Den Bybel met groter neersticheyt ghecorrigeert (Liesveltbijbel 1542)

Simson trouwet een wijf in Timnata, ende hi verschoort eenen iongen Leeuwe, ende hi geeft sinen gesellen een raetsel te raden.

Dat .xiiij. Capittel.

1

⁺SImson ginc af tot Thimnath, ende sach een wijf tot Thimnath onder den dochteren der Philisteen, ⁺

+ A vers 1

+ Simson die .xvi. rechter.

2

ende doen hy op quam so ghaf hijt sinen vader ende sijnder moeder

[afbeelding]

te kennen ende sprac, ic heb een wijf gesien tot Timnath onder den dochteren der Philisteen, gheeftse my tot eenen wijue. ⁺

+ Die stat van Padua ende Venegien werden ghesticht van verlopen troianen inder tijdt der wereldt iiij.M C. ende xxv voor cristus gheboorte M.c. ende lxxiij.

3

Sijn vader ende moeder spraken tot hem En isser gheen wijf onder den dochteren dijnre broeders, noch in allen dijnen volcke, dat ghy gaet ende neemt een wijf bi die Philisteen die onbesneden sijn.

Simson sprac tot sinen vadere. Gheeft mi dese want si behaecht mijnen ooghen,

4

maer sijn vadere, noch ooc sijn moedere en wisten nyet dattet vanden HEERE ware, want hi socht oorsake aen die Philisteen. Die Philisteen hadden heerscappie ouer Israel doen ter tijt.

5

Also ginc Simson af met sinen vader ende met sine moeder tot Thimnath, Ende als si quamen aen die wijnbergen tot Timnath, Siet doen quam een ionghe leeuwe briesscende hem tegen.

6

Ende die geest des HEREN wert spoedich ouer hem, ende hi deelde den leeu in sticken gelijc een man een bocxken ontsticken deelt, ende en hadde nochtans niet met allen in sijn hant, ende hi en ghaft sinen vader noch sijn moeder niet te kennen.

7

Doen hi afquam, sprac hy metten wijue, ende si behaechde Simson in sinen ooghen.

8

Ende na sommighe dagen quam hi weder dat hise soude nemen ende terde wt den wege dat hi dat doode lichaem des leeus, oft den doden leeu soude besien, siet doen was eenen byen swerm inden lichaem des leeuwen, ende huenich, ende namt in sijn hant, ende adt daer van onder wegen.

9

Ende hi ghinc tot sinen vader ende tot sijnder moeder, ende ghaft

[p. *]

hen dat si ooc souden eten. Mer hi en seyde hen niet dat hi dat honich van des leeuwen prije genomen had.

10

⁺Ende doen sijn vader af quam totten wijue, so maeckte Simson daer een weerschap, soo die iongelinghen pleghen te doen,

+ C vers 10

11

ende doen si hem saghen, so gauen si hem dertich gesellen toe, die bi hem souden sijn,

12

Simson sprac tot hen. Ic wil v een raetsel wtgeuen, ist dat ghi mi dat geraet ende raecket, binnen desen seuen daghen der weerschappen, so wil ic v dertich hemden geuen ende dertich viercleederen.

13

Mer en condijs nyet geraden, so suldy mi .xxx. hemden ende .xxx. viercleederen gheuen. Ende si seyden tot hem. Gheeft v raetsel wt laet het ons hooren,

14

Hi sprac tot hen, Spijse ghinck vanden eter, ende soeticheyt vanden stercken, ende si en consten dat raetsele binnen drie dagen niet geraden.

15

⁺Aenden seuenden dach spraken si tot Simpsons wijf, Troetelt uwen man dat hi ons dat raetselken segghe, oft wi sullen v ende ws vaders huys met vier verbernen, Hebdy ons hierom ghenoot dat ghi ons arm sout maken oft niet?

+ D vers 15

16

Doen weende Simsons wijf voor hem ende sprack. Ghi sijt op mi gram, ende en hebt my niet lief, Ghi hebt den kinderen mijns volcx een raetsel wtgegeuen ende en hebbes mi niet gheseydt, Hy sprac tot haer, ic en hebs mijnen vader ende mijnder moeder niet gheseyt, ende soudict v segghen?

17

Ende si weende die seuen daghen voor hem, dye wijle si weerschap hielden, Mer aenden seuenden dach,

[afbeelding]

seyde hijt haer Want si dreef hem in. Ende si seyde dat raetsele haers volcx kinderen.

18

Doen spraken de mannen der stadt inden seuensten dach tot hem, eer die sonne onder ghinc. Wat is soeter dan huenich? Wat is stercker dan den leeu?

19

mer hi sprac tot hen, En haddi met mijnen calue nyet geploeget, ghi en hadt mijn raetsel niet geraden,

20

ende den geest des HEREN wert veerdich of spoedich ouer hem, ende hi ginc af tot Asklon, ende sloech .xxx. mannen onder hen, ende nam haer gewaet, ende gaf viercleederen, den genen die dat raetsel geraden hadden, ende hi vergramde in sijn toornicheit ende ghinc op in sijns vaders huys.

21

Maer Simsons wijf wert een van sinen gesellen gegheuen, die hem toebehoorde.