeon,

25

so vergaderden hen de kinderen BenIamin achter Abner henen, ende worden een hoopken, ende gingen opten top van eenen houele.

26

⁺Ende Abner riep tot Ioab ende seide Sal dan dat sweert sonder eynde verslinden? En weet ghi niet dat ten laetsten suer sal werden? Hoe lange en wildy den volc niet seggen dat het op houde van sinen broederen

+ F vers 26

27

Ioab sprac So warachtelic als God leeft, hadt ghi heden morgen so gesproken, dat volc had elc van sinen broeder afgelaten,

28

Ende Ioab blies dye basuyne, ende allet volc stont stille, ende en iaechden Israel niet meer na ende en streden niet meer,

29

⁺Mer Abner ende zijn mannen gingen alle dien nacht ouer tblac velt, ende gingen ouer de Iordane, ende wandelden door geheel Bithron, ende quamen inden leger. ⁺

+ G vers 29

+ In tweede iaer des conincrijcx Dauid, timmerde Andradus, die soone van codrus de coninc van Athenen de vermaerde stadt van Ephesien ende daer wert naemaels den grooten tempel der afgodinnen Diana gesticht als de werelt ghestaen had vier .m.c.xxvi. iaer voor Cristus gheboorte .m ende .lxvi. iaren

30

Ioab keerde hem van Abner, ende vergaderde dat geheele volc, ende daer gebraken aen die knechten Dauid, tnegentich mannen ende Asahel,

31

mer die knechten Dauid hadden geslagen onder BenIamin, ende die mannen Abner, also datter drie hondert ende tsestich mannen doot waren bleuen, Ende si hieuen Asahel op, ende begroeuen hem in sijns vaders graf te Bethleem,

32

ende Ioab met sinen mannen gingen den geheelen nacht, also dat het licht op brac tot Hebron.