Den Bybel met groter neersticheyt ghecorrigeert (Liesveltbijbel 1542)

Als Samuel out wert, ende sine sonen tvolc regeerden, so waren si gierich, ende onrechtueerdich daerom begeerde tvolck eenen coninck

Dat .viij. Capittel.

1

⁺DOen Samuel out wert, so sette hi sine sonen tot rechters ouer Israhel,

+ A vers 1

2

Sijn eerstgeboren sone hiet Ioel, ende die ander Abia, ende waren rechters tot BerSeba

3

Mer sine sonen en wandelden niet in sine wegen, mer neychden hen tot ghiericheit, ende namen giften, ende buychden dat recht.

4

Doen vergaderden hen alle ouders in Israel, ende quamen tot Ramath tot Samuel, ende seyden tot hem,

5

Siet ghi sijt out gheworden, ende v sonen en wandelen niet in v wegen. Dus set nv eenen coninc ouer ons die ons rechte, soe alle heydenen hebben

6

Doen beuielt Samuel qualic, dat si seyden, gheeft ons eenen coninc, ⁺ die ons rechte,

+ B vers 6

7

ende Samuel badt voor den HERE, die HERE sprack tot Samuel, Hoort die stemme des volcx, in alle dyen, dat si tegen v gheseyt hebben, want si en hebben v niet verworpen, mer mi, dat ic geen coninc ouer hen en soude zijn,

8

Si doen v also si altoos gedaen hebben, van dien dage aen, dat icse wt Egipten leide, tot desen dach toe, ende hebben mi verlaten, ende anderen goden gedient. Aldus verhoort nv haer stemme,

9

Nochtans betuyghet hen, ende vercondicht hen dat recht des conincs, die ouer hen heerschappen of domineren sal

10

⁺Ende Samuel seyde al die woorden des HEREN den volc, dat van hem eenen coninc eyschte.

+ C vers 10

11

Dat sal des conincx recht sijn, die ouer v heerscen sal, Vwe sonen sal hi nemen tot sinen wagen, ende ruyteren, dye hi voor sinen wagen sal doen lopen,

12

ende tot Lantuoechten ende hooftlieden, ende tot acker lieden, die hem sinen acker bouwen, ende tot mayers in sinen oogst, ende dat sy sijn harnasch, ende al wat tot sinen wagen hoort maken

13

Vwe dochteren sal hi nemen, dat si apotekerssen, cokerssen ende bacsteren sijn.

14

V beste ackers ende wijnbergen ende olijfgaerden sal hi nemen, ende sinen knechten gheuen,

15

daer toe van uwen saet, ende wijnberghen, sal hi tiende nemen ende sinen camerlingen ende knechten geuen.

16

Ende v knechten ende maerten, ende v fijnste iongelingen, ende uwe ezelen sal hi nemen, ende sijn werc daer mede doen.

17

Van uwen cudden sal hi thienden nemen, ende ghi moet sine knechten sijn.

18

Als ghi dan inder tijt ouer uwen coninc roepen sult, dyen ghi v vercoren hebt, soo en sal v die HERE niet verhoren

19

⁺Maer dat volc weygerde hen te hooren die stemme Samuel, ende spraken Geensins, mer daer sal een coninc ouer ons sijn,

+ D vers 19

20

op dat wi ooc sijn als alle ander heydenen, dat ons onse coninc ordele ende voor ons wt trecke als wi onse orloge voeren,

21

doen hoorde Samuel al dattet volc seyde, ende seyde dat voor den ooren des HEREN, ⁺

+ i.par. i d

22

die HERE sprac tot Samuel, hoort hare stemme, ende maect hen eenen coninc, ende Samuel sprac totten mannen Israel, gaet henen elck in sijn stadt. ⁺

+ Brutus coninc van Bretanien stichte dye stadt van Tours.